حدیث حاشیہ:
اس طویل حدیث میں بہت سے امور کے ساتھ خمس کا بھی ذکر ہے۔
اسی لئے حضرت امام اسے یہاں لائے۔
آنحضرت ﷺ نے اپنے ترکہ کے بارے میں واضح طور پر فرما دیا کہ ہمارا ترکہ تقسیم نہیں ہوتا۔
وہ جو بھی ہو سب صدقہ ہے۔
لیکن حضرت فاطمہ ؓنے حضرت صدیق اکبر ؓسے اپنی وراثت کا مطالبہ کیا۔
حضرت صدیق اکبر ؓنے حدیث نبوی لا نُورِثُ ما ترکناہ صدقة خود آنحضرت ﷺسے سنی تھی۔
اس لئے اس کا خلاف کیونکر کرسکتے تھے۔
اور حضرت فاطمہ ؓ کی ناراضگی اس پر مبنی تھی کہ ان کو اس حدیث کی خبر نہ تھی اسی لئے وہ متروکہ جائداد نبوی میں اپنے حصے کی طالب ہوئیں۔
جائداد کی تفصیل یہ کہ فدک ایک مقام ہے مدینہ سے تین منزل پر‘ وہاں کی زمین آنحضرت ﷺنے خاص اپنے لئے رکھی تھی اورخاص مدینہ میں بنو نضیر کے کھجور کے باغات ‘مخیریق کے سات باغات‘ انصار کی دی ہوئی اراضی‘ وادی القریٰ کی تہائی زمین وغیرہ ابو بکر ؓنے ان جائدادوں کی تقسیم سے انکار فرمادیا۔
اگر آپ حضرت فاطمہ ؓ کا حصہ الگ کردیتے تو پھر آپ کی بیویوں کا اور حضرت عباس ؓ کا حصہ بھی الگ الگ کردینا پڑتا اور وہ طرز عمل جو آنحضرت ﷺ کا اس جائداد میں تھا پورا کرنا ممکن نہ رہتا۔
لہذا آپ نے تقسیم سے انکار کیا۔
جس کا مطلب یہ تھا کہ سب کام اور سب مصارف اسی طرح جاری رہیں جس طرح آنحضرت ﷺ کی حیات دنیاوی میں کیا کرتے تھے‘ اور یہ ان کا کمال احتیاط اور پرہیزگاری تھی۔
بیہقی کی روایت میں ہے کہ حضرت فاطمہ کی بیماری میں حضرت ابو بکر ؓصدیق ان کی عیادت کو گئے اور حضرت فاطمہ ؓکو راضی کرلیا اور وہ راضی ہوگئی تھیں۔
حضرت ابو بکر ؓاور حضرت عمر ؓاپنی خلافت میں ان جائدادوں سے آپ ﷺ کی بیویوں کے مصارف اور دوسرے ضروری مصارف ادا کرتے رہے لیکن حضرت عثمان ؓنے اپنی خلافت میں بطور مقطعہ کے مروان کو فدک دے دیا۔
وہ خود غنی تھے ان کو یہ حاجت نہ تھی کہ فدک سے اپنے مصارف چلاتے (خلاصہ وحیدی)
وقد جاء في الکتاب المغازي أن فاطمة جاءت تسأل نصیبھا مما ترك رسول اللہ صلی اللہ علیہ وسلم مما أفاءاللہ علیه وفدك وما بقي من خمس خیبر وإلی ھذا أشار البخاري۔

حدیث حاشیہ:
1۔
حضرت فاطمہ ؓ کو اس حدیث کا علم نہیں تھا جو حضرت ابو بکر ؓنے پیش کی۔
کہ ہماری جائیداد میں وراثت نہیں چلتی بلکہ وہ صدقہ ہوتی ہے۔
اس بنا پر انھوں نے رسول اللہ ﷺ کو چھوڑی ہوئی جائیداد سے وراثتی حصہ طلب فرمایا۔
رسول ا للہ ﷺ کی مملوکہ جائیداد کی تفصیل حسب ذیل ہے۔
قبیلہ بنو نضیر میں منحریق نامی یہودی کے سات باغ تھے اس نے غزوہ احد کے وقت وصیت کی تھی کہ اگر وہ جنگ میں مارا گیا تو اس کے تمام اموال رسول اللہ ﷺ کے ہوں گے۔
چنانچہ وہ اس جنگ میں قتل ہو گیا۔
لہٰذا اس کے تمام باغات رسول اللہ ﷺ کی تحویل میں آگئے۔
انصار نے اپنی کچھ زمینیں رسول اللہ ﷺ کو ہبہ کی تھیں۔
ان تک پانی نہیں پہنچتا تھا وہ بھی آپ کی ملک تھیں۔
بنو نضیر کو جب جلا وطن کیا گیا تو ان کی مملوکہ زمینیں بھی مال فے کے طور پر رسول اللہ ﷺ کے قبضے میں آگئیں۔
فتح خیبر کے بعد اہل فدک نصف زمینیں دینے پر رسول اللہ ﷺسے صلح کر لی تھی خیبر کے دو قلعے وطیح اور سلالم بھی یہودیوں سے صلح کے نتیجے میں آپ کو ملے تھے۔
خیبر جوبطور شمشیر فتح ہوا تھا اس کے مال غنیمت سے آپ کو پانچواں حصہ ملا تھا وہ بھی آپ کی ملک تھا۔
یہ تمام جائیداد رسول اللہ ﷺ کی تھی اس میں کسی کا کوئی حصہ نہیں تھا۔
رسول اللہ ﷺ اس کی پیداوار سے اپنا اور اپنے اہل خانہ کا خرچ نکال کرباقی مسلمانوں کی ضروریات میں خرچ کر دیتے تھے۔
(عمدةالقاری: 424/10)
2۔
اگرچہ اس حدیث میں خمس کا ذکر نہیں ہے تاہم صحیح بخاری کی ایک روایت میں ہےکہ سیدہ فاطمہ ؓنے حضرت ابو بکر ؓسے مدینہ طیبہ کی بطور فے املاک، فدک اور جو کچھ خمس خیبر سے بچا تھا اس سے حصہ دینے کا مطالبہ کیا تھا۔
(صحیح البخاري، المغازي، حدیث: 4240۔
4241)
3۔
اس وضاحت سے معلوم ہوا کہ یہ حدیث عنوان کے مطابق ہے بیہقی کی ایک روایت میں ہے کہ جب سیدہ فاطمہ ؓبیمارہوئیں تو حضرت ابو بکر ؓ ان کی تیمارداری کے لیے تشریف لے گئے وہاں آپ نے حضرت فاطمہ ؓ کو مطمئن کر دیا تھا۔
اور وہ راضی ہو گئیں۔
(السنن الکبری: 301/6)
4۔
حدیث کے آخر میں لفظ (تَعرُوهُ)
آیا ہے اسی مناسبت سے امام بخاری ؒنے ایک قرآنی لفظ (اعْتَرَاكَ) (ھود 11/54)
کی لغوی تشریح فرمائی ہے۔
(عمدةالقاري: 424/10)