اردو حاشہ:
وضاحت:
1؎:
اے آسمانوں اور زمینوں کے رب! اے ہمارے رب! اے ہرچیز کے رب! زمین چیر کر دانے اور گٹھلی سے پودے اگانے والے،
توراۃ،
انجیل اور قرآن نازل کرنے والے،
اے اللہ! میں تیری پناہ چاہتا ہوں ہر شر والی چیز کے شر سے،
تو ہی ہر شر وفساد کی پیشانی اپنی گرفت میں لے سکتا ہے۔
تو ہی سب سے پہلے ہے تجھ سے پہلے کوئی چیز نہیں ہے،
تو ہی سب سے آخر ہے،
تیرے بعد کوئی چیز نہیں ہے،
تو سب سے ظاہر (اوپر) ہے تیرے اوپر کوئی چیز نہیں ہے،
تو باطن (نیچے وپوشیدہ) ہے تیرے سے نیچے کوئی چیز نہیں ہے،
مجھ پر جو قرض ہے اسے تو ادا کر دے اور تو مجھے محتاجی سے نکال کر غنی کر دے۔

حدیث حاشیہ:
فوائد ومسائل:
اس حدیث میں بھی سونے کے لیے داہنی کروٹ پر لیٹنے کی روایت کی گئی ہے اور آپ کا اپنا معمول بھی یہی تھا، کیونکہ اس کروٹ پر لیٹنے کی صورت میں، دل جو بائیں پہلو میں ہے، لٹکتا رہتا ہے اور لیٹے وقت ذکر و دعا اور توجہ الی اللہ کے لیے یہی شکل زیادہ مناسب ہے۔
اور بقول علامہ ابن جوزی، اطباء کے نزدیک بدن کے لیے یہی مناسب ہے، کیونکہ دائیں پہلو پر لیٹنے سے کھانا نیچے چلا جاتا ہے اور پھر بعد میں بائیں پہلو پر لیٹنے سے وہ ہضم ہو جاتا ہے اور یہ دعا ان لوگوں کے زیادہ مناسب حال ہے، جو مقروض ہیں اور معاشی پریشانیوں میں مبتلا ہیں، بندہ یہ دعا کرے اور اپنے رب کریم سے یہ امید رکھے کہ وہ رزق کی کشادگی کی صورت پیدا فرما دے گا۔

فوائد ومسائل:
1۔
ان مبارک کلمات میں ایک مسلمان کے لئے اظہار عبودیت کے ساتھ ساتھ توحید الوہیت توحید ربوبیت۔
توحید اسماءوصفات اور نظام رسالت پر ایمان کی تجدید کا اظہار ہے۔

2۔
اور بالخصوص قرض اور فقیری سے پناہ مانگنے کی تعلیم ہے۔
کہ اس سبب سے انسان کا سکون وچین غارت ہوجاتا ہے۔
عزت دائو پر لگ جاتی ہے۔
علاوہ ازیں دین ودنیا کی اور بھی ڈھیروں مصیبتیں آڑے آجاتی ہیں۔

اردو حاشہ:
فوائد و مسائل:
 
(1)
  اللہ کا ذکر دنیا کے مال سے بہتر ہے۔

(2)
اللہ تعالیٰ اول وآخر ہے۔
وقت مخلوقا ت پر اثر انداز ہوتا ہے، خالق پر نہیں، اس کے لیے سب زمانے برابر ہیں۔

(3)
اللہ تعالیٰ سب سے بلند و بالا اور سب پر غالب ہے، اور اس کی قدرت مخلوق کے ہر ذرے پر محیط ہے اور علم و قدرت کے لحاظ سے وہ سب سے قریب ہے۔

(3)
اللہ تعالیٰ سے اس کی صفات کے وسیلے سے دعا کرنی چاہیے۔

(4)
فقر و غنا اللہ کے ہاتھ میں ہے، لہٰذا قرض و فقر سے نجات کے لیے مسنون دعا کے ذریعے سے اللہ کی مدد حاصل کرنی چاہیے۔

اردو حاشہ:
فوائد و مسائل:
(1)
اللہ کی صفات کا ذکر کرکے دعا کرنی چاہیے۔

(2)
اللہ تعالیٰ جسمانی ضروریات بھی پوری کرتا ہے۔
اور بندوں کومادی رزق دینے کےلئے دانے اور گھٹلیاں پھاڑ کر فصلیں اور درخت اُگاتا ہے۔
اور روحانی ضروریات بھی پوری کرتا ہے۔
اس مقصد کے لئے اس نے نبوت کا سلسلہ جاری فرما کر آسمانی کتابیں نازل کی ہیں۔

(3)
اس دعا میں قرض کی ادایئگی کےلئے اللہ کی صفت رزاقیت کا واسطہ دیا گیا ہے۔

(4)
زمان ومکان اللہ کی مخلوق ہیں۔
اس لئے وہ ان سب پر حاوی ہے۔
وہ زمان کے لحاظ سے اول وآخر ہے۔
اور مکان کے لحاظ سے تمام مخلوقات سے برتر (الظاہر)
بھی ہے۔
اور اپنی قدرت وعلم کے لحاظ سے قریب ترین (الباطن)
بھی۔

(5)
فقر کے ساتھ اگر اللہ کی طرف توجہ اور عبادت میں انہماک ہو تو یہ محمود ہے۔
تاکہ دل مال ودولت میں مشغول ہوکر اللہ سے غافل نہ ہوجائے۔
لیکن اگر فقر وفاقہ اس حد تک پہنچ جائے۔
کہ بنیادی ضروریات بھی پوری نہ ہوں۔
اور بندہ پیٹ بھرنے کےلئے کسی کے آگے ہاتھ پھیلانے پر مجبور ہوجائے۔
یا مقروض ہوجائے جب کہ قرض کی ادایئگی کی کوئی اُمید نظر نہ آرہی ہو تو ایسا فقر مذموم ہے اس سے اللہ کی پناہ مانگنی چاہیے۔

اردو حاشہ:
وضاحت:
1؎:
اے اللہ! تو ساتوں آسمانوں کا رب،
عرش عظیم کا رب،
اے ہمارے رب! اور ہرچیز کے رب،
تو راۃ،
انجیل اور قرآن کے نازل کرنے والے،
زمین پھاڑ کر دانے اگانے اور اکھوے نکالنے والے،
میں تیری پناہ چاہتا ہوں ہر چیز کے شر سے،
جس کی پیشانی تیرے ہاتھ میں ہے،
تو پہلا ہے (شروع سے ہے) تجھ سے پہلے کوئی چیز نہیں ہے،
تو سب سے آخر ہے تیرے بعد کوئی چیز نہیں،
تو سب سے ظاہر (یعنی اوپر ہے)،
تیرے اوپر کوئی چیز نہیں ہے،
تو پوشیدہ ہے سب کی نظروں سے،
لیکن تم سے کوئی چیز پوشیدہ نہیں ہے،
اے اللہ! تو میرے اوپر سے قرض اتار دے،
اور مجھے محتاجی سے نکال کر مالدار کر دے۔