اردو حاشہ:
”اچھا طریقہ جاری کیا۔“ بشرطیکہ وہ کام شریعت میں موجود ہو، جیسے مندرجہ بالا واقعہ میں انصاری نے نیک کام میں پہل کی اور لوگوں نے اسے دیکھ کر صدقات کیے۔ اور صدقہ شریعت میں مشروع ہے۔ اگر کوئی شخص ایسا کام جاری کرے جو شریعت میں موجود نہ ہو تو یہ بدعت ہوگی، خواہ وہ ظاہر میں نیک کام ہی نظر آئے کیونکہ رسول اللہﷺ نے فرمایا: ”جو شخص دین میں ایسا کام رائج کرے جو دین سے نہ ہو تو وہ مردود ہے۔“ (صحیح البخاري، الصلح، حدیث: 2697، وصحیح مسلم، الأقضیة، حدیث: 1718) کیونکہ اس طرح دین میں تحریف ہو جائے گی اور دین کی اصل شکل وصورت قائم نہ رہے گی۔

تخریج الحدیث:
[صحيح مسلم 2351]

فقہ الحدیث:
➊ اس حدیث میں سنت جاری کرنے سے مراد وہ طریقہ ہے جو کتاب و سنت سے ثابت ہو، لیکن یاد رہے کہ اس سے مراد بدعت کا ایجاد کرنا نہیں ہے۔
➋ جو کام سنت سے ثابت ہے اس کی طرف لوگوں کو دعوت دینا بڑے ثواب کا کام ہے۔
➌ رسول اللہ صلی اللہ علیہ و سلم کو اللہ تعالیٰ نے رحمة للعالمين بنا کر بھیجا۔
➍ اگر شدید ضرورت ہو تو لوگوں کے سامنے تعاون کی اپیل کرنا جائز ہے۔
➎ اگر اسلحہ موجود ہو تو ہر وقت مسلح رہنا مسنون ہے۔
➏ مشکل کشا صرف ایک اللہ ہے۔
➐ خطبے میں لوگوں کو سمجھانے کے لئے آیات کی تلاوت کرنا سنت ہے۔
➑ کسی پریشان حال مسلمان کو دیکھ کر مضطرب ہونا اور اس کی راحت میں خوشی محسوس کرنا عین ایمان ہے۔

اردو حاشہ:
(1)
سنت کے لغوی معنی طریقے کے ہیں، اچھا ہو یا برا۔
اس حدیث میں یہ لفظ اپنے لغوی معنی ہی میں استعمال ہوا ہے۔
علمِ حدیث اور اصولِ حدیث میں سنت میں وہ تمام چیزیں شامل ہیں جو رسول اللہ صلی اللہ علیہ وسلم سے مروی ہیں، خواہ وہ آپ صلی اللہ علیہ وسلم کا ارشاد (قولی حدیث)
ہو یا آپ صلی اللہ علیہ وسلم کا عمل (فعلی حدیث)
یا ایسی چیز جو رسول اللہ صلی اللہ علیہ وسلم کی موجودگی میں کی گئی اور آپ صلی اللہ علیہ وسلم نے علم ہونے کے بعد اس سے منع نہیں فرمایا یا اس کی تردید نہیں فرمائی۔ (تقریری حدیث)
فقہاء سنت سے مراد وہ اچھا کام لیتے ہیں جو فرض و واجب نہ ہو، اسے مستحب بھی کہا جاتا ہے، نیز سنت کا لفظ بدعت کے مقابلے میں بھی بولا جاتا ہے، یعنی وہ عقیدہ و عمل جس کا وجوب، استحباب یا جواز شریعت سے ثابت ہو اور بدعت سے مراد وہ عمل ہے جسے ثواب سمجھ کر کیا جائے، حالانکہ شریعت میں اس کی کوئی اصل نہ ہو۔

(2)
اچھا طریقہ جاری کرنے کا مطلب یہ ہے کہ ایک اچھے کام کی ضرورت تھی اور کوئی اسے نہیں کر رہا تھا۔
یا کسی سنت پر عمل متروک ہو چکا تھا، اس نے شروع کیا تو اسے دیکھ کر دوسروں نے اس پر عمل کرنا شروع کر دیا۔
یا کسی مشروع کام کو فروغ دینے کے لیے نیا طریقہ اختیار کیا محض اپنی رائے سے کسی کام کو اچھا قرار دے کر ایجاد کرنا بدعت ہے جس پر ثواب کی بجائے گناہ ہو گا۔

(3)
برا طریقہ جاری کرنے کا مطلب یہ ہے کہ جو برائی پہلے کسی معاشرے میں موجود نہیں تھی، ایک آدمی نے وہ کام کیا، اسے دیکھ کر دوسرے بھی وہ کام کرنے لگے۔
ارشاد نبوی ہے:
جو جان بھی ظلم سے قتل کی جاتی ہے، اس کے خون ناحق کا ایک حصہ آدم علیہ السلام کے پہلے بیٹے (قابیل)
کے سر ہوتا ہے کیونکہ وہی پہلا شخص ہے جس نے قتل (ناحق)
کا طریقہ جاری کیا۔ (صحيح بخاري، الاعتصام، باب اثم من دعا الي ضلالة، حديث: 7321، وصحيح مسلم، القسامة، باب اثم من سن القتل، حدیث: 1677)

(4)
اس کی وضاحت اس پس منظر سے بھی ہوتی ہے، جس میں نبی کریم صلی اللہ علیہ وسلم نے یہ فرمایا:
واقعہ یوں ہے کہ قبیلہ بنو مضر کے افراد آپ صلی اللہ علیہ وسلم کی خدمت میں حاضر ہوئے جن کی ظاہری حالت قابل رحم تھی، انہیں مناسب لباس بھی دستیاب نہ تھا۔
اس موقع پر نبی کریم صلی اللہ علیہ وسلم نے صحابہ کرام رضی اللہ عنھم کو صدقہ دینے کی ترغیب دی، سب سے پہلے ایک انصاری صحابی درہم و دینار سے بھری ہوئی اتنی بھاری تھیلی لے کر حاضر ہوا کہ اس کے ہاتھ سے گری جا رہی تھی۔
اس کے بعد تو اتنی کثرت سے صدقات آئے کہ ایک طرف کھانے پینے کی چیزوں کا ڈھیر لگ گیا، دوسری طرف کپڑوں کا ڈھیر لگ گیا۔
اس موقع پر آپ صلی اللہ علیہ وسلم نے مذکورہ بالا ارشاد فرمایا:
(صحيح مسلم، الزكاة، باب الحث علي الصدقة ولو بشق تمرة او كلمة طيبة...الخ، حديث: 1016)

(5)
دعوت و تبلیغ کا کام کرنے والوں کو احتیاط سے کام لینا چاہیے تاکہ وہ ضعیف اور موضوع احادیث کو دیکھ کر کسی ایسے کام کی دعوت دینا شروع نہ کر دیں جو صحیح حدیث سے ثابت نہیں ہے ورنہ نہ صرف محنت ضائع ہو جائے گی بلکہ وہ بہت بڑے گناہ کا بوجھ اٹھا لیں گے۔

(6)
جب کسی کو گناہ کی طرف دعوت دی جاتی ہے تو شیطان عموماً یہ وسوسہ ڈالتا ہے کہ یہ گناہ کر لینے میں ہمارا کوئی نقصان نہیں، گناہ تو اس کو ہو گا جس نے ہمیں گناہ کی طرف بلایا ہے، یہ بہت بڑی غلط فہمی ہے۔
غلط کام کا ارتکاب کرنے والا اس کی ذمہ داری سے بچ نہیں سکتا، البتہ اسے گناہ کی طرف بلانے والے کا گناہ زیادہ شدید ہے، اس لیے وہ بھی اس مجرم کے جرم میں برابر کا شریک سمجھا جائے گا اور سزا کا مستحق ہو گا۔

(7)
اس حدیث میں نیکی کی تبلیغ کرنے والوں کے لیے بہت بڑی خوش خبری ہے۔
ایک آدمی کی محنت سے جتنے آدمی کسی نیکی کو اختیار کریں گے، ان کے ثواب کے برابر اس کے نامہ اعمال میں ثواب خود بخود درج ہوتا چلا جائے گا۔

(8)
ثواب اور گناہ، دعوت دینے والے کے حساب میں جمع ہونا خود بخود ہوتا ہے، اس میں عمل کرنے والے کے قصد یا نیت کا کوئی دخل نہیں، لہذا اس حدیث سے ایصال ثواب کے مروجہ تصور پر استدلال درست نہیں، ورنہ ایصال ثواب کی طرح ایصال گناہ کا تصور بھی تسلیم کرنا پڑے گا۔

اردو حاشہ:
وضاحت:
1؎:
اس حدیث سے معلوم ہوا کہ ہدایت یعنی ایمان،
توحید اور اتباع سنت کی طرف بلانے اور اسے پھیلانے کا اجر وثواب اتنا ہے کہ اسے اس کے اس عمل کا ثواب تو ملے گا ہی ساتھ ہی قیامت تک اس پر عمل کرنے والوں کے ثواب کے برابر مزید اسے ثواب سے نوازا جائے گا،
اسی طرح شروفساد اورقتل وغارت گری اور بدعات و خرافات کے ایجاد کرنے والوں کو اپنے اس کرتوت کا گناہ تو ملے گا ہی ساتھ ہی اس پر عمل کرنے والوں کے گناہ کا وبال بھی اس پر ہوگا۔

فائدہ:
معلوم ہوا جب کوئی اجتماعی نیکی کا کام شروع ہونے لگے تو سب سے پہلے شروع کرنے کی کوشش کرنی چاہیے کیونکہ اس سے بندہ بلا مشقت ایک عظیم اجر کا مستحق قرار پا جا تا ہے۔

حدیث حاشیہ:
فوائد ومسائل:
(1)
مسلمانوں کے فقر و فاقہ کی حالت دیکھ کر آپﷺ اتنہائی طور پر پریشان ہو گئے حتی کہ آپﷺ کے چہرے کا رنگ بدل گیا اور آپ پریشانی کے عالم میں کبھی گھر کے اندر جاتے اور کبھی باہر تشریف لاتے کہ ان کے تعاون اور مدد کی کوئی راہ نکلے اس کے لیے آپﷺ نے نماز کا وقت ہونے پر اذان کہلوا کر نماز کا اہتمام کیا۔
لوگ اکٹھے ہو گئے تو نماز پڑھا کر انہیں وحدت انسانی کا سبق دیا،
آخرت کی فکر اور احساس اجاگر کیا،
اور پھر صدقہ کی تلقین کی مسلمانوں نے اپنے دینی بھائیوں کی مدد واعانت میں کسی قسم کی کوتاہی اور سستی روانہ رکھی بلکہ فوراً لوگ اپنے گھروں سے کھانے کی اشیاء اور کپڑے لانے لگے۔
حتی کہ کھانے اور کپڑے کے دو بڑے ڈھیر جمع ہو گئے مسلمانوں کی ہمدردی اور خیر خواہی کا جذبہ اور تعاون واعانت کی صورت دیکھ کر مسرت وشادمانی سے آپﷺ کا چہرہ لہلہا اٹھا اورجگ مگ کرنے لگا۔
اسلام مسلمانوں کے دلوں میں ایک دوسرے کے لیے یہی جذبہ خیر خواہی اور ہمدردی پیدا کرنا چاہتا ہے۔
(2)
بعض واجب الاحترام واور قابل قدر علماء نے اس حدیث سے (كل بدعة ضلالة)
کے عموم میں تخصیص پیدا کی ہے جیسا کہ علامہ نووی رحمۃ اللہ علیہ نے لکھا ہے کہ (كل بدعة ضلالة)
میں بدعت سے مراد محدثات باطلہ اور بدعات مذمومہ ہیں اور اس کو بنیاد بنا کر بعض لوگوں نے حاشیہ آرائی کی ہے حالانکہ اس حدیث میں بدعت کا لفظ ہی نہیں ہے بلکہ (سَنَّ سُنَّةً)
کا لفظ ہے اور سنۃ اس راستہ کو کہتے ہیں جس پر لوگوں کی آمدورفت ہو یعنی وہ ڈگریا راہ عمل جو پہلے سے موجود ہے۔
جیسا کہ اس حدیث میں تھیلی لانے والے صحابی نے کوئی نیا کام نہیں کیا تھا۔
صرف صدقہ کرنے میں پہل کی تھی اس اعتبار سے وہ بارش کا پہلا قطرہ بنے گویا کتاب وسنت سےثابت شدہ عمل کو اختیار کرنے میں پہل کی،
اسی طرح جو انسان کتاب و سنت کی روسے ممنوع عمل کو اختیار کرنے میں پہل کرے گا۔
وہ سب کے گناہ میں شریک ہو گا اس طرح کتاب و سنت سے ثابت شدہ عمل اگر کہیں متروک ہو چکا ہو تو اس جگہ جو شخص اس کو رواج دے گا وہ اس پر عمل کرنے والوں لوگوں کے اجرو ثواب کا حقدار ہو گا۔
اگر کسی گاؤں یا علاقہ میں غلط کام نہیں ہو رہا مثلاً کہیں ٹی وی،
یاوی سی آر،
موجود نہیں ہے جو سب سے پہلے لائے گا وہ بعد والوں کے جرم میں شریک ہو گا اب اگر کوئی صاحب علم کتاب لکھتا ہے اور اس کا مقصد دین کی اشاعت و تبلیغ یا کتاب و سنت کی تفہیم ہے جس کا آپﷺ نے حکم دیا ہے لیکن اس کی کوئی شکل و صورت متعین نہیں فرمائی کہ صرف طریقہ اور فلاں شکل میں دین اور کتاب و سنت کی اشاعت کرنا اس لیے اس کے بارے میں یہ کہنا کہ یہ (مالم يرد به السنة)
ہے جس کا سنت میں ذکر نہیں ہے محض سینہ زوری ہے اور غلط سوچ ہے فلاں فلاں امام یا عالم کے بدعت کی قسمیں بنانے سے یہ قسمیں صحیح نہیں ہو جائیں گی،
جبکہ آپ کی صحیح حدیث ہے (كل بدعة ضلالة)
اور علماء کا ایک گروہ اس کا صحیح مفہوم اس کے عموم کی صورت میں ہی بیان کرتا ہے اور تقسیم کو غلط قرار دیتا ہے جیسا کہ علمائے احناف میں سے شیخ احمد سرہندی نے ایسے ہی کیا ہے اور ہم مناسب موقع پر ان کی عبارت نقل کریں گے خلاصہ کلام یہ ہے کہ جو سنتیں اور مستحبات ایسے جن کی طرف لوگوں کی التفات و توجہ نہیں ہے۔
یا اس پر لوگوں نے عمل چھوڑ دیا ہے یا کسی مخصوص موقعہ اور وقت نیک کام میں جو پہل کرتا ہے اور آگے بڑھ کر اس کا آغاز کرتا ہےوہ (مَنْ سَنَّ سُنَّةً حَسَنَةً)
کا مصداق ہے اور جو انسان کسی ناجائز یا حرام چیز کی ترویج کرتا ہے یا کسی خاص موقعہ اور وقت پر اس میں پہل کرتا ہے اور اس کے کرنے میں آگے ہوتا ہے دوسرے وہ کام بعد میں اس کو دیکھ کر کرتے ہیں وہ (مَنْ سَنَّ سُنَّة سَيِّئَة)
کا مصداق ہے۔
اور جو کام دینی ضرورت اور دینی کے تقاضا کے تحت شروع کیے گئے ہیں اور ان کی شکل و صورت متعین اور مخصوص نہیں ہے۔
ان میں وقت وحالات کی تبدیلی ہو سکتی ہے۔
ان سے بدعت کے جواز پر استدلال کرنا جبکہ اس میں یعنی بدعت میں تو ایک شکل و صورت مخصوص اور متعین کردی جاتی ہے درست نہیں ہے۔

حدیث حاشیہ:
فوائد ومسائل:
اس حدیث سے ثابت ہوا،
ایک نیک عمل اور اچھے کام پر جو سب سے پہلے عمل کرتا ہے اور دوسروں کے لیے اس پر عمل کرنے کا نمونہ پیش کرتا ہے،
یا ان کے لیے تحریک کا باعث بنتا ہے تو اس کے بعد اس کی دیکھا دیکھی،
عمل کرنے والوں کی طرح اس کو بھی ثواب ملے گا،
لیکن اس کا خیر اور صالح عمل ہونا،
قرآن و سنت سے ثابت ہونا ضروری ہے،
جیسا کہ یہاں صدقہ ایک اچھا اور نیک عمل تھا،
لوگوں نے اس پر عمل کرنے میں تاخیر کر دی،
جب ایک صحابی نے اس کا آغاز کر دیا تو دوسروں میں بھی اس کا داعیہ پیدا ہو گیا اور صدقہ لانے والوں کا تانتا بندھ گیا،
اس پر آپ نے یہ بات فرمائی،
اس لیے اس حدیث کو بنیاد بنا کر اپنی طرف سے کوئی عمل ایجاد کر لینا،
جبکہ قرآن و سنت میں اس کا وجود نہیں ہے،
وہ اس حدیث کا مصداق نہیں ہے،
بلکہ دوسری حدیث کا مصداق ہے،
جس میں آپ نے فرمایا ہے،
" من عمل عملا ليس عليه عملنا فهو رد " جس نے ایسا کام کیا،
جو ہم نے نہیں کیا،
وہ مردود ہے،
اس لیے،
اس حدیث کی آڑ میں میلاد،
عرس،
سوئم اور چہلم وغیرہ کو سند جواز دینا،
حدیث کے مفہوم سے بے خبری کی دلیل ہے۔
اس حدیث کی مزید وضاحت حضرت ابو ہریرہ رضی اللہ عنہ کی آگے آنے والی حدیث کو رہی ہے۔