اردو حاشہ:
فوائد و مسائل:
(1)
اس نماز کو تحیۃ المسجد کہا جاتا ہے۔

(2)
مسجد میں داخل ہوکر بیٹھنے سے پہلے اگر کوئی اور نماز مثلاً سنت یا فرض پڑھ لیں۔
تو تحیۃ المسجد بھی ادا ہوجاتی ہے۔
الگ سےپڑھنے کی ضرورت نہیں۔

(3)
بعض علماء مکروہ اوقات میں بھی تحیۃ المسجد پڑھنے کے قائل ہیں۔
ان کی دلیل حدیث کا عموم ہے۔
کہ جب کوئی شخص مسجد میں داخل ہو تو دو رکعت پڑھے۔
اس عموم میں کراہت کے اوقات بھی داخل ہیں۔
نبی کریم ﷺنے کسی وقت کا استثناء نہیں کیا۔
جب کہ دوسرے علماء اس عموم میں کراہت کے اوقات کوداخل نہیں کرتے۔
اس لئے ان کے نزدیک اوقات کراہت میں دیگر نفلی نمازوں کے علاوہ تحیۃ المسجد کی دو رکعتیں پڑھنا بھی جائز نہیں۔
ایک تیسری رائے یہ ہےکہ پڑھنے کا جواز ہے لیکن بچنا بہتر ہے واللہ أعلم۔

تخریج الحدیث:
[وأخرجه البخاري 444، ومسلم 714، من حديث مالك به]

تفقه:
➊ مسجد میں داخل ہونے کے بعد بیٹھنے سے پہلے دو رکعتیں پڑھنا مستحب ہے۔
➋ سیدنا کعب بن مالک رضی اللہ عنہ مسجد نبوی میں داخل ہو کر رسول الله صلی اللہ علیہ وسلم کے سامنے بیٹھ گئے۔ اس حدیث سے امام نسائی رحمہ اللہ نے استدلال کیا ہے کہ دو رکعتیں پڑھے بغیر بیٹھنا جائز ہے۔ دیکھئے [سنن النسائي ج2 ص53-55 ح732 وسنده صحيح، وهو متفق عليه]
➌ عمر بن عبید اللہ بن معمر التمیمی دو رکعتیں پڑھے بغیر مسجد میں بیٹھ جاتے تھے تو اس پر ابوسلمہ بن عبد الرحمن بن عوف رحمہ اللہ اعتراض کرتے تھے۔ اس روایت کے آخر میں امام مالک رحمہ اللہ نے فرمایا: «و ذالك حسن و ليس بواجب» اور یہ (دو رکعتیں پڑھنا) مستحب ہے اور واجب نہیں ہے۔ [المؤطا 162/1 ح 388 و سنده صحيح]
◄ ابوحفص عمر بن عبیداللہ بن معمر رحمہ اللہ کو حافظ ابن حبان نے کتاب الثقات میں ذکر کیا ہے۔ حافظ ابن عساکر نے کہا: «أحد وجوه قريش وكرمائها، كان جوادًا ممدحًا وولي فتوحًا كثيرة وولي البصرة لعبدالله بن الزبير» [تاريخ دمشق 48/190]

731 ۔ اردو حاشیہ:
➊ ان دو رکعتوں کی مشروعیت واضح ہے۔ اس نماز کو تحیۃ المسجد کہتے ہیں۔ چونکہ مسجد نماز کے لیے بنائی گئی ہے، لہٰذا مسجد میں آنے والا شخص سب سے پہلے نماز پڑھے۔ اوقات مکروہہ میں داخل ہو تو امام شافعی رحمہ اللہ پھر بھی دو رکعت پڑھنا جائز سمجھتے ہیں۔ وہ صلاۃ سبی (جس نماز کا کوئی خاص سبب ہو) کو اوقات مکروہہ میں جائز سمجھتے ہیں۔ مطلق نفل منع ہیں، محدثین کی اکثریت یہی رائے رکھتی ہے جب کہ علمائے احناف مطلق نہی کے پیش نظر ہر قسم کی نفل نماز کو ان اوقات میں منع سمجھتے ہیں۔ ظاہر الفاظ ان کی تائید کرتے ہیں مگر امام شافعی رحمہ اللہ کے قول پر عمل کرنے سے تمام احادیث قابل عمل ٹھہرتی ہیں اور مختلف روایات میں واقع تعارض اور اختلاف بھی ختم ہو جاتا ہے۔ واللہ أعلم۔
➋ ”بیٹھنے سے پہلے“ اس کا مطلب یہ نہیں کہ بیٹھنے کے بعد نہ پڑھے بلکہ اصل مقصد یہ ہے کہ داخل ہوتے ہی پڑھے۔ چونکہ مقصد یہ ہے کہ مسجد میں آکر نماز پڑھے، لہٰذا کوئی ضروری نہیں کہ مخصوص نفل ہی پڑھے بلکہ فرض، سنت، نفل جو بھی پڑھ لے کر کفایت ہو جائے گی۔ رسول اللہ صلی اللہ علیہ وسلم جماعت کے وقت مسجد میں تشریف لاتے تھے۔ کہیں منقول نہیں کہ آپ صلی اللہ علیہ وسلم نے الگ تحیۃ المسسجد پڑھے ہوں۔

209 فوائد و مسائل:
➊ حدیث میں جن نوافل کے پڑھنے کا حکم ہے انھیں «تحية المسجد» کہتے ہیں۔
➋ بعض علماء کے نزدیک یہ واجب ہیں جبکہ جمہور علماء انہیں مستحب کہتے ہیں۔
➌ حدیث کے ظاہر الفاظ کو سامنے رکھتے ہوئے بعض علماء نے ان نوافل کو مکروہ اوقات میں پڑھنے کی بھی اجازت دی ہے لیکن بعض علماء اوقات ممنوعہ میں ممنوع کہتے ہیں۔
➍ اس سے یہ بھی ثابت ہوتا ہے کہ خطیب منبر پر خطبہ دے رہا ہو تب بھی مسجد میں داخل ہونے والا دو رکعت پڑھ کر بیٹھے۔

فائدہ:
اس حدیث سے ثابت ہوا کہ مسجد کے آداب میں سے ہے کہ جب کوئی شخص مسجد میں جائے تو دورکعت نماز پڑھے بغیر نہ بیٹھے، اور یہ حکم وجوبی نہیں ہے، بلکہ استحباب پر محمول ہے، اس کی دلیل سیدنا کعب بن مالک رضی اللہ عنہ کی حدیث ہے جو صحيح البخاری (2 / 636) میں ہے۔ اس حدیث سے معلوم ہوا کہ تحیۃ المسجد ضروری نہیں ہے، اگر یہ ضروری ہوتی تو رسول اللہ صلی اللہ علیہ وسلم سیدنا کعب رضی اللہ عنہ کو تحیۃ المسجد پڑھنے کا ضرور حکم دیتے۔
نیل الاوطار (3 / 68) میں ہے کہ تحیۃ المسجد ادا کرنا سنت ہے، واجب نہیں ہے، جیسا کہ بعض کا خیال ہے، اس کے سنت ہونے پر امام نووی رحمہ اللہ نے اجماع نقل کیا ہے۔ امام نووی رحمہ اللہ نے حدیث قتادہ پر تحیۃ المسجد کے نفلی نماز ہونے کا باب قائم کیا ہے۔ (صحیح مسلم: 1 / 248)
ابن بطال نے بھی کہا: ہے کہ ائمۃ الفتوی نے اس باب پراتفاق کیا ہے کہ صیغہ امر «فليركع ركعتين» استحباب پر محمول ہے۔ [فتـــح البــــــاري: 1/ 537]
نیز امام نسائی رحمہ اللہ نے بھی سیدنا کعب بن مالک رضی اللہ عنہ کے واقعے سے استدلال کیا ہے کہ تحیۃ المسجد مستحب ہے، اس حدیث میں بھی ہے کہ میں مسجد میں آیا تو آپ صلی اللہ علیہ وسلم نے فرمایا: آؤ، تو میں آپ صلی اللہ علیہ وسلم کے سامنے بیٹھ گیا۔ [سـنـن الـنـسـائـي بـاب الـرخصة فى الجلوس فيه والخروج منه بغير صلاة: 54 حديث: 732]
تحیۃ المسجد کی تعریف: یہ دو رکعات نماز ہے، جس کو نمازی مسجد میں داخل ہوتے وقت ادا کرتا ہے، اور یہ نماز مسجد میں داخل ہونے والے ہر شخص کے حق میں بالاجماع سنت ہے۔ [فتح البــاري: 407/2]
تحیۃ المسجد کے متعلق چند اہم مسائل درج ذیل ہیں:
① مسجد حرام کا تحیۃ المسجد اہل علم کے نزدیک طواف ہے، امام نووی رحمہ اللہ فرماتے ہیں: «تحية الـمـسـجـد الـحـرام الطواف فى حق القادم أما المقيم فحكم المسجد الحرام وغيره فى ذلك سواء» باہر سے آنے والے کے لیے مسجد حرام کا تحیہ طواف ہے، جبکہ مقیم کے لیے مسجد حرام اور باقی مسجد سب کا ایک ہی حکم ہے۔ [فتح الباري: 2/ 412]
② نمازوں سے پہلے کی سنتیں اور نوافل تحیۃ المسجد سے کفایت کر جائیں گی، اس مسئلے کی توضیح کرتے ہوئے محدث زماں حافظ عبدالمنان نور پوری رحمہ اللہ لکھتے ہیں تحیۃ الوضو اور تحیۃ المسجد دونوں نماز میں مستقل نہیں ہیں۔ دوسری کسی فرض یا غیر فرض نماز کے ضمن میں بھی ادا ہو جاتی ہیں، بسا اوقات آدمی رکعات صرف دو پڑھتا ہے مگر وہ چار نمازوں کا کام دے جاتی ہے، مثلاً ایک شخص مسجد میں پہنچا، فجر کی اذان ہو رہی تھی، اس نے وضو کیا، پھر فجر کی دوسنتیں ادا کیں، پھر اس کے بعد دعا استخارہ پڑھی تو اس شخص نے دو رکعت سنت فجر ادا کی، مگر اس کے ضمن میں تین نمازیں اور ادا ہوں گئیں، ایک تحیۃ الوضو، دوسری تحیۃ المسجد، اور تیسری صلاۃ استخارہ، تو اس طرح یہ دو رکعات چار نمازوں کا کام دے رہی ہیں۔ [احكام ومسائل:164/2]
اسی طرح اگر کوئی فرض نماز کا وقت ہو جانے کی وجہ سے فرض نماز کے ساتھ تحیۃ المسجد سے کفایت کرنا چا ہے، تو اس کو یہی کافی ہو جائے گی۔
③ اس حدیث میں عموم ہے، اس میں امام اور مقتدی سب شامل ہیں، جب بھی امام یا مقتدی مسجد میں بیٹھنے کا ارادہ کرے تو پہلے تحیۃ المسجد ادا کرے۔

حدیث حاشیہ:
فوائد ومسائل:
(1)
مسجد کو اللہ تعالیٰ سے خصوصی نسبت ہے جس کی بنا پر اسے بیت اللہ (اللہ کا گھر)
کا نام دیا جاتا ہے اس لیے اس کے حقوق اور اس میں داخلے کے آداب اور اس کی تعظیم و تکریم کا یہ بھی تقاضا ہے کہ انسان اس میں بیٹھنے سے پہلے دو رکعت ادا کرے یہ گویا بارگاہ الٰہی کی سلامی ہے اس لیے اس کو تَحِیَّةُ الْمَسْجِدِ کا نام دیا جاتا ہے جمہور آئمہ کے نزدیک چونکہ یہ عمل مسجد کے ادب و تعظیم کے تقاضا سے ہے اس لیے استحبابی عمل ہے لیکن ظاہریہ کے نزدیک یہ فرض ہے واضح رہے کہ مسجد میں داخل ہونے کے بعد فرض سنت یا نفل نماز پڑھ لینے سے تَحِیَّةُ الْمَسْجِد کا حق ادا ہو جاتا ہے کیونکہ اس سے مقصود مسجد کی تعظیم و تکریم ہے جو حاصل ہو گئی ہے۔
(2)
اوقات نھی میں سببی نماز پڑھنے کے بارے میں اختلاف ہے،
امام ابو حنیفہ،
امام مالک رحمۃ اللہ علیہ،
اور ایک قول کی رو سے امام احمد رحمۃ اللہ علیہ اوقات نھی میں کسی نماز کو سببی ہو یا غیر سببی جائز نہیں سمجھتے۔
لیکن امام شافعی رحمۃ اللہ علیہ اور ایک قول کی رو سے جسے حافظ ابن تیمیہ رحمۃ اللہ علیہ نے اختیار کیا ہے،
امام احمد رحمۃ اللہ علیہ سببی نماز کو اوقات نھی میں جائز قرار دیتے ہیں کیونکہ:
(إِذَا دَخَلَ أَحَدُكُمْ الْمَسْجِدَ)
عام ہے اور نھی کا تعلق مطلق نماز سے ہے یعنی جس کا سبب نہ ہو اس لیے صبح اور عصر کی نماز امام کے ساتھ دوبارہ پڑھنا جائز ہے عصر کے بعد نماز جنازہ پڑھنا اور طواف کی رکعات پڑھنا جائز ہے،
جس سے ثابت ہوتا ہے اوقات نھی میں سببی نماز پڑھنا صحیح ہے لیکن بلا ضرورت سبب پیدا نہیں کرنا چاہیے۔
(3)
مسجد میں داخلہ کے آداب و حقوق میں سے یہ بھی ہے کہ انسان با وضو ہو کر داخل ہوتا کہ بیٹھنے سے پہلے تَحِیَّةُ الْمَسْجِد پڑھ سکے۔
تَحِیَّةُ الْمَسْجِد بیٹھنے سے پہلے اگر بھول کر بیٹھ جائے تو کھڑا ہو کر پڑھ لے۔
(4)
جب سورج طلوع ہو رہا ہو یا زوال ہو رہا ہو یا سورج غروب ہو رہا ہو تو پھر طلوع اور غروب اور استوا کا انتظار کرنا چاہیے کیونکہ ان اوقات کے بارے میں خصوصی طور پر نہی وارد ہے۔
(5)
مسجد حرام کا تَحِیَّةُ الطَّوَاف ہے اگر کسی وجہ سے یہ ممکن نہ ہو تو پھر کم ازکم دو رکعتیں ہی پڑھ لے۔

حدیث حاشیہ:
1۔
اس حدیث کا پس منظر اس طرح ہے کہ ایک دفعہ حضرت ابوقتادہ رضی اللہ تعالیٰ عنہ مسجد میں آئے تو رسول اللہ صلی اللہ علیہ وسلم اپنے صحابہ کرام رضوان اللہ عنھم اجمعین کے ساتھ بیٹھے ہوئے تھے ابوقتادہ رضی اللہ تعالیٰ عنہ بھی ان کے ساتھ بیٹھ گئے۔
رسول اللہ صلی اللہ علیہ وسلم نے ابوقتادہ رضی اللہ تعالیٰ عنہ سے فرمایا:
\"تجھے بیٹھنے سے قبل دورکعت پڑھنے میں کیا رکاوٹ تھی؟\"عرض کیا:
میں نے آپ کو اور دیگرلوگوں کو بیٹھے ہوئے دیکھا،اس بناپر میں بھی بیٹھ گیا۔
اس کے بعد رسول اللہ صلی اللہ علیہ وسلم نے فرمایا:
\"جب تم میں سے کوئی مسجد میں داخل ہو تو بیٹھنے سے پہلے دورکعت ضرور پڑھے۔
(صحیح مسلم صلاۃ المسافرین حدیث 1654(714)
مصنف ابن ابی شیبہ(245/2)
میں ہے کہ آپ نے فرمایا:
\"مساجد کو ان کا حق دو۔
\"عرض کیا گیا:
ان کاحق کیا ہے؟ آپ نےفرمایا:
\"بیٹھنے سے پہلے دورکعت ادا کرنا۔
\"(فتح الباری 696/1۔
)
2۔
حافظ ابن حجر رحمۃ اللہ علیہ فرماتے ہیں:
ائمہ فتویٰ کا اس بات پر اتفاق ہے کہ مذکورہ روایت میں امر نبوی استحباب پر محمول ہے کیونکہ رسول اللہ صلی اللہ علیہ وسلم نے ایک شخص کو دیکھا کہ وہ مسجد میں لوگوں کی گردنیں پھلانگ کر آگے جارہا تھا تو آ پ نے اس سے فرمایا:
\"بیٹھ جا،تو نےدوسروں کو اذیت پہنچائی ہے۔
\"آپ نے اسے تحیۃ المسجد پڑھنے کا حکم نہیں دیا۔
اس سے معلوم ہوا کہ امرنبوی وجوب کے لیے نہیں بلکہ استحباب کے لیے ہے۔
بعض لوگوں کا خیال ہے کہ اگر کوئی دورکعت پڑھنے سے قبل بیٹھ جائے تو اس کی تلافی ضروری نہیں کیونکہ ان کا وقت فوت ہوگیا ہے۔
لیکن صحیح موقف یہ ہے کہ بیٹھنے سے تحیۃ المسجد فوت نہیں ہوجاتا کیونکہ ایک دفعہ حضرت ابوزر رضی اللہ تعالیٰ عنہ مسجد میں داخل ہوئے تو ان سے رسول اللہ صلی اللہ علیہ وسلم نے فرمایا:
\"تم نے دورکعت نماز پڑھ لی ہے؟\"عرض کیا:
نہیں۔
آپ نے فرمایا:
\"کھڑے ہوجاؤ اور دورکعت نماز پڑھو۔
\"اس حدیث پر امام ابن حبان رحمۃ اللہ علیہ نے بایں الفاظ عنوان قائم کیا ہے:
\"تحیۃ المسجد،ادائیگی سے قبل بیٹھ جانے سے فوت نہیں ہوتا۔
\"محب طبری نے کہا کہ بیٹھنے سے پہلے ادا کرنا وقت ِ فضیلت ہے اور بیٹھنے کے بعد اداکرنا وقت جواز۔
بعض نے یہ کہا ہے کہ بیٹھنے سے پہلے ادا کا وقت ہے اور اس کے بعد وقت قضا۔
(فتح الباری 696/1۔
)
واللہ اعلم۔
3۔
اوقات ممنوع میں سببی نماز ادا کی جاسکتی ہے لیکن مطلق نوافل ادا کرنے پر پابندی ہے کیونکہ رسول اللہ صلی اللہ علیہ وسلم نے دوران خطبہ میں آکر بیٹھنے والے شخص کو دورکعت ادا کرنے کا حکم دیاتھا۔
(صحیح البخاری الجمعۃ حدیث 930۔
)
حالانکہ خطبے کو خاموشی سے سننے کا حکم ہے۔
دراصل اوقات ممنوعہ میں ادائیگی نماز کے متعلق احناف اور شوافع کا اختلاف ہے۔
احناف اور روایت نہی کے عموم کے پیش نظر کہتے ہیں کہ ان اوقات میں تحیۃ المسجد کی بھی اجازت نہیں لیکن شوافع اس نہی کو عموم پر محمول نہیں کرتے بلکہ ان کے نزدیک امر نبوی کے عموم کے پیش نظر اوقات ممنوعہ میں بھی تحیۃ المسجد ادا کرنا چاہیے۔
وہ کہتے ہیں کہ جن نمازوں اور نوافل کے اسباب معلوم ہیں۔
ان کے متعلق کوئی ممنوعہ میں بھی تحیۃ المسجد ادا کرنا چاہیے۔
وہ کہتے ہیں کہ جن نمازوں اور نوافل کے اسباب معلوم ہیں۔
ان کے متعلق کوئی ممنوعہ وقت نہیں۔
تحیۃ المسجد کا سبب مسجد میں داخل ہونا ہے،لہذا اس سبب کے ہوتے ہوئے کسی وقت کی پابندی یا قید نہیں۔
(فتح الباری 696/1۔
)
مختصر یہ ہے کہ اگر کوئی تحیۃ المسجد پڑھے بغیر بیٹھ جائے تو اس سے تحیۃ المسجد ساقط نہیں ہوگا بلکہ اٹھ کر اسے ادا کرنا ہوگا اور اس کی ادائیگی کے لیے کوئی وقت ممنوع نہیں کیونکہ اس کا تعلق سببی نماز سے ہے۔ w