ابن جریج بیان کرتے ہیں کہ مجھے عطاء رحمہ اللہ نے سیّدنا ابن عباس رضی اللہ عنہماکے حوالے سے بتایا کہ انہوں نے کہا عمرہ کرنے والا صرف بیت اللہ کے طواف سے حلال ہو سکتا ہے (ابن جریج کہتے ہیں کہ) میں نے عطاء سے پوچھا کہ ابن عباس نے یہ مسئلہ کہاں سے نکالا؟ انہوں نے بتایا کہ اللہ تعالیٰ کے ارشاد محلہا الی البیت العتیق (الحج۳۳) سے اور نبی کریم صلی اللہ علیہ وسلم کے اس حکم کی وجہ سے جو آپ نے اپنے اصحاب کو حجتہ الوداع میں احرام کھول دینے کے لئے دیا تھا میں نے کہا کہ یہ حکم تو عرفات میں ٹھہرنے کے بعد کے لئے ہے حضرت عطاء نے کہا لیکن ابن عباس کا یہ مذہب تھا کہ عرفات میں ٹھہرنے سے پہلے اور بعد ہر حال میں جب طواف کرے تو احرام کھول ڈالنا درست ہے (الحج۳۳)(پھر ان کا حلال ہونا پرانے گھر یعنی خانہ کعبہ کے پاس ہے) [اللؤلؤ والمرجان/كتاب الحج/حدیث: 779]