فوائد:
مذکورہ بالا حدیث سے معلوم ہوا وصال جائز نہیں ہے، وصال سے مراد یہ ہے کہ آدمی ارادی طور پر دو یا اس سے زیادہ دن تک روزہ افطار نہ کرے اور مسلسل روزہ رکھے، نہ رات کو کچھ کھائے اور نہ سحری کے وقت۔ (مزید دیکھئے: النهایة فی غریب الاحادیث والاثر)
جمہور اہل علم نے اسے نبی مکرم صلی اللہ علیہ وسلم کی خصوصیت قرار دیا ہے۔ امام شافعی، امام ابوحنیفہ، امام مالکs نے اسے مکروہ کہا ہے۔ امام احمد رحمہ اللہ نے کہا ہے کہ اس کو سحری تک کرنا جائز ہے۔ علامہ ابن قیم رحمہ اللہ نے امام احمد رحمہ اللہ کے موقف کو سب سے زیادہ صحیح کہا ہے۔ (توضیح الاحکام: 3؍ 481)
اور امام احمد رحمہ اللہ اپنے موقف میں یہ روایت پیش کرتے ہیں کہ سیدنا ابو سعید رضی اللہ عنہ سے مروی ہے، آپ صلی اللہ علیہ وسلم نے فرمایا: ”وصال نہ کرو اور اگر تم میں سے کوئی وصال کرنا ہی چاہے تو سحری تک کرے۔“ (بخاري، رقم: 1967)
مولانا داود راز رحمہ اللہ فرماتے ہیں: درحقیقت یہ طے کا روزہ نہیں کہ دن کی طرح ساری رات نہ کچھ کھائے نہ پیئے۔ (شرح بخاری: 3؍ 216 مطبوعہ مکتبہ قدوسیہ)
مذکورہ بالا روایت میں ہے کہ میرا رب مجھے کھلاتا اور پلاتا ہے۔ مذکورہ فرمان رسول صلی اللہ علیہ وسلم کی کئی توجیہات ہیں۔ ان میں سے زیادہ معروف اور اقرب الی السنۃ مندرجہ ذیل ہیں:
(1).... اللہ تعالیٰ اپنے نبی صلی اللہ علیہ وسلم کی طاقت وقوت کو ایسے رواں رکھتا جیسے کھانے، پینے کی حالت میں رکھتا ہے۔ مزید یہ کہ رسول اللہ صلی اللہ علیہ وسلم کے یہ الفاظ مبارک بھی اس بات پر کھلی دلالت کر رہے ہیں کہ اس سے مقصود قوت اکل وشرب ہے۔ ابن حجر رحمہ اللہ فرماتے ہیں کہ جمہور علماء کی یہی رائے ہے۔ (فتح الباري: 4؍ 207)
(2).... رسول اللہ صلی اللہ علیہ وسلم کے اس فرمان سے مقصود یہ ہے کہ اللہ تعالیٰ مجھے اپنی عظمت فکر اور جملہ معارف میں اتنا مشغول و مصروف کر دیتا ہے کہ مجھے کوئی چیز کھانے پینے کا خیال و تصور تک نہیں رہتا، اس پر علامہ ابن قیم رحمہ اللہ فرماتے ہیں: یہ ایک ایسی خوراک ہے جو انسانی بدن کی جملہ خوراک سے انتہائی عمدہ اور بہتر ہے اور جس صاحب کو ادنیٰ درجہ ذوق اور تجربہ حاصل ہو تو وہ اس بات سے لا علم نہیں کہ دلی اور روحانی خوراک کی وجہ سے انسانی بدن کو جسمانی خوراک کی ضرورت نہیں رہتی۔ (دیکھئے عمدة القاری: 4؍ 207)
تم میری مثل نہیں ہو، مطلب یہ ہے کہ میرا اللہ ذوالجلال کے ساتھ جو تعلق ہے اس طرح کا تعلق تمہارا نہیں ہے اس تعلق کی وجہ سے اللہ ذوالجلال میرے اندر کھانے پینے کے بغیر ہی قوت پیدا کر دیتا ہے جو تمہیں کھانے کے بغیر حاصل نہیں ہوتی۔