� لغوی تشریح:
«إِذَا قَامَ إِلَى الصَّلَاةِ» جب نماز کے لئے کھڑے ہوتے، سے مراد ہے تکبیر تحریمہ کے بعد دعائے افتتاح یا دعائے استفتاح کے طور پر پڑھتے۔
«وَجَّهْتُ» توجیہ سے ماخوذ ہے۔ میں نے چہرہ پھیر لیا۔
«فَطَرَ» خلق کے معنی میں ہے، یعنی پیدا کیا۔
«مِنَ الْمُسْلِمِين» تک۔ اس بارے میں دو روایتیں مروی ہیں۔ ایک روایت میں: «أَنَا أَوَّلُ الْمُسْلِمِيْنَ» ہے۔ ”میں پہلا مسلمان (مطیع فرمان بندہ) ہوں۔“ یہ آیت قرآنی میں مذکور لفظ کا لحاظ رکھتے ہوئے ہے۔ اور دوسرا: «أَنَا مِنَ الْمُسْلِمِيْنَ» معنی کا لحاظ رکھتے ہوئے ہے۔ مصنف نے اسی جانب اشارہ کیا ہے۔ مکمل آیات اس طرح ہیں: پہلی آیت ہے: «إِنِّي وَجَّهْتُ وَجْهِيَ لِلَّذِيْ فَطَرَ السَّمَاوَاتِ وَالْأَرْضَ حَنِيفًا وَمَا أَنَا مِنَ الْمُشْرِكِيْنَ» [الأنعام 6: 79] اور دوسری آیت ہے: «إِنَّ صَلَاتِيْ وَنُسُكِيْ وَمَحْيَايَ وَمَمَاتِيْ لِلَّهِ رَبِّ الْعَالَمِيْنَ * لَا شَرِيْكَ لَهُ وَبِذٰلِكَ أُمِرْتُ وَأَنَا أَوَّلُ الْمُسْلِمِيْنَ» [الأنعام 6: 162۔ 163] ”میں نے اپنا رُخ اس ذاتِ اقدس کی جانب کر لیا جو آسمانوں اور زمین کی خالق ہے، یکسو ہو کر، اور میں مشرکین میں سے نہیں ہوں۔ یقیناًً میری نماز، میری ہر عبادت، میرا جینا اور میرا مرنا (سب کچھ) اسی اللہ کے لیے ہے جو تمام جہانوں کا مالک وپروردگار ہے۔ اس کا کوئی شریک نہیں (ذات وصفات اور حقوق واختیارات میں۔) اسی کا مجھے حکم دیا گیا ہے اور میں مطیع فرمان بندوں میں سے ہوں۔“ ان آیات کو پڑھنے کے بعد آپ «اَللّٰهُمَّ! أَنْتَ الْمَلِكُ . . .» إلخ دعا پڑھتے۔
«إِلٰي آخِرِهٖ» یعنی اس معروف دعا کو آخر تک پڑھتے:
«اَللّٰهُمَّ! أَنْتَ الْمَلِكُ لَا إِلٰهَ إِلَّا أَنْتَ، أَنْتَ رَبِّي وَأَنَا عَبْدُكَ، ظَلَمْتُ نَفْسِي وَاعْتَرَفْتُ بِذَنْبِي فَاغْفِرْلِي ذُنُوبِي جَمِيعًا، إِنَّهُ لَا يَغْفِرُ الذُّنُوبَ إِلَّا أَنْتَ، وَاهْدِنِي لِأَحْسَنِ الْأَخْلَاقِ، لَا يَهْدِي لِأَحْسَنِهَا إِلَّا أَنْتَ، وَاصْرِفْ عَنِّي سَيِّئَهَا، لَا يَصْرِفُ عَنِّي سَيِّئَهَا إِلَّا أَنْتَ، لَبَّيْكَ، وَسَعْدَيْكَ وَالْخَيْرُ كُلُّهُ فِي يَدَيْكَ، وَالشَّرُّ لَيْسَ إِلَيْكَ أَنَا بِكَ وَإِلَيْكَ، تَبَارَكْتَ وَتَعَالَيْتَ، أَسْتَغْفِرُكَ وَأَتُوبُ إِلَيْكَ»
”اے اللہ! تو ہی بادشاہ ہے، تیرے سوا کوئی آقا و مالک نہیں۔ تو ہی میرا آقا و پروردگار ہے اور میں تیرا بندہ و غلام ہوں۔ میں نے (یقیناًً) اپنی جان پر ظلم کیا اور میں نے اپنے گناہ کا اعتراف کیا، لہٰذا میرے سارے گناہ بخش دے۔ حقیقت بھی یہی ہے کہ تیرے سوا کوئی اور گناہ بخش نہیں سکتا۔ میری عمدہ اور اچھے اخلاق کی طرف رہنمائی فرما، تیرے سوا بہترین اخلاق کی راہ کوئی دوسرا نہیں دکھا سکتا۔ مجھ سے میری بری خصلتیں ہٹا دے اور حقیقت بھی یہی ہے کہ تیرے سوا برے اخلاق کو کوئی بھی ہٹا نہیں سکتا۔ بار بار تیرے حضور حاضر ہوں اور تیرا فرمانبردار ہوں۔ بھلائی ساری کی ساری تیرے ہاتھوں میں ہے اور برائی تیری جانب منسوب نہیں کی جا سکتی۔ میں تیرے ساتھ (ہی قائم) ہوں اور تیری جانب (ہی لوٹنے والا) ہوں۔ تو ہی بہت برکت والا اور بہت بلندی و برتری والا ہے۔ بخشش و خطا بخشی کا تجھی سے طلبگار ہوں اور توبہ کی صورت میں تیری جناب میں رجوع کرتا ہوں۔“
مشہور محقق و محدث مولانا عبدالرحمٰن مبارک پوری رحمہ اللہ نے ترمذی کی شرح [تحفة الأحوذي: 203] میں اس حدیث پر عالمانہ گفتگو کی ہے۔ وہ بیان کرتے ہیں کہ یہ حدیث مسلم شریف کے باب صلاۃ اللیل میں دو طریق سے منقول ہے۔ ان دونوں طرق میں سے کسی میں بھی یہ نہیں ہے کہ یہ دعا آپ رات کی نماز میں پڑھتے تھے، نیز اس حدیث کو ترمذی نے ابواب الدعوات [حديث: 3421، 3422، 3423] میں تین طرق سے روایت کیا ہے۔ تینوں میں سے کسی میں بھی یہ نہیں ہے کہ یہ دعا آپ نماز شب میں پڑھتے تھے بلکہ اس کے برعکس جامع الترمذی ہی کی ایک روایت [3423] میں ہے کہ جب آپ فرض نماز کی ادائیگی کے لیے کھڑے ہوتے تو اس موقع پر یہ دعا پڑھتے۔ اور امام ابوداود رحمہ اللہ نے اپنی سنن کی کتاب [الصلاة، باب «ما يستفتح به الصلاة من الدعاء»، حديث: 760، 761] میں بھی دو طریق سے یہ روایت نقل کی ہے۔ ان میں سے کسی میں بھی یہ نہیں ہے کہ یہ دعا آپ رات کی نماز میں مانگتے تھے بلکہ ان میں سے ایک میں تو یہ ہے کہ آپ جب فرض نماز کی ادائیگی کے لیے کھڑے ہوئے تو اس وقت یہ دعا مانگتے۔ اور سنن دراقطنی کی ایک روایت میں ہے: جب آپ فرض نماز کا آغاز فرماتے تو اس وقت «وَجَّهْتُ وَجْهِيَ....» الخ پڑھتے۔ [سنن دارقطني: 287/1 - 296]
امام شوکانی رحمہ اللہ نے اپنی مشہور ومعروف کتاب نیل الاوطار میں کہا ہے کہ امام ابن حبان رحمہ اللہ نے بھی اسی طرح اس حدیث کی تخریج کی اور اتنا اضافہ نقل کیا ہے کہ جب آپ فرض نماز کے لیے کھڑے ہوتے، اس وقت یہ پڑھتے۔ اور اسی طرح امام شافعی رحمہ اللہ نے بھی اسے روایت کیا ہے، انہوں نے بھی فرض نماز کی قید لگائی ہے۔ ان دونوں کے علاوہ دوسروں نے بھی اسی طرح کہا: ہے۔ یہ قول کہ یہ دعا نفلی نماز کے ساتھ مخصوص ہے اور فرض نماز میں مشروع نہیں باطل ہے۔ مزید تفصیل کے لئے دیکھئے: [نيل الأوطار: 215/2 - 217]

760۔ اردو حاشیہ:
➊ نماز شروع کرنے کے وقت کی کئی دعائیں ثابت ہیں۔ طویل بھی اور مختصر بھی۔ من جملہ ان کے مذکورہ دعا میں رسول اللہ صلی اللہ علیہ وسلم نے اللہ کے حضور اپنے عجز و نیاز اور اظہار بندگی میں انتہائی فرما دی ہے۔ ہمارے لیے بھی ان دعاؤں کا پڑھنا مستحب ہے اور معنوی لحاظ سے ان میں توحید الوہیت، ربوبیت اور اسماء صفات سب ہی کا اثبات و اقرار ہے۔
➋ یہ دعا فرائض اور دن اور رات کی سب ہی نمازوں میں پڑھی جا سکتی ہے جیسے کہ امام ابن حبان رحمہ اللہ اور امام شافعی رحمہ اللہ نے ا ن کا فرائض میں پڑھنا بیان فرمایا ہے۔ تاہم صحیح مسلم میں رات کی نماز میں پڑھنے کا ذکر کیا گیا ہے۔
➌ اس روایت میں تصریح ہے کہ دعا «وجهت وجهي . . . . . . .» کا مقام تکبیر تحریمہ کے بعد ہے بخلاف ان حضرا ت کے جو اسے پہلے سمجھتے ہیں۔ [صحيح مسلم، حديث: 771]
➍ «وانا اول المسلمين» کا جملہ جو پہلی دعا میں آیا ہے، اس کے متعلق کچھ فقہائے مدینہ سے مروی ہے کہ وہ اسے رسول اللہ صلی اللہ علیہ وسلم سے مخصوص سمجھتے تھے اور عام مسلمانوں کو «وانا من المسلمين» کہنے کی تلقین کرتے تھے۔ دیکھیے روایت: 762، مگر حقیقت یہ ہے کہ دونوں طرح صحیح ہے اور «اوّل المسلمين» کا مفہوم بھی بالکل بجا ہے، یعنی بندہ یہ اقرار کرتا ہے کہ ”میں تیرے احکام قبول کرنے میں سب سے پیش پیش ہوں۔“

898۔ اردو حاشیہ:
➊ اس روایت کے بعض طرق میں صراحت ہے کہ رسول اللہ صلی اللہ علیہ وسلم جب فرض نماز شروع فرماتے تو یہ دعا پڑھتے اور بعض میں رات کی نماز کا ذکر ہے، گویا یہ دعا فرض اور نفل دونوں میں پڑھی جا سکتی ہے، البتہ جماعت کی صورت میں مقتدیوں کا خیال رکھنا ضروری ہے۔
➋ ” «اللہ اکبر» کہتے، پھر فرماتے۔“ یہ صراحت ہے کہ آپ یہ دعا تکبیرتحریمہ کے بعد پڑھتے، لہٰذا یہ کہنا درست نہیں کہ یہ دعا تکبیر تحریمہ سے قبل پڑھی جائے۔
➌ «أَنَا مِنْ الْمُسْلِمِينَ» میں مسلمان ہوں، حالانکہ آپ تو نبی تھے۔ دراصل یہ امت کو تعلیم دینے کے لیے ہے۔ متن میں لغوی ترجمہ کیا گیا ہے: ”میں فرماں برداروں میں سے ہوں۔“ یہ نبی اور امتی سب کے لیے برابر ہے۔ آگے آنے والی پوری دعا امت کے لیے ہے ورنہ آپ تو معصوم تھے اور اخلاق کاملہ و فاضلہ سے مزین تھے۔
➍ ”شر کی نسبت سے تیری طرف نہیں۔“ البتہ خیر کے ساتھ ملا کر کہا: جا سکتا ہے۔ خیروشر کا خالق، ورنہ اس میں بے ادبی کا پہلو نمایاں ہے۔ اس جملے کے اور بھی مفہوم بیان کیے گئے ہیں، مثلاً: شر کے ساتھ تیرا قرب حاصل نہیں کیاجا سکتا۔ یا شر تیری طرف نہیں چڑھتا بلکہ پاکیزہ کلمات تیری طرف چڑھتے ہیں۔ یا تیرے پیدا کرنے کے لحاظ سے کوئی چیز شر نہیں اگر کسی کو شر کہا جاتا ہے تو وہ کسی نہ کسی مخلوق کے لحاظ سے ہے۔ جو چیز ایک مخلوق کے لحاظ سے شر ہے، بسا اوقات وہ دوسری مخلوق کے لحاظ سے خیر ہو جاتی ہے۔ یا جو چیز ایک وقت شر ہے، وہ دوسرے اوقات میں خیر بھی ہو سکتی ہے، لہٰذا حکمت کے لحاظ سے ہر چیز خیرہے۔

اردو حاشہ:
وضاحت:
1؎:
یعنی ان تینوں حالتوں وصورتوں میں رفع یدین کرتے تھے۔

2؎:
فرض نماز خصوصاً باجماعت نماز میں امام کو تخفیف کی ہدایت کی گئی ہے،
تو اس میں اتنی لمبی لمبی دعائیں آپﷺ خود کیسے پڑھ سکتے تھے،
یہ انفرادی نمازوں کے لیے ہے خواہ فرض ہو یا نفل۔

حدیث حاشیہ:
مفردات الحدیث:
(1)
وَجَّهْتُ وَجْهِيَ حَنِيْفاً:
میں نے ہر طرف سے رخ پھیر لیا ہے اور ہر طرف سے کٹ کر آسمانوں اور زمین کے پیدا کرنے والے کی طرف کر لیا ہے،
اس لیے میرا مشرکوں سے کوئی تعلق اور واسطہ نہیں ہے۔
(2)
صَلاَتِيْ وَ نُسُكِيْ:
نسک،
عبادت و بندگی اور ہر دینی کام کو کہتے ہیں لیکن یہاں مقصود قربانی ہے اور یہ دونوں لفظ مَحْيَايَ وَ مَمَاتِيْ کے مقابلہ میں ہیں کہ میری زندگی میں دوئی اور شراکت نہیں ہے،
جب تک زندہ ہوں اس کی طرف متوجہ ہوں اور نماز اس کی علامت ہے اور جب میری موت آئے گی تو جان اسی پر قربان کروں گا،
زندگی کے آخری سانس تک اس سے منہ نہیں موڑوں گا کیونکہ للهِ کا معنی ہے میری موت کا مالک وہی ہے اور کوئی اور اس کا مالک نہیں ہے۔
اس لیے موت و حیات اس کے لیے مختص ہیں،
کسی اور کا ان میں کوئی حق اور حصہ نہیں ہے،
کیونکہ وہی ﴿رَبُّ الْعَالَمِیْن﴾ ہے یعنی تمام کائنات کا آقا،
مالک و فرمانروا،
پروردگار اور مدبر و منتظم ہے۔
کائنات کے نظم و نسق اور انتظام و انصرام میں کسی کا دخل نہیں ہے۔
اس لیے میری موت و حیات میں کسی کا دخل نہیں،
اس لیے میں اس کا فرمانبردار اور اطاعت گزار ہوں،
اس کا بندہ اور غلام ہونے کی بنا پر اس بادشاہ حقیقی سے اپنی لغزشوں اور کوتاہیوں کی معافی کا طلب گار ہوں اور اس مالک کے بغیر یہ کام کوئی بھی نہیں کر سکتا،
کیونکہ وہی اِلٰہ ہے۔
اخلاق حسنہ اختیار کرنے کی توفیق وہی عنایت فرما سکتا ہے اور اخلاق سیئہ سے وہی بچا سکتا ہے۔
اس کے سوا کسی کے اختیار میں نہیں ہے کہ وہ اخلاق حسنہ کو اپنانے کی توفیق دے اور برے اخلاق سے محفوظ رکھے کیونکہ ہر قسم کی خیر و بھلائی اس کے ہاتھ میں ہے،
اس لیے میں اس کی اطاعت و فرمانبرداری پر قائم ہوں اور ہر وقت اس کے لیے تیار ہوں،
وہ خالقِ شر ضرور ہے لیکن برائی کا اس کی طرف گزر نہیں۔
(3)
وَالشَّرُّ لَيْسَ اِلَيْكَ:
یعنی شر تقرب اور نزدیکی کا باعث نہیں بن سکتا،
کیونکہ شر تیری بارگاہ میں پہنچتا نہیں،
تجھ تک صرف کلمات خیر اور اعمال صالحہ ہی پہنچتے ہیں،
نہ شر کی طرف نسبت ہو سکتی ہے کیونکہ تیری نسبت اور تیرے اعتبار سے وہ شر نہیں ہے بلکہ حکمت بالغہ پر مبنی ہے اس لیے اس میں شر ہمارے اعتبار سے ہے اور ادب و توقیر کا تقاضا بھی یہی ہے کہ شر کی نسبت اپنی طرف کی جائے،
اپنے مالک اور آقا کی طرف نہ کی جائے،
ہم چونکہ تیرے سہارے قائم ہیں،
اس لیے ہمارا رخ تیری ہی طرف ہے،
اور ہماری ہر چیز ہماری نس نس،
انگ انگ اور جوڑ جوڑ تیرے حضور جھکا ہے،
اور تو اپنے انعامات و احسانات کے سبب جو بے حد و بے انتہا ہیں،
اس قدر حمد اور شکر کا حق دار ہے کہ آسمان و زمین اور ان کے درمیان خلا بھی اگر تیری حمد و شکر سے بھر جائیں تو بھی تیرے فیض و کرم کا حق ادا نہیں ہو سکتا۔
اس لیے ہم ہر قسم کی کوتاہیوں سے جو ہو چکی ہیں یا ہوں گی معافی کے خواستگار ہیں،
کیونکہ ہر قسم کی کھلی چھپی،
چھوٹی بڑی کوتاہیوں کے مرتکب ہوتے رہتے ہیں اور تیرے سوا کوئی انہیں معاف نہیں کر سکتا۔