حدیث حاشیہ:
لہٰذا سب کا لحاظ ضروری ہے۔
ائمہ حضرات کو اس میں بہت ہی بڑا سبق ہے کاش امام حضرات ان پر توجہ دے کر اس حدیث کو ہمہ وقت اپنے ذہن میں رکھیں اوراس پر عمل کریں۔

حدیث حاشیہ:
اس حدیث کے مطابق رسول اللہ صلی اللہ علیہ وسلم نے ان ائمۂ مساجد کا بڑی سختی سے نوٹس لیا ہے جو دوران نماز میں اپنے نمازیوں کا خیال نہیں رکھتے بلکہ لمبی لمبی نمازیں پڑھا کر انہیں اس دینی فریضے سے متنفر کرتے ہیں۔
اس میں ہمارے لیے بہت بڑا سبق ہے کہ ہمیں دوران جماعت میں اپنے مقتدی حضرات کا خیال رکھنا چاہیے اور اپنی قراءت کو مختصر کرنا چاہیے، ہاں اگر کوئی اکیلا نماز پڑھ رہا ہو تو وہ لمبی قراءت کر کے اپنا شوق پورا کر سکتا ہے لیکن اسے دوران جماعت میں ایسا کرنے کی اجازت نہیں۔

� تشریح:
غصہ کا سبب یہ کہ آپ پہلے بھی منع کر چکے ہوں گے دوسرے ایسا کرنے سے ڈر تھا کہ کہیں لوگ تھک ہار کر اس دین سے نفرت نہ کرنے لگ جائیں۔ یہیں سے ترجمہ باب نکلتا ہے۔

حدیث حاشیہ:
آنحضرت صلی اللہ علیہ ولم کتنے بھی غضبناک ہوں آپ کے ہوش و حواس قائم ہی رہتے تھے۔
اس لیے اس حالت میں آپ کا یہ ارشاد بالکل بجا تھا۔
اس سے امام کو سبق لینا چاہئے کہ مقتدی کا لحاظ کتنا ضروری ہے۔

صحیح بخاری کی حدیث نمبر: 7159 کا باب: «بَابُ هَلْ يَقْضِي الْحَاكِمُ أَوْ يُفْتِي وَهْوَ غَضْبَانُ:»
باب اور حدیث میں مناسبت:
امام بخاری رحمہ اللہ نے باب قائم فرمایا کہ قاضی غصے کی حالت میں فتوی نہ دے، تحت الباب جو حدیث سیدنا ابوبکر رضی اللہ عنہ سے نقل فرمائی اس کا تعلق باب سے واضح ہے جبکہ جو حدیث سیدنا ابومسعود رضی اللہ عنہ سے نقل فرمائی ہے اس کا باب سے تعلق نہیں بنتا، کیوں کہ اس میں نبی کریم صلی اللہ علیہ وسلم نے غصے کی حالت میں فیصلہ سنایا تھا، جو کہ ظاہری باب سے مطابقت نہیں بنتی، چنانچہ باب اور حدیث میں مناسبت دیتے ہوئے علامہ ابن المنیر رحمہ اللہ رقمطراز ہیں:
«أدخل فى ترجمة الباب الحديث الأول، وهو دليل على منع الغضب، وأدخل الحديث الثاني وهو دليل جواز القضاء مع الغضب تنبيهًا منه على الجمع، فإما أن يحمل قضاء النبى صلى الله عليه وسلم على الخصوصية به العصمة، و الامن من التعدي.» [المتوري على ابواب البخاري: ص 232، 233]
”یعنی ابن المنیر رحمہ اللہ کے کہنے کا مقصد یہ ہے کہ امام بخاری رحمہ اللہ نے حدیث سیدنا ابوبکر رضی اللہ عنہ جو پیش فرمائی ہے اس میں غصے میں فیصلہ کرنے سے منع ہے، پھر اس کے بعد حدیث ثانی سیدنا ابن مسعود رضی اللہ عنہ کی پیش فرمائی ہے جو اس بات پر جواز قائم کرتی ہے غصے کی حالت میں فیصلہ کرنے پر، پس غصے کی حالت میں فیصلہ کرنے والی حدیث یہ نبی کریم صلى اللہ علیہ وسلم کی خصوصیت میں سے ہے کیونکہ غصے کی حالت میں بھی نبی کریم صلى اللہ علیہ وسلم کو تعدی سے امن دیا گیا ہے (یعنی اس حالت میں بھی آپ صلى اللہ علیہ وسلم حق کے سوا کچھ نہیں فرماتے).“
ابن المنیر رحمہ اللہ کے ان اقتباسات سے یہ بات واضح ہوتی ہے کہ غصے کی حالت میں فیصلہ کرنا یہ صرف نبی کریم صلی اللہ علیہ وسلم ہی کا خاصہ تھا، کیوں کہ امت کو غصہ کی حالت میں فیصلہ کرنے سے روک دیا گیا ہے، لہٰذا امام بخاری رحمہ اللہ کا ان روایات کو پیش کرنے کا مقصد یہی ظاہر ہوتا ہے کہ کوئی شخص غصہ کی حالت میں فیصلہ نہ دے جیسا کہ سیدنا ابوبکر رضی اللہ عنہ کی حدیث سے ثابت ہے، اور سیدنا ابومسعود رضی اللہ عنہ کی حدیث پیش اس لیے کی کہ اس مسئلہ کا جواز ثابت کیا جائے، مگر کون ہے جو نبی کریم صلی اللہ علیہ وسلم کے مثل کہ غصہ کی حالت میں بھی اپنی زبان سے حق ہی ادا کرے «(ما يخرج منه إلا حق)» لہٰذا کوئی امتی غصہ کی حالت میں فیصلہ نہ دے، کیوں کہ وہ نبی کریم صلی اللہ علیہ وسلم کے مثل نہیں ہو سکتا۔ «فمن كان فى مثل حاله جاز و إلا، منع»

فوائد و مسائل:
باب اور حدیث میں مناسبت:
باب اور حدیث میں مناسبت بظاہر خلاف ہے کیونکہ حدیث میں قیام کا مختصر ہونا ثابت ہوتا ہے لیکن امام بخاری رحمہ اللہ نے باب میں رکوع اور سجود کا ذکر بھی فرمایا کہ ان کو مکمل ادا کیا جائے، امام بخاری رحمہ اللہ نے اپنی عادت کے موافق دوسرے طرق کی طرف اشارہ فرمایا ہے جس میں واضح الفاظ ہیں کہ رکوع اور سجود کو مکمل کرنا چاہئے۔

◈ حافظ ابن حجر رحمہ اللہ فرماتے ہیں:
«و فى الطبراني من حديث عدي بن حاتم رضى الله عنه من امنا فليتم الركوع والسجود» [فتح الباري ج 2 ص252]
”جو کوئی امامت کروائے تو اسے چاہئیے کہ وہ رکوع اور سجود کو پورا کرے۔“ لہٰذا نبی کریم صلی اللہ علیہ وسلم کا تخفیف کا حکم دینا قیام کے لیے تھا نہ کہ رکوع اور سجود کے لیے یہی بات ابن المنیر نے بھی فرمائی ہے۔ [ديكهيے المتواري ج1 ص100]

◈ علامہ عینی رحمہ اللہ نے اسی تطبیق کی طرف اشارہ فرمایا ہے کہ قیام میں تو تخفیف سے کام لیا جائے، مگر رکوع اور سجود کے مکمل میں کسی کو کوئی مشق نہیں ہوتی۔ [عمدة القاري ج5 ص257]
لہٰذا ان احادیث و اقوال سے واضح ہوتا ہے کہ قیام اگرچہ مختصر ہو مگر رکوع اور سجود مکمل ہوں کیونکہ رکوع اور سجود کے مکمل کرنے میں کسی کو کوئی مشقت نہیں۔

◈ ابن المنیر رحمہ اللہ فرماتے ہیں:
«ان الوارد التخفيف فى القيام لا فى الركوع والسجود» [المتواري, ص100]
”اس تخفیف کا حکم قیام میں ہے نہ کہ رکوع اور سجود میں۔‏‏‏‏“

◈ شاہ ولی اللہ رحمہ اللہ فرماتے ہیں:
”امام بخاری رحمہ اللہ کا مقصد اس ترجمۃ الباب سے حدیث میں مذکور لفظ «فليتجوز» کی تفسیر ہے کہ تجوز اختصار کا تعلق قرآت و قیام کے ساتھ ہے، باقی اس کے علاوہ رکوع و سجود مکمل ادا کرنا چاہیے۔“ [شرح تراجم ابواب البخاري، ص226]

اشکال: الجواب:
اس اعتراض کا جواب دیتے ہوے علامہ کرمانی رحمہ اللہ رقمطراز ہیں:
«الواو بمعنى مع كأنه قال باب التخفيف بحيث لا يفوته شيئ من الواجبات» [الكواكب الدراري، ج5، ص75]
” «واتمام الركوع والسجود» میں واؤ بمعنیٰ مع ہے یعنی تخفیف قیام میں ہو گی مع اتمام الرکوع والسجود کے“
شارحین کی وضاحت سے واضح ہوا کہ امام بخاری رحمہ اللہ کا مقصد یہ ہے کہ قیام ہلکا ہو لیکن رکوع اور سجود کا اتمام ضرور ہو تخفیف کا حکم قیام کے ساتھ ہے نہ کہ رکوع اور سجود کے ساتھ۔

فائدہ:
مندرجہ بالا حدیث سے مطلق نماز میں تخفیف ہے کیونکہ اکثریت میں کمزور، حاجت مند اور بوڑھے ہوتے ہیں بالغرض اگر یہ نا بھی ہوں تب بھی نماز کے قیام کو ہلکا پڑھنا بالاولی بہتر ہے ہاں اگر بندہ تنہا نماز پڑھے تو جتنی چاہے نماز کو طول دے تو وہ دے سکتا ہے بعین اسی طرح کا واقعہ ایک اور صحابی سے منقول ہے جسے امام ابویعلیٰ الموصلی نے حسن سند کے ساتھ ذکر فرمایا کہ:
«كان ابي بن كعب يصلي باهل قباء فاستفتح سورة طويلة فدخل معه غلام من الانصار فى الصلاة، فلما سمعه استفتاحه انفتل من صلاته، فغضب ابي فاتى النبى صلى الله عليه وسلم يشكو الغلام، واتى الغلام يشكوا ابيا، فغضب النبى صلى الله عليه وسلم حتي عرف الغضب فى وجهه ثم قال: ان منكم منفرين، فاذا صليتم فاوجزوا فان خلفكم الضعيف والكبير والمريض و ذالحاجة» [مسند ابي يعلي الموصلي رقم الحديث 1792, وذكره حافظ فى ”الفتح“ ج2 ص252]
” سیدنا ابی ابن کعب رضی اللہ عنہ اہل قباء والوں کو نماز پڑھایا کرتے تھے پس انہوں نے ایک لمبی سورت نماز میں شروع کی تو ایک غلام انصار کا وہ نماز سے پھر گیا (اس کے اس فعل پر) ابی بن کعب رضی اللہ عنہ غصے ہوئے اور وہ اس لڑکے کی شکایت لے کر رسول اللہ صلی اللہ علیہ وسلم کے پاس حاضر ہوئے اور اس نے ابی بن کعب کی شکایت نبی صلی اللہ علیہ وسلم سے کی (ابی بن کعب کے نماز طویل پڑھانے پر) رسول اللہ صلی اللہ علیہ وسلم غصے ہوئے حتی کہ آپ صلی اللہ علیہ وسلم کے مبارک چہرے پر غصہ نمایاں ہوا پھر آپ صلی اللہ علیہ وسلم نے ارشاد مبارک فرمایا یقیناًً تم میں سے کچھ ایسے ہیں جو (عبادت سے) نفرت کرواتے ہیں، پس جب تم نماز پڑھاؤ تو ہلکی پڑھاؤ، یقیناًً تمہارے پیچھے کمزور، بوڑھے مریض اور ضرورت مند ہوا کرتے ہیں۔“
مندرجہ بالاحدیث سے واضح ہوا کہ نماز میں تخفیف کرنے کو پسند کیا گیا ہے۔ جب کہ آدمی نماز پڑھا رہا ہو۔

اردو حاشہ:
فوائد و مسائل:
(1)
کسی ذمہ دار یا افسر کی شکایت اس سے بالاتر شخصیت کے سامنے پیش کرنا غیبت میں شامل نہیں۔

(2)
نماز باجماعت سے جان بوجھ کر پیچھے رہنا جائز نہیں۔
لیکن امام کے طویل نماز پڑھانے کی وجہ سے اس شخص کے جان بوجھ کر پیچھے رہنے پر نبی ﷺ ناراض نہیں ہوئے۔
بلکہ اسے ایک معقول عذر قرار دیا۔

(4)
نماز میں تخفیف مناسب ہے لیکن تخفیف کا مقصد بہت زیادہ مختصر کردینا نہیں۔
بلکہ تقریباً اتنی مقدار میں تلاوت کریں جتنی رسول اللہ ﷺ کرتے تھے۔
آپﷺ فجر نماز میں ساٹھ سے سو آیات تک تلاوت کرتے تھے۔
دیکھئے: (سنن ابن ماجه، اقامة الصلاة، باب القراءة فی صلاة الفجر، حدیث: 818)

(5)
ضرورت مند کا مطلب یہ ہے کہ نماز باجماعت میں ایسے مسلمان بھی شریک ہوتے ہیں جنھیں نماز کے بعد کوئی ضروری کام کرنا ہوتا ہے اورطویل قراءت سے انھیں پریشانی ہوتی ہے۔

فائدہ:
اس حدیث سے ثابت ہوا کہ نماز درمیانے قیام و رکوع اور سجدوں والی ہونی چاہیے، تا کہ لوگ متنفر نہ ہوں، مقتدیوں کا ہر لحاظ سے خیال رکھ کر نماز پڑھانی چاہیے۔ اگر نماز لمبی کروانی ہے تو پہلے لوگوں کی مسلسل ذہن سازی کی جائے، اور ماحول پیدا کیا جائے، اور وہ کبھی کبھار ہونی چاہیے، اگر قرٱت روزانہ طویل ہوگی، تو اس سے بھی فتنہ برپا ہوگا، ہر معاملے میں اعتدال کو نہیں چھوڑ نا چا ہیے۔

حدیث حاشیہ:
1۔
اسلامی تعلیمات میں غصے، ناراضی کو اچھی نظر سے نہیں دیکھا گیا کیونکہ اس سے نفرت کےجذبات پروان چڑھتے ہیں اور اخوت ومودت کی فضا قائم نہیں رہتی لیکن استاد کا غصہ مختلف حیثیت رکھتا ہے، کیونکہ استاد کا مقصود تعلیم دینا ہوتا ہے تو اس میں بعض دفعہ سختی کی بھی ضرورت ہوتی ہے، اس لیے استاد کا غصہ مقصد تعلیم کے خلاف نہیں ہے۔
امام بخاری رحمۃ اللہ علیہ ان احادیث کے پیش نظر یہ ثابت کرنا چاہتے ہیں کہ تعلیم کے موقع پر اگرضرورت ہوتو غصے سے بھی کام لیا جا سکتا ہے بلکہ بعض اوقات مستحسن ہے، مثلاً:
کوئی طالب علم غیر حاضری کرتا ہے یا گستاخی اور بے ادبی کا ارتکاب کرتا ہے یا حاضری کے باوجود اسباق میں توجہ نہیں دیتا تو استاد کوڈانٹنے اور غصے ہونے کا حق ہے شفقت ومہربانی اپنی جگہ مطلوب ہے اورغصے کا اظہار اپنے محل پر۔
2۔
اصلاح معاشرہ کے لیے طریق نبوی یہ ہے کہ وعظ وارشاد میں کسی خاص شخص کا نام لے کر اسے نشانہ نہ بنایاجائے بلکہ ایک اصولی بات کہہ دی جائے جس سے مقصد بھی حاصل ہوجائے اور مخاطب کو شرمندگی بھی نہ ہو، یا کسی وقت الگ اسے غلطی پر تنبیہ کردی جائے کیونکہ بھرے مجمع میں کسی کو نشانہ بنانے سے بعض اوقات وہ ضد اور ہٹ دھرمی پر اتر آتا ہے۔
3۔
اس سے یہ بھی معلوم ہوا کہ ائمہ مساجد کواپنے مقتدی حضرات کاخیال رکھنا چاہیے کیونکہ امام کا اس قدر لمبی قراءت کرنا جس میں بیماروں، کمزوروں اور ضرورت مندوں کا لحاظ نہ ہو، شان امامت اور موضوع امامت کے خلاف ہے۔
رسول اللہ صلی اللہ علیہ وسلم نے ایسے موقع پر بہت سختی سے نوٹس لیا اور فرمایا کہ تم لوگوں کونماز باجماعت سے نفرت دلانے والے ہو۔
4۔
امام بخاری رحمۃ اللہ علیہ نے عنوان میں وعظ وتعلیم کے مواقع پر غصہ کرنے کا ذکر کیا ہے جس کامطلب یہ معلوم ہوتا ہے کہ فیصلہ کرتے وقت غضبناک ہونا جائز نہیں کیونکہ رسول اللہ صلی اللہ علیہ وسلم نے جج کو بحالت غصہ فیصلہ کرنے سے منع فرمایا ہے، البتہ رسول اللہ صلی اللہ علیہ وسلم بحالت غصہ بھی فتویٰ دینے یا فیصلہ کرنے کے مجاز تھے کیونکہ یہ آپ کاخاصہ تھا۔
آپ کسی حالت میں بھی حق سےانحراف نہیں فرماتے تھے۔
(صحیح البخاري، الأحکام، حدیث: 7160، وفتح الباري: 247/1)
5۔
اس حدیث میں شکایت کنندہ نے کہا:
میرے لیے نماز باجماعت پڑھنا مشکل ہو گیا ہے۔
اس کا مطلب یہ ہے کہ میں نماز باجماعت کے قریب نہیں جاتا بلکہ بعض اوقات دانستہ اس سے دیر کرتا ہوں کیونکہ جماعت میں قراءت بہت طویل ہوتی ہے۔
رسول اللہ صلی اللہ علیہ وسلم سخت ناراض اس لیے ہوئے کہ شاید آپ پہلے بھی اس سے منع فرماچکے تھے۔
(فتح الباري: 246/1)

حدیث حاشیہ:
(1)
رسول اللہ ﷺ کے متعلق احادیث میں ہے کہ آپ نماز میں تخفیف کرتے تھے۔
امام بخاری ؒ نے ان احادیث کی شرح فرما دی کہ تخفیف سے کیا مراد ہے، یعنی اس سے ارکان وتعدیل میں تخفیف مراد نہیں بلکہ قیام وقراءت میں تخفیف ہے۔
رکوع وسجود میں تخفیف نہیں کرنی چاہیے، چنانچہ حدیث میں ہے کہ رسول اللہ ﷺ نے عثمان بن ابی العاص ؓ سے فرمایا کہ تو اپنی قوم کا امام ہے، لہٰذا تجھے اپنے کمزور لوگوں کا خیال رکھنا چاہیے۔
(سنن أبي داود، الصلاة، حدیث: 531)
(2)
مسند ابی یعلی میں یہ حدیث تفصیل سے بیان ہوئی ہے کہ حضرت ابی بن کعب ؓ قباء میں لوگوں کو نماز پڑھاتے تھے۔
ایک دن صبح کی نماز میں ایک لمبی سورت پڑھی تو ایک انصاری نوجوان نماز چھوڑ کرچلا گیا۔
اس پر حضرت ابی بن کعب کو بہت غصہ آیا اور اس نے رسول اللہ ﷺ کے پاس آکر اس کی شکایت کی۔
پھر اس نوجوان نے آپ کی خدمت میں حاضر ہوکر حضرت ابی کا شکوہ کیا۔
رسول اللہ ﷺ کو اس وقت بہت غصہ آیا۔
اس حالت میں آپ نے فرمایا کہ تم میں سے بعض لوگ دوسروں کو نفرت دلاتے ہیں۔
جب نماز پڑھاؤتو اختصار کو ملحوظ رکھو کیونکہ تم میں کمزور، بوڑھے، بیمار اور ضرورت مند ہوتے ہیں۔
(مسند أبي یعلٰی: 3/334، حدیث: 1798) (3)
واضح رہے کہ امام بخاری ؒ کے بعض عنوانات مسائل کے استنباط کے لیے نہیں ہوتے بلکہ ان کے ذریعے سے حدیث کی وضاحت کرنا مقصود ہوتا ہے۔
مذکورہ عنوان بھی اسی قبیل سے ہے کیونکہ اس کے ذریعے سے پیش کردہ حدیث کی وضاحت کی گئی ہے۔

حدیث حاشیہ:
(1)
امام محترم ہوتا ہے۔
وہم ہو سکتا ہے کہ شاید اس کی شکایت کرنا بے ادبی ہو، نیز حدیث میں ہے کہ منافقین پر نماز کی ادائیگی بہت بھاری ہوتی ہے، اس سے بھی شبہ ہوسکتا ہے کہ نماز کے متعلق شکایت کرنا درست نہیں کیونکہ یہ خبر محض ہے۔
امام بخاری ؒ کی دقیقہ رسی اور نکتہ آفرینی ملاحظہ کریں کہ انھوں نے باب قائم کرکے متنبہ فرمایا کہ اگر نماز مقتدی حضرات کی گردانی کا باعث ہوتو اس کی شکایت کی جا سکتی ہے۔
(2)
عام طور پر یہ بات باعث خلجان ہے کہ نماز جیسی جلیل القدر عبادت، اس کے کسی رکن میں طوالت کسی مومن مخلص کے لیے وجہ گرانی کیوں ہو؟ رسول اللہ ﷺ سے اجازت ملنے پر یہ خلجان باقی نہیں رہا۔
امام بخاری ؒ نے حدیث سے اس قسم کی شکایت کا ثبوت فراہم کردیا ہے۔
اس عنوان اور حدیث سے یہ بات واضح ہوجاتی ہے کہ کوئی امر خواہ کتنا ہی بڑا خیر کا ہو اور اس سے روکنے میں کتنی ہی نفس پر گرانی ہو مگر کسی صحیح ضرورت کے پیش نظر اس کی شکایت کی جاسکتی ہے اور اس سے روکا بھی جاسکتا ہے۔

سفیان ثوری رحمہ اللہ صحیح بخاری کی یہ حدیث «عن» سے روایت کر رہے ہیں۔
بعض لوگ عن والی روایت پر اعتراض کرتے ہیں کہتے ہیں، سماع کی تصریح یا متابعت ثابت کریں۔
(2) صحیح بخاری باب الغضب فی الموعظۃ ج1 ص19 (ح 90) اس روایت میں زہیر (وغیرہ) نے سفیان کی متابعت کر رکھی ہے، صحیح بخاری کتاب الاذان باب تخفیف الامام فی القیام…… (ح 1702)
حوالہ: فتاویٰ علمیہ (توضیح الاحکام) جلد 2، ص 315