حدیث حاشیہ:
آخرت میں ان کے لیے کچھ حصہ نہیں ہے اور نہ ان سے اللہ کلام کرے گا اور نہ ان پر نظر رحمت ہوگی۔
اور نہ ان کو پاک کرے گا بلکہ ان کے لیے دکھ دینے والا عذاب ہے۔
معلوم ہوا کہ اللہ کے نام کی جھوٹی قسم کھانا بدترین گناہ ہے۔
علمائے کرام نے کسی سچے معاملہ میں بھی بطور تنزیہ اللہ کے نام کی قسم کھانا پسند نہیں کیا ہے۔
مسند احمد میں ہے کہ آپ صلی اللہ علیہ وسلم نے فرمایا، اپنی ازار کو ٹخنوں سے نیچے لٹکانے والا اور جھوٹی قسموں سے اپنا مال فروخت کرنے والا اور احسان جتلانے والا یہ وہ مجرم ہیں جن پر حشر میں اللہ کی نظر رحمت نہیں ہوگی۔
حضرت امام بخاری رحمۃ اللہ علیہ کا مقصد باب یہ ہے کہ تجارت میں ہر وقت سچائی کو سامنے رکھنا ضروری ہے۔
ورنہ جھوٹ بولنے والا تاجر عنداللہ سخت مجرم قرار پاتا ہے۔

حدیث حاشیہ:
(1)
جو تاجر جھوٹی قسم اٹھا کر اپنا سامان فروخت کرتا ہے وہ انتہائی خسارے میں ہے۔
قرآنی آیت کے مطابق ایسے لوگوں کا آخرت میں کوئی حصہ نہیں ہوگا،قیامت کے دن اللہ تعالیٰ ایسے لوگوں سے ہم کلام نہیں ہوگا،نہ ان کی طرف نظر رحمت ہی سے دیکھے گا،نیز انھیں گناہوں سے پاک بھی نہیں کرے گا بلکہ ان کے لیے درد ناک عذاب ہوگا۔
حدیث میں ہے کہ رسول اللہ صلی اللہ علیہ وسلم نے فرمایا"تین شخص قیامت کے دن خسارے میں ہوں گے:
ایک اپنی چادر ٹخنوں سے نیچے لٹکاکر چلنے والا،دوسرا جھوٹی قسم اٹھا کر سامان فروخت کرنے والا اور تیسرا کسی پر احسان کرکے جتلانے والا۔
"(مسند احمد: 5/148) (2)
غلط فتویٰ دے کر اس کے عوض مال وصول کرنا،کسی سے کوئی چیز لے کر مکر جانا اور قسم اٹھالینا، الغرض بددیانتی کی جتنی بھی اقسام ہوسکتی ہیں ان سب پر مذکورہ آیت کا اطلاق ہوتا ہے۔