حدیث حاشیہ:
معلوم ہوا کہ جس کو کوئی عذر نہ ہو اس کا منیٰ کی راتوں میں منی میں رہنا واجب ہے، شافعیہ اور حنابلہ اور اہل حدیث کا یہی قول ہے اور بعض کے نزدیک یہ واجب نہیں سنت ہے۔
(وحیدی)
و في الحدیث دلیل علی وجوب المبیت بمنی و أنه من مناسك الحج لأن التعبیر بالرخصة یقتضي أن مقابلهاواجب وأن الإذن وقع للعلة المذکورة و إذا لم توجد أو ما في معناها لم یحصل الإذن و بالوجوب قال الجمهور۔
(فتح)
یعنی منی میں رات گزارنا واجب اور مناسک ِحج سے ہے، جمہور کا یہی قول ہے۔
حضرت عباس رضی اللہ عنہ کو علت مذکورہ کی وجہ سے مکہ میں رات گزارنے کی اجازت ہی دلیل ہے کہ جب ایسی کوئی علت نہ ہو تو منیٰ میں رات گزارنا واجب ہے اور جمہور کا یہی قول ہے۔

حدیث حاشیہ:
(1)
طواف افاضہ کے بعد ایام تشریق کی راتیں منیٰ میں گزارنی چاہئیں اور ان دنوں زوال آفتاب کے بعد تین جمرات کو رمی کی جائے اور اللہ کا ذکر کیا جائے جیسا کہ حضرت عائشہ ؓ سے مروی ہے کہ رسول اللہ ﷺ طواف افاضہ کرنے کے بعد منیٰ کی طرف لوٹے اور ایام تشریق کی راتیں وہیں بسر کیں۔
اس دوران میں جب سورج ڈھل جاتا تو آپ جمرات کو کنکریاں مارتے۔
جمہور علماء کے نزدیک ایام تشریق کی راتیں منیٰ میں گزارنا ضروری ہیں کیونکہ یہ عمل مناسک حج میں سے ہے اور مناسک حج پر عمل کرنا واجب ہے جیسا کہ رسول اللہ ﷺ نے ان دنوں فرمایا تھا:
”مجھ سے حج کا طریقہ سیکھ لو۔
“ (2)
امام بخاری ؒ نے صرف ضرورت مند حضرات کے لیے مکہ میں رات گزارنے کی اجازت کو ثابت کیا ہے۔
اس کا مطلب یہ ہے کہ اگر کوئی عذر نہ ہو تو منیٰ میں ایام تشریق کی راتیں گزارنا ضروری ہیں، اجازت طلب کرنے اور رخصت دینے کا مطلب بھی یہی ہے۔
یہ اجازت کسی ضرورت کے پیش نظر ہے جیسا کہ حضرت عباس ؓ نے حاجیوں کو پانی پلانے کا بندوبست کرنا تھا، اس لیے انہوں نے اجازت طلب کی اور رسول اللہ ﷺ نے رخصت دے دی، اسی طرح رسول اللہ ﷺ نے اونٹوں کے چرواہوں کو منیٰ سے باہر رات گزارنے کی اجازت دی۔
(سنن أبي داود، المناسك، حدیث: 1975)
یہ ضرورت عام ہے، خواہ پانی پلانے کا بندوبست کرنا ہو یا بیماری وغیرہ لاحق ہو۔
اگر کوئی دو دن قیام کے بعد واپس لوٹ آئے تو اس کی بھی اجازت ہے، ارشاد باری تعالیٰ ہے:
﴿وَاذْكُرُوا اللَّـهَ فِي أَيَّامٍ مَّعْدُودَاتٍ ۚ فَمَن تَعَجَّلَ فِي يَوْمَيْنِ فَلَا إِثْمَ عَلَيْهِ﴾ ”اور ان گنتی کے دنوں میں اللہ کو یاد کرو پھر جس نے دو دنوں (منیٰ سے مکے کی طرف واپسی)
میں جلدی کی تو اس پر کوئی گناہ نہیں۔
“ (البقرة: 203: 2) (3)
امام بخاری ؒ نے اس سلسلے میں تین روایات پیش کی ہیں۔
پہلی روایت کا متن علامہ اسماعیلی نے بیان کیا ہے کہ رسول اللہ ﷺ نے حضرت عباس ؓ کو پانی پلانے کا بندوبست کرنے کی وجہ سے ایام تشریق کی راتیں مکہ میں گزارنے کی اجازت دی۔
اسی طرح دوسری روایت کے متن کو امام احمد نے اپنی مسند میں بیان کیا ہے۔
(مسندأحمد: 19/2)
ابو اسامہ کی متابعت کو امام مسلم نے، عقبہ بن خالد کى متابعت کو عثمان بن ابی شیبہ نے اپنی مسند میں اور ابو ضمرہ انس بن عیاض کی متابعت کو خود امام بخاری ؒ نے باب سقایۃ الحاج، حدیث: 1634 کے تحت متصل سند سے بیان کیا ہے۔
(فتح الباري: 730/3)

1959. اردو حاشیہ: کوئی معقول شرعی عذر ہوتو معنی سےباہر رہ سکتا ہے، مثلاً حجاج کی خدمت، جانوروں کو چرانا یا مریض اور اس کی تیمارداری وغیرہ۔ اس قسم کے اعذار کے علاوہ منی ٰ میں رات گزارنا ضروری ہے۔

635لغوی تشریح: «ليالي منيٰ» منیٰ کی راتوں سے مراد ذوالحجہ کی گیارھویں، بارھویں اور تیرھویں راتیں ہیں۔ یہ اجازت انہوں نے اس مقصد اور غرض کے لیے طلب کی کہ وہ اور ان کے ساتھی رات کو آب زمزم کھینچ کر حوض بھر لیتے تھے اور فی سبیل اللہ لوگوں کو پلاتے تھے۔
«فاذن له» یہ اجازت اس بات کی دلیل ہے کہ جو لوگ معذور نہ ہوں ان کے لیے منیٰ ہی میں یہ راتیں گزارنا واجب ہے اور جنہیں کوئی عذر پیش آ جائے، مثلاً: منیٰ میں خیمے میں آگ بھڑک اٹھے اور طویل رات گزارنا ناممکن و مشکل نظر آئے تو وہاں رات گزارنا ضروری نہیں اور اسی طرح تیسری رات بھی وہاں گزارنا واجب نہیں کیونکہ جو شخص جلدی کر کے دو دن ہی منیٰ میں رہ کر چلا جائے تو اس پر کوئی گناہ نہیں جیسا کہ اللہ سبحانہ و تعالیٰ نے سورہ البقرہ میں فرمایا ہے۔

اردو حاشہ:
فوائد و مسائل:
(1)
مکہ مکرمہ میں قریش کی مختلف شاخوں کو مختلف مناصب حاصل تھے۔
رسول اللہﷺ کے اجداد میں سے قصی بن کلاب کو جو مناصب حاصل تھےوہ انھوں نے اپنے بیٹوں میں تقسیم کیےپھر وہ منصب ان کی اولاد میں تقسیم ہوئے تو سقایت (حاجیوں کو پانی پلانے کا منصب)
بنو عبد مناف کو اور حجابت (کعبہ کی خدمت اور کلید برادری)
بنو عبد الدار کو ملی۔
رسول اللہ ﷺ کے حج کے موقع پر سقایت کا یہ منصب حضرت عباس رضی اللہ عنہ کو حاصل تھا۔ (الرحيق المختومص: 53)

(2)
منی کے ایام سے مراد ذوالحجہ کی گیارہ بارہ اور تیرہ تاریخ ہے۔
جن میں حاجی منی میں رہتے ہیں۔
ان ایام کی راتیں بھی منی میں گزارنی چاہییںا لبتہ حاجیوں کی خدمت کے سلسلے میں خدام مکہ مکرمہ میں بھی رہ سکتے ہیں۔ (3)
حاجیوں کی خدمت ایک بڑا شرف ہے۔

حدیث حاشیہ:
معلوم ہوا کہ اگر کوئی عذر نہ ہوتو گیارہویں بارہویں شب کو منیٰ ہی میں رہنا ضروری ہے۔
حضرت عباس ؓ کا عذر معقول تھا۔
حاجیوں کو زمزم سے پانی نکال کر پلانا ان کا قدیمی عہدہ تھا۔
اس لیے آنحضرت ﷺ نے ان کو اجازت دے دی۔