حدیث حاشیہ:
زبیدی کی روایت کو امام بخارى ؒ نے تاریخ میں اور طبرانی نے معجم کبیر میں نکالا۔
امام بخاری کی غرض اس بیان سے یہ ہے کہ زہری کے شیخ میں راویوں کا اختلاف ہے۔
یونس اور عقیل نے ہیثم بن ابی سنان کہا ہے اور زبیدی نے سعید بن مسیب اور اعرج اور ممکن ہے کہ زہری نے ان تینوں سے اس حدیث کو سنا ہو، حافظ نے کہا کہ امام بخاری کے نزدیک پہلا طریق راجح ہے، کیونکہ یونس اور عقیل دونوں نے بالاتفاق زہری کا شیخ ہیثم کو قرار دیا ہے (وحیدی)
اس حدیث سے ثابت ہو اکہ مجالس وعظ میں رسول کریم ﷺ کی سیرت مبارکہ کا نظم ونثر میں ذکر کرنا درست اور جائز ہے۔
سیرت کے سلسلہ میں آپ ﷺ کی ولادت با سعادت اور حیات طیبہ کے واقعات کا ذکر کرنا باعث ازدیاد ایمان ہے، لیکن محافل میلاد مروجہ کا انعقاد کسی شرعی دلیل سے ثابت نہیں۔
عہد صحابہ وتابعین وتبع تابعین وائمہ مجتہدین وجملہ محدثین کرام میں ایسی محافل کا نام ونشان بھی نہیں ملتا۔
پورے چھ سو سال گرز گئے دنیائے اسلام محفل میلاد کے نام سے بھی آشنا نہ تھی۔
تاریخ ابن خلکان میں ہے کہ اس محفل کا موجد اول ایک بادشاہ ابو سعید مظفرالدین نامی تھا، جو نزد موصل اربل نامی شہر کا حاکم تھا۔
علمائے راسخین نے اسی وقت سے اس نوایجاد محفل کی مخالفت فرمائی۔
مگر صد افسوس کہ نام نہاد فدائیان رسول اللہ ﷺ آج بھی بڑے طنطنہ سے ایسی محافل کرتے ہیں جن میں نہایت غلط سلط روایات بیان کی جاتی ہیں، چراغاں اور شیرنی کا اہتمام خاص ہوتا ہے اور اس عقیدہ سے قیام کر کے سلام پڑھا جاتاہے کہ آنحضرت ﷺ کی روح مبارک خود اس محفل میں تشریف لائی ہے۔
یہ جملہ امور غلط بے ثبوت ہیں جن کے کرنے سے بدعت کا ارتکاب لازم آتا ہے۔
اللہ کے رسول ﷺ نے صاف فرما دیا کہ مَن أَحدثَ فِي أمرِنا ھذا ما لیس منه فھُوَ رَد۔
جو ہمارے دین میں کوئی نئی بات ایجاد کرے جس کا ثبوت ادلہ شرعیہ سے نہ ہو وہ مردود ہے۔

حدیث حاشیہ:
(1)
عنوان سے مطابقت ان الفاظ سے ہے:
”آپ کا پہلو بستر سے دور رہتا ہے۔
“ کیونکہ ایسا شب بیداری ہی سے ہو سکتا ہے۔
رسول اللہ ﷺ کا رات کو بیدار ہونا نماز پڑھنے، ذکر کرنے اور تلاوت قرآن کے لیے تھا، گویا شاعر نے اس ارشاد باری تعالیٰ کی طرف اشارہ کیا ہے:
﴿تَتَجَافَىٰ جُنُوبُهُمْ عَنِ الْمَضَاجِعِ يَدْعُونَ رَبَّهُمْ خَوْفًا وَطَمَعًا﴾ (السجدة: 16: 32)
”ان کے پہلو بستروں سے الگ رہتے ہیں۔
وہ اپنے رب کو ڈرتے ہوئے اور امید کرتے ہوئے پکارتے ہیں۔
“ اس سے معلوم ہوا کہ اچھے اشعار اچھے کلام کی طرح قابل ستائش ہیں۔
(فتح الباري: 54/3) (2)
عقیل کی متابعت کو امام طبرانی نے معجم کبیر میں اپنی متصل سند سے بیان کیا ہے اور زبیدی کی تعلیق کو امام بخاری ؒ نے تاریخ صغیر اور امام طبرانی نے معجم کبیر میں متصل سند سے ذکر کیا ہے۔
(فتح الباري: 55/3)