اور نبی صلی اللہ علیہ وسلم نے فرمایا: ”اللہ عزوجل نے میری طرف وحی نازل فرمائی ہے کہ عاجزی اختیار کرو، اور تم میں سے کوئی دوسرے پر ظلم نہ کرے۔“ [صحيح الادب المفرد/حدیث: 329]

عیاض بن حمار نے کہا کہ رسول اللہ صلی اللہ علیہ وسلم نے فرمایا ہے: ”بیشک اللہ نے میری طرف وحی نازل کی ہے کہ عاجزی اختیار کرو، یہاں تک کہ کوئی دوسرے پر ظلم نہ کرے اور کوئی دوسرے پر فخر کا اظہار نہ کرے۔“ اس پر میں نے عرض کیا: یا رسول اللہ اگر کوئی مجھے بھرے مجمع میں گالی دے اور وہ مجھ سے بھی کم درجے کا ہو، تو میں اسے جواب دوں تو کیا اس کا بھی مجھ پر گناہ ہو گا؟ فرمایا: ”دو گالی گلوچ کرنے والے دونوں شیطان ہیں جو بیہودہ کلام بکتے ہیں اور جھوٹ بولتے ہیں۔“ [صحيح الادب المفرد/حدیث: 330]

عیاض کہتے ہیں میں نبی صلی اللہ علیہ وسلم کا دفاع کرتا تھا تو میں نے آپ صلی اللہ علیہ وسلم کو تحفہ کے طور پر ایک اونٹنی بھیجی اس سے پہلے کہ میں مسلمان ہو جاؤں۔ آپ صلی اللہ علیہ وسلم نے قبول نہ کی اور فرمایا: ”میں مشرکین کے عطیات ناپسند کرتا ہوں۔“ [صحيح الادب المفرد/حدیث: 331]

سیدنا سعد بن ملک رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”مسلمان کا گالی دینا فسق ہے۔ (ایک آدمی مسلمان ہوتے ہوئے منہ سے گالی نکالے یہ گناہ ہے۔)“ [صحيح الادب المفرد/حدیث: 332]

سیدنا انس بن ملک رضی اللہ عنہ سے روایت ہے، انہوں نے کہا: نبی صلی اللہ علیہ وسلم نہ فحش کلامی کرتے تھے نہ لعنتیں بھیجا کرتے تھے، نہ گالی دیتے تھے۔ جب آپ صلی اللہ علیہ وسلم ناراض ہوتے تو فرماتے: ”اس کو کیا ہوا ہے اس کی پیشانی خاک آلود ہو۔“ [صحيح الادب المفرد/حدیث: 333]

سیدنا عبداللہ(بن مسعود) نبی صلی اللہ علیہ وسلم سے روایت کرتے ہیں: ”مسلمان کا گالی دینا فسق ہے اور اس کا لڑائی کرنا کفر ہے۔“ [صحيح الادب المفرد/حدیث: 334]

سیدنا ابوذر رضی اللہ عنہ کہتے ہیں کہ میں نے نبی صلی اللہ علیہ وسلم کو فرماتے ہوئے سنا ہے: ”کوئی آدمی کسی آدمی پر فاسق ہونے کا الزام نہ لگائے اور نہ اسے کفر کا فتوی لگائے۔ اگر اس کا ساتھی حق دار نہ ہو تو وہی فتوی اس کے اوپر لوٹ آتا ہے۔“ [صحيح الادب المفرد/حدیث: 335]

سیدنا ابوذر رضی اللہ عنہ سے روایت ہے کہ انہوں نے نبی صلی اللہ علیہ وسلم کو فرماتے ہوئے سنا ہے: ”جس شخص نے جان بوجھ کر اپنے آپ کو اپنے باپ کے سوا کسی اور کا بیٹا کہا اس نے کفر کیا اور جس نے دعویٰ کیا کہ وہ فلاں قوم سے ہے حالانکہ وہ ان میں سے نہیں ہے تو اسے جہنم میں اپنا ٹھکانہ بنا لینا چاہیے، اور جس نے کسی شخص کو کفر کی نسبت سے پکارا یا اللہ کا دشمن کہا حالانکہ وہ ایسا نہیں ہے تو یہ بات کہنے والے پر ہی لوٹ آئے گی۔“ [صحيح الادب المفرد/حدیث: 336]

عدی بن ثابت کہتے ہیں کہ میں نے نبی صلی اللہ علیہ وسلم کے ایک صحابی سلیمان بن صرد کو کہتے سنا: نبی صلی اللہ علیہ وسلم کے سامنے دو اشخاص نے گالی گلوچ کی، ان میں سے ایک کو اتنا شدید غصہ آیا کہ اس کا منہ پھول گیا اور چہرہ کا رنگ بدل گیا، اس پر نبی صلی اللہ علیہ وسلم نے فرمایا کہ میں ایک ایسا جملہ جانتا ہوں کہ اگر یہ شخص وہ جملہ کہہ دے تو یہ کیفیت جو اسے لاحق ہو گئی ہے رفع ہو جائے، ایک شخص اس کے پاس گیا اور نبی صلی اللہ علیہ وسلم کے اس فرمان کی اسے خبر دی اور کہا: کہ «اعوذ بالله من الشيطان الرجيم» کہو، اس نے کہا: کیا تم سمجھتے ہو کہ مجھے کوئی بیماری ہے یا میں پاگل ہوں، جاؤ اپنا کام کرو۔ [صحيح الادب المفرد/حدیث: 337]

سیدہ عائشہ رضی اللہ عنہا سے مروی ہے، نبی صلی اللہ علیہ وسلم نے کوئی کام کیا اور اس میں رخصت دے دی، ایک جماعت نے اس سے پرہیز کیا، یہ بات جب آپ صلی اللہ علیہ وسلم تک پہنچی تو آپ صلی اللہ علیہ وسلم نے خطبہ دیا، تو اللہ کی حمد بیان کی پھر فرمایا: کچھ لوگوں کا عجب حال ہے، لوگ اس کام میں شرکت سے پرہیز کرتے ہیں جسے میں نے کیا ہے، حالانکہ اللہ کی قسم میں ان سے زیادہ اللہ کو جانتا اور ان سے بڑھ کر اس کا خوف رکھتا ہوں۔ [صحيح الادب المفرد/حدیث: 338]