سیدنا علی رضی اللہ عنہ کہتے ہیں: نبی صلی اللہ علیہ وسلم عصر سے پہلے چار رکعت نماز پڑھتے تھے۔ [معجم صغير للطبراني/كِتَابُ الصَّلوٰةِ/حدیث: 325]

سیدنا انس بن مالک رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”اللہ تعالیٰ کا ایک فرشتہ ہے جو ہر نماز کے وقت اذان کہتا ہے: اے بنی آدم! اپنی آگوں کی طرف اٹھو جو تم نے اپنی جانوں پر جلا رکھی ہیں، تو ان کو بجھا دو۔“ [معجم صغير للطبراني/كِتَابُ الصَّلوٰةِ/حدیث: 326]

سیدنا حسن بن علی رضی اللہ عنہما کہتے ہیں: میں نے اپنے دادے سے سنا، رسول اللہ صلی اللہ علیہ وسلم فرما رہے تھے: ”جو شخص بھی صبح کی نماز ادا کرے پھر وہ بیٹھ کر اللہ کا ذکر کرتا رہے یہاں تک کہ سورج طلوع ہو جائے تو اس کا یہ عمل اس کے لیے جہنم سے حجاب بن جائے گا۔“ [معجم صغير للطبراني/كِتَابُ الصَّلوٰةِ/حدیث: 327]

سیدنا جبیر بن مطعم رضی اللہ عنہ کہتے ہیں: میں رسول اللہ صلی اللہ علیہ وسلم کے پاس آیا تو آپ صلی اللہ علیہ وسلم اپنے صحابہ کو مغرب کی نماز پڑھا رہے تھے، تو میں نے سنا آپ صلی اللہ علیہ وسلم کہہ رہے تھے: ” «مَا لَهُ مِنْ دَافِعٍ» “ یعنی ”اللہ کے عذاب کو کوئی روک نہیں سکے گا۔“ اس وقت آپ صلی اللہ علیہ وسلم کی آواز مسجد سے باہر جا رہی تھی۔ «﴿إِنَّ عَذَابَ رَبِّكَ لَوَاقِعٌ . مَا لَهُ مِنْ دَافِعٍ﴾» (الطور: 8) ”تیرے رب کا عذاب ضرور واقع ہو کر رہے گا، اس کو کوئی روکنے والا نہیں ہو گا۔“ تو وہ آواز میرے دل پر ایسی لگی گویا کہ میرا دل پھٹ گیا۔ [معجم صغير للطبراني/كِتَابُ الصَّلوٰةِ/حدیث: 328]

سیدنا سلیمان فارسی رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”مسلمان نماز پڑھتا ہے اور اس کے گناہ اس کے سر پر ہو تے ہیں، جب وہ سجدہ کرتا ہے تو وہ اس سے گر پڑتے ہیں، جب وہ اپنی نماز سے فارغ ہوتا ہے تو اس کے گناہ گر چکے ہوتے ہیں۔“ [معجم صغير للطبراني/كِتَابُ الصَّلوٰةِ/حدیث: 329]

سیدنا سعد بن ہشام کہتے ہیں: میں نے سیدہ عائشہ رضی اللہ عنہا سے نبی صلی اللہ علیہ وسلم کے رات کے قیام کے متعلق دریافت کیا تو انہوں نے کہا: جب اللہ تعالیٰ نے یہ حکم نازل فرمایا: «﴿يَا أَيُّهَا الْمُزَّمِّلُ . قُمِ اللَّيْلَ إِلَّا قَلِيلًا﴾» (المزمل: 1-2) یعنی ”کمبل اوڑھنے والے! رات کو اٹھ کر قیام کریں مگر تھوڑا وقت۔“ تو نبی صلی اللہ علیہ وسلم پر رات کا قیام فرض ہو گیا۔ یہ پہلا فریضہ تھا۔ صحابہ کرام رضی اللہ عنہم بھی رات کو اُٹھ کر قیام کرتے، یہاں تک کہ ان کے پاؤں پھٹ گئے۔ پھر اللہ تعالیٰ نے اس سورت کا آخری حصہ ایک سال تک نازل نہ فرمایا، پھریہ آیت نازل فرمائی: «﴿عَلِمَ أَنْ لَنْ تُحْصُوهُ فَتَابَ عَلَيْكُمْ فَاقْرَءُوا مَا تَيَسَّرَ مِنَ الْقُرْآنِ﴾» (المزمل: 20)، یعنی ”اللہ تعالیٰ جانتا ہے کہ تم اس کی طاقت نہیں رکھ سکتے، تو اس نے تمہاری توبہ قبول فرمائی، تو قرآن سے جو آسان ہو وہ پڑھو۔“ تو رات کا قیام نفل ہو گیا۔ [معجم صغير للطبراني/كِتَابُ الصَّلوٰةِ/حدیث: 330]

سیدنا ابوذر رضی اللہ عنہ کہتے ہیں: نماز کو سیاہ کتا، عورت اور گدھا توڑ دیتے ہیں۔ عبداللہ بن صامت رضی اللہ عنہ کہتے ہیں: میں نے سیدنا ابوذر رضی اللہ عنہ سے پوچھا: سیاہ کتے کا سفید کتے سے تخصیص کا کیا سبب ہے؟ تو انہوں نے کہا: میں نے بھی رسول اللہ صلی اللہ علیہ وسلم سے اسی طرح پوچھا جس طرح تو نے مجھ سے پوچھا، تو آپ صلی اللہ علیہ وسلم نے فرمایا: ”سیاہ کتا شیطان ہوتا ہے۔“ [معجم صغير للطبراني/كِتَابُ الصَّلوٰةِ/حدیث: 331]

سیدہ عائشہ رضی اللہ عنہا کہتی ہیں کہ نبی صلی اللہ علیہ وسلم نے فرمایا: ”بیٹھ کر نماز پڑھنے والے کی نماز کھڑے ہو کر پڑھنے والے سے نصف مقام رکھتی ہے۔“ [معجم صغير للطبراني/كِتَابُ الصَّلوٰةِ/حدیث: 332]

سیدنا ابوہریرہ رضی اللہ عنہ کہتے ہیں: تمام نمازوں میں قرأت کی جا تی تھی، تو جو رسول اللہ صلی اللہ علیہ وسلم نے ہمیں سنائی وہ ہم نے تم کو سنا دی، اور جو ہم سے پوشیدہ رکھی وہ ہم نے تم سے پوشیدہ رکھی۔ [معجم صغير للطبراني/كِتَابُ الصَّلوٰةِ/حدیث: 333]

سیدنا عبداللہ بن عمر رضی اللہ عنہما کہتے ہیں: نبی صلی اللہ علیہ وسلم جب نماز شروع کرتے تو اپنے ہاتھوں کو اٹھاتے یہاں تک کہ انہیں کندھوں کے برابر کر تے، اور جب رکوع کرتے پھر بھی اٹھاتے اور رکوع سے سر اٹھانے کے بعد بھی ہاتھ اٹھاتے اور دو سجدوں کے درمیان رفع الیدین نہیں کرتے تھے۔ [معجم صغير للطبراني/كِتَابُ الصَّلوٰةِ/حدیث: 334]