سیدنا ابوہریرہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”زیادہ ہنسنا دل کو مردہ کر دیتا ہے۔“ [مسند الشهاب/حدیث: 111]

سیدنا سراقہ بن جعشم رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: اور انہوں نے اس حدیث کو اختصار سے بیان کیا۔ یہ حدیث صحیح ہے، اسے بخاری نے روایت کیا ہے۔ [مسند الشهاب/حدیث: 112]

سیدنا ابوہریرہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا۔ اور انہوں نے یہ حدیث بیان کی اور اس میں یہ بھی تھا کہ ” ہر زندہ جگر والے میں اجر ہے۔“ [مسند الشهاب/حدیث: 113]

سیدنا عبداللہ بن عمرو رضی اللہ عنہ کہتے ہیں کہ ایک آدمی رسول اللہ صلی اللہ علیہ وسلم کی خدمت میں حاضر ہو کر عرض کرنے لگا۔ اور انہوں نے یہ حدیث بیان کی اور اس میں یہ بھی تھا کہ آپ صلی اللہ علیہ وسلم نے فرمایا: ”ہر حرارت والے جگر میں اجر ہے۔“ [مسند الشهاب/حدیث: 114]

سیدنا انس بن مالک رضی اللہ عنہ نبی صلی اللہ علیہ وسلم سے روایت کرتے ہیں کہ آپ نے فرمایا: ”علماء اللہ کی مخلوق پر اس کے امین ہیں۔“ [مسند الشهاب/حدیث: 115]

قاضی ابومحمد عبد الكريم بن منتصرنے اپنی اسی سند کے ساتھ جس کا ذکر جز اوّل میں گزر چکا ہے۔ سیدنا زید بن خالد رضی اللہ عنہ سے روایت کیا ہے وہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے اپنے اس طویل خطبہ میں یہ (مذکورہ بات) ارشاد فرمائی جس میں یہ بھی تھا کہ جوانی جنون کا حصہ ہے۔ اور اس کے ساتھ کئی دوسری باتیں بھی مذکور تھیں۔ [مسند الشهاب/حدیث: 116]

سیدہ عائشہ رضی اللہ عنہاکہتی ہیں کہ رسول اللہ صلی اللہ علیہ وسلم نے فرمایا: ”جنت سخیوں کا گھر ہے۔“ [مسند الشهاب/حدیث: 117]

سیدنا ابوموسیٰ رضی اللہ عنہ کہتے ہیں کہ میں نے رسول اللہ صلی اللہ علیہ وسلم کو یہ فرماتے سنا: ”جنت تلواروں کے سائے تلے ہے۔“ [مسند الشهاب/حدیث: 118]

سیدنا انس بن مالک رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”جنت ماؤں کے قدموں تلے ہے۔“ [مسند الشهاب/حدیث: 119]

سیدنا انس رضی اللہ عنہ نبی صلی اللہ علیہ وسلم سے روایت کرتے ہیں کہ آپ نے فرمایا: ”اذان اور اقامت کے درمیان (مانگی جانے والی) دعا رد نہیں ہوتی۔“ [مسند الشهاب/حدیث: 120]