سیدنا انس رضی اللہ عنہ سے روایت ہے کہ نبی صلی اللہ علیہ وسلم نے ایک شخص کو دیکھا کہ ایک ایسی اونٹنی ہانک کر لے جا رہا تھا جو مکہ میں جا کر ذبح کرنی تھی۔ آپ صلی اللہ علیہ وسلم نے فرمایا: ”اس پر سوار ہو جا۔“ اس نے کہا: یہ مکہ میں ذبح ہونے والی اونٹنی ہے۔ آپ صلی اللہ علیہ وسلم نے فرمایا: ”اس پر سوار ہو جا۔“ اس نے کہا: یہ مکہ میں ذبح ہونے والی اونٹنی ہے۔ آپ صلی اللہ علیہ وسلم نے فرمایا: ”اس پر سوار ہو جا۔“ اس نے کہا: یہ تو مکہ میں ذبح ہونے والی اونٹنی ہے۔ آپ صلی اللہ علیہ وسلم نے فرمایا: ”افسوس تجھ پر اس پر سوار ہو جا۔“ [صحيح الادب المفرد/حدیث: 597]

مسور بن رفاعہ قرظی سے مروی ہے کہ انہوں نے سیدنا ابن عباس رضی اللہ عنہما سے سنا کہ ایک شخص ان سے مسئلہ پوچھ رہا ہے۔ وہ کہہ رہا ہے کہ میں نے روٹی اور گوشت کھایا ہے۔ کیا میں وضو کر وں؟ انہوں نے کہا: افسو س تجھ پر، کیا پاک صاف غذا کے بعد تو وضو کرے گا۔ [صحيح الادب المفرد/حدیث: 598]

سیدنا جابر رضی اللہ عنہ نے بیان کیا کہ حنین کے دن رسول اللہ صلی اللہ علیہ وسلم مقام جعرانہ (مکہ سے سات میل کے فاصلے پر طائف کے جانب ایک جگہ کا نام ہے) میں تھے۔ سیدنا بلال رضی اللہ عنہ کی گود میں سونے کی ڈلی تھی، اور وہ تقسیم کر رہے تھے۔ ایک شخص آپ کے پاس آیا اور کہا: انصاف کیجئے۔ آپ انصاف نہیں کر رہے۔ آپ نے فرمایا: ”افسوس تجھ پر۔ اگر میں نے انصاف نہ کیا تو اور کون انصاف کرے گا۔“ سیدنا عمر رضی اللہ عنہ نے کہا: یا رسول اللہ! مجھے اجازت دیجئے کہ میں اس منافق کی گردن اڑا دوں۔ آپ صلی اللہ علیہ وسلم نے فرمایا: ”یہ اپنے دوستوں کے ساتھ ہے۔“ یا فرمایا: ”اپنے دوستوں میں ہے، یہ لوگ قرآن پڑھیں گے اور قرآن ان کے حلق سے نیچے نہیں جائے گا، وہ دین سے یوں کورے نکل جائیں گے جیسے تیر کمان سے نکل جاتا ہے۔“ میں نے سفیان سے کہا: کیا قرۃ نے یہ عمرو سے روایت کیا ہے اور عمرو نے جابر سے۔ انہوں نے کہا: عمرو سے روایت ہونا میں یاد نہیں رکھتا، ہمیں یہ حدیث ابوزبیر نے جابر سے روایت کر کے بیان کی ہے۔ [صحيح الادب المفرد/حدیث: 599]

بشیر بن معبد سدوسی سے مروی ہے جن کا نام زحم بن معبد تھا۔ یہ ہجرت کر کے نبی صلی اللہ علیہ وسلم کی خدمت میں حاضر ہوئے تو آپ صلی اللہ علیہ وسلم نے فرمایا: ”تمہارا نام کیا ہے۔“ انہوں نے کہا: ”زحم“، فرمایا: ”نہیں بلکہ تم بشیر ہو۔“ یہ بیان کرتے ہیں کہ ایک بار میں رسول اللہ صلی اللہ علیہ وسلم کے ساتھ جا رہا تھا۔ آپ صلی اللہ علیہ وسلم نے فرمایا: ”اے خصاصیہ (یہ ان کی دادی یا نانی تھیں) کے بیٹے! کیا بات ہے کہ تم اللہ پر ناراض ہونا شروع ہو گئے ہو، حالانکہ تمہارا حال یہ ہے کہ تم اللہ کے رسول کے ساتھ چل رہے ہو۔“ میں نے کہا: میرے ماں باپ فدا ہوں، میں تو اللہ سے کسی چیز پر ناراض نہیں ہوں، میں نے ہر قسم کی خیر کو حاصل کر لیا ہے جبکہ آپ صلی اللہ علیہ وسلم کا گزر قبروں پر ہوا اور ایک روایت میں ہے کہ آپ صلی اللہ علیہ وسلم مشرکوں کی قبروں پر گزرے تو آپ صلی اللہ علیہ وسلم نے فرمایا: ”یہ لوگ بہت سی بھلائی کو چھوڑ کر آگے چلے گئے“ آپ صلی اللہ علیہ وسلم نے یہ تین دفعہ فرمایا، پھر آپ صلی اللہ علیہ وسلم کچھ قبروں پر گزرے اور ایک روایت میں ہے کہ مسلمانوں کی قبروں پر آئے اور تین دفعہ فرمایا: ”ان لوگوں نے بہت ساری بھلائی پا لی ہے“ تو نبی صلی اللہ علیہ وسلم کی نظر اٹھ گئی تو آپ صلی اللہ علیہ وسلم نے ایک آدمی کو دیکھا کہ قبروں پر چل رہا ہے اور اس نے جوتا پہنا ہوا ہے، آپ صلی اللہ علیہ وسلم نے فرمایا: ”اے چمڑے کے جوتے پہننے والے! اپنے چمڑے کے جوتے اتار پھینکو۔“ تو اس آدمی نے دیکھا، جب اس نے نبی صلی اللہ علیہ وسلم کو دیکھا اپنے جوتے اتار دیے اور انہیں پھینک دیا۔ [صحيح الادب المفرد/حدیث: 600]