اردو حاشہ:
حنوط چونکہ خوشبو کی ایک قسم ہے، لہٰذا میت یا اس کے کفن کو حنوط یا کسی بھی قسم کی خوشبو نہیں لگائی جا سکتی تاکہ اس کے احرام کا احترام قائم رہے حتیٰ کہ خوشبو دار صابن بھی نہ لگایا جائے۔

لغوی تشریح:
«فِي الَّذِي سَقَطَ عَنْ رَاحِلَتِهِ» یہ ایک صحابی رسول تھے۔ حج کا احرام باندھے مقام عرفہ میں ٹھہرے ہوئے تھے۔ دوران احرام میں ہی اپنے اونٹ سے گر گئے جس سے ان کی گردن ٹوٹ گئی اور وفات پا گئے۔
«‏‏‏‏بِمَاءِ وَسِدْر» بیری کے پتوں کا طریقہ استعمال تین طرح سے ہے: ① پہلا طریقہ تو یہ ہے کہ بیری کے پتوں کو پانی میں ڈال کر اسے اتنا زور سے ہلائیں کہ اس کا جھاگ باہر نکل آئے۔ اس پانی سے میت کے جسم کو مل کر غسل دیا جائے۔
② دوسرا طریقہ یہ ہے کہ پتوں کو پانی میں خوب ابالیں۔
③ اور تیسرا طریقہ یہ ہے کہ بیری کے پتوں کو جلا کر راکھ بنالی جائے اور اسے میت کے جسم پر خوب ملا جائے، پھر خالص اور صاف پانی سے میت کو اچھی طرح صاف کیا جائے۔ یہ غسل دینا ایک ہی مرتبہ ہو گا۔
«كَفّنُوهُ» ‏‏‏‏ تکفین (باب تفعيل) سے امر کا صیغہ ہے۔
فوائد و مسائل:
اس حدیث سے درج ذیل مسائل ثابت ہوتے ہیں:
➊ عرفات میں سواری پر جانا جائز ہے۔
➋ اونٹ کے سواری بھی استعمال کی جا سکتی ہے۔
➌ حالت احرام میں جو آدمی گر کر فوت ہو جائے اسے بھی پانی اور بیری کے پتوں سے غسل دیا جائے۔
➍ انہی احرام کے کپڑوں میں اسے دفن کیا جائے۔ نیا کفن خریدنے کی ضرورت نہیں۔ اس کا سر نہ ڈھانپا جائے اور نہ خوشبو ہی لگائی جائے۔ سر ننگا رکھنے اور خوشبو نہ لگانے کی حکمت یہ ہے کہ قیامت کے روز یہ اسی حالت «لبيك اللهم لبيك» پڑھتا ہوا اٹھے گا۔ [صحيح البخاري، جزاء الصيد، باب سنة المحرم إذا مات، حديث: 1851] بیری کے پتوں کے استعمال میں یہ حکمت معلوم ہوتی ہے کہ ایک تو اس سے بدن صاف اور نرم ہو جاتا ہے اور دوسرا اس پر خرچ بھی نہیں آتا۔ اس دور میں یہ سب سے آسان طریقہ تھا۔ صابن وغیرہ کا استعمال غالباً نہ ہونے کے برابر تھا۔

1905۔ اردو حاشیہ: اس حدیث سے صاف معلوم ہوتا ہے کہ محرم فوت بھی ہو جائے، تب بھی اس کا احرام قائم رکھا جائے، یعنی اسے خوشبو لگائی جائے نہ اس کا سر ڈھانپا جائے، مگر احناف نے اس خاص اور صریح روایت کو چھوڑ کر ایک عام روایت: ”جب انسان مر جائے تو اس کا عمل منقطع ہو جاتا ہے۔“ (صحیح مسلم، الوصیۃ، حدیث: 1631) سے استدلال کرتے ہوئے کہا ہے کہ محرم کو بھی عام انسان کی طرح غسل اور کفن دیا جائے، حالانکہ صحیح مسلم کی اس روایت سے کیسے معلوم ہوتا ہے کہ غسل اور کفن کے خصوصی احکام اس پر لاگو نہیں ہو سکتے؟ جبکہ شہید کے بارے میں خود احناف مانتے ہیں کہ شہید کو غسل نہیں دیا جائے گا، اسی خون آلود حالت میں اسے دفن کیا جائے گا تو کیا اعتراض ہے اگر محرم کو احرام کی حالت میں دفن کر دیا جائے؟ کیا سب احادیث پر عمل ضروری نہیں؟ اگر شہید کا خاص حکم ہو سکتا ہے تو محرم کا کیوں نہیں؟ جبکہ حدیث صریح اور واضح ہے۔ احناف کہتے ہیں یہ حدیث اس محرم کے ساتھ خاص ہے جس کے بارے میں آپ نے یہ بیان فرمائی تھی، مگر پوچھا: جا سکتا ہے کہ حضرت والا! شہید کو غسل نہ دینے والی حدیث شہدائے احد کے ساتھ خاص کیوں نہیں؟ بہرحال واضح حدیث کی موجودگی میں قیاس اور رائے کی کوئی حیثیت نہیں۔

اردو حاشہ:
(1) مرد کو احرام کی حالت میں چہرہ ننگا رکھنا چاہیے۔ تفصیل کے لیے دیکھیے حدیث: 2674۔
(2) روایت سے معلوم ہوتا ہے کہ محرم فوت ہو جائے تو اس کی احرام والی حالت قائم رکھی جائے۔ اسے یا کفن کو خوشبو لگائی جائے۔ اور سر اور چہرہ ننگا رکھا جائے۔ وہ قیامت کے دن بھی احرام کی حالت میں اٹھے گا۔ مگر احناف اسے ہر محرم کے لیے درست نہیں سمجھتے کیونکہ موت سے اعمال ختم ہو جاتے ہیں، احرام کیسے باقی رہ گیا؟ لیکن یہ صریح فرمان نبوی کے مقابلے میں قیاس ہے جو بہت بری بات ہے، نیز میت کا ایمان باقی رہ سکتا ہے تو احرام کیوں نہیں؟ احناف اس حکم کو صرف اس شخص کے ساتھ خاص رکھتے ہیں کہ اس کے بارے میں خاص وحی آئی ہو گی۔ مگر یہ بات بلا دلیل ہے۔ ”ہوگا، ہوگی“ سے کوئی مسئلہ ثابت نہیں ہوتا۔ حدیث کے آخری الفاظ: ”وہ قیامت کے دن لبیک کہتا ہوا اٹھے گا۔“ بھی اس حکم کو عام کرتے ہیں کیونکہ لبیک کہنا اس شخص کے ساتھ خاص نہیں تھا۔ پھر دیگر احادیث بھی دلالت کرتی ہیں کہ کوئی شخص جس حالت میں فوت ہوگا، اسی حالت میں اٹھے گا، مثلاً شہید اور خود کشی کرنے والا وغیرہ۔
(3) اس روایت میں سر کے ساتھ چہرہ ننگا رکھنے کا بھی حکم ہے جس سے یہی معلوم ہوتا ہے کہ احرام کی حالت میں چہرہ ننگا رکھنا مرد کے لیے ضروری ہے، مگر امام شافعی کا خیال ہے کہ چہرہ ننگا رکھنا صرف سر ننگا رکھنے کے لیے ہے ورنہ احرام میں مرد کے لیے چہرہ ننگا رکھنا ضروری نہیں۔ بہر صورت احتیاط یہی ہے کہ چہرہ بھی ننگا رکھا جائے۔ اہل ظاہر اس مسئلے میں امام شافعی رحمہ اللہ کے ساتھ ہیں مگر میت محرم کی صورت میں چہرہ ننگا رکھنے کے قائل ہیں۔

اردو حاشہ:
بیری کے پتے جسم کی صفائی اور نرمی کے لیے ہوتے ہیں۔ آج کل صابون وغیرہ یہی کام دے سکتے ہیں، لہٰذا بیری کے پتے کوئی ضروری نہیں، ہاں مسنون سمجھتے ہوئے صابن کے استعمال سے قبل یا بعد میں اس کا پانی استعمال کیا جا سکتا ہے۔ البتہ محرم میت کو چونکہ خوشبو لگانا منع ہے، لہٰذا خوشبو دار صابن محرم کے غسل میں استعمال نہ کیا جائے۔ عام میت کے غسل میں استعمال کیا جا سکتا ہے۔ حدیث کے باقی متعلقہ مسائل کے لیے دیکھیے فوائد حدیث: 2714۔

اردو حاشہ:
عام میت کو بھی دو کپڑوں میں کفنایا جا سکتا ہے۔ تیسرا کپڑا ضروری نہیں، مستحب ہے تاکہ اس کا چہرہ وغیرہ ڈھانپا جا سکے، مگر محرم کے لیے چونکہ احرام کی حالت میں باقی رکھنا ضروری ہے، لہٰذا وہاں تیسرے کپڑے، یعنی لفافے کی ضرورت ہی نہیں تاکہ سر اور چہرہ ننگا رہ سکے۔ ویسے بھی محرم کا احرام دو دو کپڑوں ہی میں ہوتا ہے، لہٰذا اس کے کفن میں بھی دو کپڑے ہی مسنون ہیں۔

اردو حاشہ:
یہ حدیث تفصیلاً پیچھے گزر چکی ہے۔ دیکھیے حدیث: 2814۔ صحابہ میں سے حضرت عثمان، حضرت علی اور حضرت ابن عباس رضی اللہ عنہم اسی بات کے قائل ہیں۔ فقہاء میں سے امام شافعی، امام احمد اور امام اسحاق رحمہم اللہ کا مسلک بھی یہی ہے مگر امام مالک، امام ابوحنیفہ اور اوزاعی رحمہم اللہ اس حدیث کے قائل نہیں کیونکہ ان کے نزدیک موت کے ساتھ تمام اعمال منقطع ہو جاتے ہیں، لہٰذا احرام بھی ختم ہوگیا، مگر صریح فرمان کے مقابلے میں قیاس درست نہیں۔ شارع علیہ السلام کو تخصیص کا حق حاصل ہے۔ بہت سی عام ایسی آیات و احادیث ہیں جن کی تخصیص رسول اللہﷺ نے فرمائی اور ان بزرگوں نے قبول فرمائی تو یہاں تخصیص پر اعتراض کیوں؟ ارشاد باری تعالیٰ ہے: ﴿وَمَا آتَاكُمُ الرَّسُولُ فَخُذُوهُ﴾ (الحشر59: 7) ”رسول تمھیں جو دے، وہ لے لو۔“

اردو حاشہ:
محرم کا سر ننگا رکھنے پر تو سب متفق ہیں۔ باقی رہا چہرہ تو امام شافعی رحمہ اللہ کا خیال ہے کہ چہرہ ننگا رکھنا صرف سر کو ننگا رکھنے کے لیے ہے ورنہ چہرہ ڈھانپنا منع نہیں مگر نبیﷺ کے ظاہر الفاظ تو اس کے خلاف ہیں، خصوصاً محرم میت کے مسئلے میں۔ ویسے بھی احتیاط بہتر ہے۔

فوائد ومسائل:
حالت احرام میں موت کی بڑی فضیلت ہے۔
کہ اس کا عمل قیامت تک جاری رہے گا۔
اور اس پر قیاس ہے۔
کہ اگر کوئی طالب علم یا جہاد میں فوت ہوجائے۔
اور وہ اپنے اس عمل کوپورا کرنے کا عزم رکھتا ہو تو اسے ان شاء اللہ قیامت تک کےلئے اس کا ثواب ملتا رہے گا۔

اردو حاشہ:
فوائد و مسائل:
(1) (اوقصت)
”گردن توڑدی“ کا مطلب یہ ہے کہ وہ اونٹ پر سے سر کے بل گرا جس سے اس کی گردن کی ہڈی ٹوٹ گئی۔
دوسری روایت میں (اعقصت)
کا لفظ ہے جس کے معنی "موڑدینا" ہیں۔
کیونکہ سر کے بل گرنے سے ہڈی بل کھا جاتی اور ٹوٹ جاتی ہے اور اس سے موت واقع ہوتی ہے۔

(2)
احرام کی حالت میں فوت ہونے والے شخص کو بھی غسل اور کفن دیکر جنازہ پڑھ کر دفن کرنا چاہیے۔

(3)
احرام کی حالت میں فوت ہونے والے کو احرام کی چادروں ہی میں دفنایا جائے۔
اور احرام کی پابندیوں کے مطابق اس کا سر نہ ڈھانپا جائے، نہ اسے خوشبو لگائی جائے۔

(4)
جو شخص نیکی کے کاموں میں مشغول ہونے کی حالت میں فوت ہوا، وہ قیامت کے دن اسی حال میں قبر سے اٹھے گا جس سے لوگوں کو اس کی نیکی کا علم ہوجائے گا۔
یہ اللہ کی طرف سے اس کی عزت افزائی ہوگی۔

اردو حاشہ: 1؎:
یہ قول حنفیہ اورمالکیہ کا ہے،
ان کی دلیل ابوہریرہ کی حدیث ' إذا مات ابن آدم انقطع عمله 'ہے اورباب کی حدیث کا جواب وہ یہ دیتے ہیں کہ ممکن ہے نبی اکرمﷺ کو وحی کے ذریعہ یہ بتادیا گیا ہوکہ یہ شخص مرنے کے بعداپنے احرام ہی کی حالت میں باقی رہے گا،
یہ خاص ہے اسی آدمی کے ساتھ،
لیکن کیا اس خصوصیت کی کوئی دلیل ہے؟،
ایسی فقہ کا کیا فائدہ جو قرآن وسنت کی نصوص کے ہی خلاف ہو۔

فائدہ:
اس حدیث میں ہے کہ جو بندہ حالت احرام میں فوت ہو جائے اس کوغسل اور کفن دفن کیسے دیا جائے، اس حدیث سے معلوم ہوا کہ جو انسان جس حالت میں فوت ہو گا، اسی حالت میں قیامت کے دن اٹھایا جائے گا، اور جو احرام کی حالت میں فوت ہوا، اس کو احرام میں ہی دفنانا چاہیے۔

فائدہ:
اس حدیث سے معلوم ہوا کہ جو احرام کی حالت میں فوت ہو، اس کو خوشبو نہیں لگانی چاہیے، اور احرام کی حالت میں بھی خوشبو نہیں لگانی چاہیے۔

حدیث حاشیہ:
مفردات الحدیث:
وُقِصَ:
سواری سے گر کر گردن کا ٹوٹ جانا۔

حدیث حاشیہ:
مفردات الحدیث:
(1)
وَقَصَتْهُ اور اَوْقَصَتْهُ:
دونوں کا معنی ہےگرا کر گردن توڑ دی اورأَقْصَعَتْهُ کا معنی ہے،
اسے فوراً قتل کردیا۔
(2)
حَنُوْط:
اس خوشبو کو کہتے ہیں،
جو خاص طور پر میت کے لیے تیار کی جاتی ہے۔
فوائد ومسائل:
حضرت ابن عباس رضی اللہ تعالیٰ عنہ کی روایات سے ثابت ہوتا ہے کہ جب محرم احرام کی حالت میں فوت ہو جائے تو اس کی حالت احرام بر قرار رہے گی۔
اس لیے اس کو احرام کے کپڑوں کا کفن دیا جائے گا اس کا سر بھی نہیں ڈھانپا جائے گا اور نہ ہی خوشبو لگائی جائے گی امام احمد رحمۃ اللہ علیہ،
امام شافعی رحمۃ اللہ علیہ،
اسحاق رحمۃ اللہ علیہ اور محدثین کا یہی مؤقف ہے۔
امام ابوحنیفہ رحمۃ اللہ علیہ اور امام مالک رحمۃ اللہ علیہ کے نزدیک اس کا احرام ختم ہو جائے گا اس لیے اسے عام اموات کی طرح کفن دیا جائے گا،
اس کو سلے ہوئے کپڑے پہنانا سر ڈھانپنا خوشبو لگانا جائز ہے لیکن یہ صحیح حدیث کے خلاف ہے اور محض اپنے وضعی قاعدہ کے تحت،
اس حدیث کو اس آدمی کے ساتھ خاص قرار دیا گیا ہے۔
باقی رہا بیری کے پتوں سے غسل دینا تو یہ خوشبو کے لیے نہیں ہے اگربالفرض خوشبو ہو بھی توحدیث میں موت کی صورت میں اس کا حکم موجود ہے۔

حدیث حاشیہ:
فوائد ومسائل:
اس حدیث سے ثابت ہوتا ہے کہ محرم کے فوت ہونے کی صورت میں اس کا چہرہ بھی نہیں ڈھانپا جائے گا اس لیے محرم کے لیے چہرہ ڈھانپنے کے بارے میں ائمہ میں اختلاف ہے۔
امام شافعی رحمۃ اللہ علیہ اور احمد رحمۃ اللہ علیہ کے نزدیک چہرہ ڈھانپنا جائز ہے۔
کیونکہ حضرت عثمان رضی اللہ تعالیٰ عنہ۔
عبدالرحمان بن عوف رضی اللہ تعالیٰ عنہ۔
زید بن ثابت رضی اللہ تعالیٰ عنہ اور سعد بن ابی وقاص رضی اللہ تعالیٰ عنہ وغیرہم سے اس کا جواز ثابت ہے اور اس حدیث میں چہرہ ڈھانپنے کی ممانعت سر کے کھلا رکھنے کی خاطر ہے۔
لیکن امام ابوحنیفہ رحمۃ اللہ علیہ۔
اورامام مالک رحمۃ اللہ علیہ کے نزدیک اس روایت کی بنا پرمحرم کے لیے زندگی میں چہرہ ڈھانپنا جائز نہیں ہے۔

حدیث حاشیہ:
ثابت ہوا کہ محرم کو دو کپڑوں میں دفنایا جائے۔
کیونکہ وہ حالت احرام میں ہے اور محرم کے لیے احرام کی صرف دو ہی چادریں ہیں، برخلاف ا س کے دیگر مسلمانوں کے لیے مرد کے لیے تین چادریں اور عورت کے لیے پانچ کپڑے مسنون ہیں۔

حدیث حاشیہ:
محرم کو خوشبو نہ لگائی جائے۔
اس سے ثابت ہوا کہ غیر محرم میت کو خوشبو لگانی چاہیے۔
باب کامقصد یہی ہے۔
محرم کو خوشبو کے لیے اس واسطے منع فرمایا کہ وہ حالت احرام ہی میں ہے اور قیامت میں اس طرح لبیك پکارتا ہوا اٹھے گا اور ظاہر ہے کہ محرم کو حالت احرام میں خوشبو کا استعمال منع ہے۔

حدیث حاشیہ:
معلوم ہوا کہ محرم مر جائے تو اس کا احرام باقی رہے گا۔
شافعیہ اور اہلحدیث کا یہی قول ہے۔

حدیث حاشیہ:
مطلب یہ ہے کہ اس کا احرام باقی ہے۔
دوسری راویت میں ہے کہ اس کا منہ نہ ڈھانکو، حافظ ؒنے کہا مجھے اس شخص کا نام نہیں معلوم ہوا، اس بارے میں کوئی مستند روایت نہیں ملی، اس سے بھی حضرت امام بخاری ؒ نے یہ ثابت فرمایا کہ محرم کو خوشبو لگانا منع ہے کیوں کہ آپ نے مرنے والے کو محرم گردان کر اس کے جسم پر خوشبو لگانے سے منع فرمایا۔
حدیث سے عمل حج کی اہمیت بھی ثابت ہوئی کہ ایسا شخص روز قیامت میں حاجی ہی کی شکل میں پیش ہوگا بشرطیکہ اس کا حج عنداللہ مقبول ہوا ہو اور جملہ آداب و شرائط کو سامنے رکھ کر ادا کیا گیا ہو۔
حدیث سے اونٹ کی فطری طینت پر بھی روشنی پڑتی ہے۔
اپنے مالک سے اگر یہ جانور خفا ہو جائے تو موقع پانے پر اسے ہلاک کرنے کی بھرپور کوشش کرتا ہے اگرچہ اس جانور میں بہت سی خوبیاں بھی ہیں مگر اس کی کینہ پروری بھی مشہور ہے قرآن مجید میں اللہ نے اونٹ کا بھی ذکر فرمایا ہے ﴿إِلَى الْإِبِلِ كَيْفَ خُلِقَتْ﴾ (الغاشیة: 17)
یعنی اونٹ کی طرف دیکھو وہ کس طرح پیدا کیا گیا ہے۔
اس کے جسم کا ہر حصہ شان قدرت کا ایک بہترین نمونہ ہے، اللہ نے اسے ریگستان کا جہاز بنایا ہے۔
جہاں اور سب گھبرا جاتے ہیں مگر یہ ریگستانوں میں خوب جھوم جھوم کر سفر طے کرتا ہے۔

حدیث حاشیہ:
(1)
سنن نسائی کی ایک روایت میں ہے کہ رسول اللہ ﷺ نے فرمایا:
”اسے انہی دو کپڑوں میں کفن دیا جائے جن میں اس نے احرام باندھا تھا۔
“ (سنن النسائی، الجنائز:
حدیث: 1905)
امام بخاری ؒ کا اس عنوان اور پیش کردہ حدیث سے مقصود یہ ہے کہ کفن کے لیے تین کپڑوں کا ہونا شرط نہیں، البتہ مستحب ضرور ہے، جیسا کہ جمہور کا موقف ہے۔
(2)
کفن کی تین اقسام ہیں:
٭ کفن ضرورت جو فرض ہے کہ ایک ہی چادر جو تمام جسم کے لیے ساتر ہو۔
٭ کفن کفایہ:
اس کے لیے دو چادریں کافی ہیں۔
٭ کفن سنت:
اس میں تین چادریں ہیں۔
اس بات پر اجماع ہے کہ کم از کم ایک چادر ضرور ہونی چاہیے جس سے میت کو ڈھانپا جا سکے۔

حدیث حاشیہ:
صحیح بخاری کی ایک روایت میں ہے:
”اسے خوشبو کے قریب تک نہ کرو کیونکہ یہ قیامت کے دن احرام کی حالت میں تلبیہ کہتا ہوا اٹھایا جائے گا۔
“ (صحیح البخاري، جزاء الصید، حدیث: 1839)
ان روایات میں خوشبو سے ممانعت کا سبب یہ بتایا گیا ہے کہ اسے اللہ تعالیٰ قیامت کے دن اٹھائے گا تو یہ تلبیہ کہہ رہا ہو گا۔
چونکہ وہ شخص حالتِ احرام میں اٹھایا جائے گا اور احرام کی حالت میں خوشبو لگانا منع ہے، اس لیے اس کی میت کو بھی خوشبو لگانے سے روک دیا گیا۔
اس کا مطلب یہ ہے کہ ممانعت کا سبب احرام ہے۔
اگر احرام نہیں ہو گا تو ممانعت بھی نہیں ہو گی، اس لیے میت کو خوشبو لگانے میں کوئی حرج نہیں، بلکہ حضرت جابر ؓ کی روایت میں صراحت ہے کہ رسول اللہ ﷺ نے فرمایا:
”جب تم میت کو خوشبو کی دھونی دو تو تین مرتبہ دو۔
“ (مسند أحمد: 331/3)
حضرت جابر ؓ بیان کرتے ہیں کہ ایک آدمی فوت ہو گیا تو ہم نے اسے غسل دیا، کفن پہنایا اور اسے خوشبو کی دھونی دی، پھر ہم نے اسے جنازے کے لیے رکھ دیا۔
اس کے بعد ہم نے رسول اللہ ﷺ کو جنازے کی اطلاع دی تو آپ ﷺ نے دریافت فرمایا:
”اس کے ذمہ قرض تو نہیں؟“ (المستدرك للحاکم: 58/2)
ان روایات سے معلوم ہوتا ہے کہ میت کو خوشبو لگانا مستحب امر ہے، کیونکہ فرشتے حاضر ہوتے ہیں اور اس نے بھی اللہ کے حضور پیش ہونا ہے، لہذا اچھی حالت میں پیش ہونا چاہیے۔
والله أعلم۔

حدیث حاشیہ:
(1)
مرنے کے بعد عبادات و اعمال کا سلسلہ منقطع ہو جاتا ہے، جیسا کہ حدیث میں ہے:
”جب آدمی مر جاتا ہے تو اس کا عمل ختم ہو جاتا ہے۔
“ احرام بھی ایک عمل ہے جو مرنے سے ختم ہو جاتا ہے لیکن رسول اللہ ﷺ نے حکمی طور پر اسے باقی رکھا ہے اور اس پر ان پابندیوں کو جاری رہنے دیا ہے جو محرم آدمی کی زندگی میں ہوتی ہیں، مثلاً:
آپ نے حکم دیا کہ اس کے چہرے اور سر کو نہ ڈھانپا جائے اور اسے خوشبو وغیرہ نہ لگائی جائے۔
امام بخاری ؒ نے اس عنوان اور پیش کردہ حدیث سے ثابت کیا ہے کہ محرم انسان اگر مر جائے تو حکمی طور پر اس کی حالتِ احرام کو باقی رکھا جائے۔
اسے عام انسانوں کی طرح خوشبو لگانے اور سر ڈھانپنے کی اجازت نہیں۔
حدیث سے یہ مسئلہ واضح طور پر ثابت ہوتا ہے۔
(2)
بعض حضرات نے حدیث میں مذکور واقعے کو خصوصیت پر محمول کیا ہے اور محرم کے لیے خوشبو لگانے اور سر ڈھانپنے کا جواز ثابت کیا ہے، لیکن خصوصیت والی بات بلادلیل ہے۔
محدثین کا اتفاق ہے کہ محرم انسان کو کفن دینے کا طریقہ وہی ہے جو حدیث میں بیان ہوا ہے۔
سنن نسائی کی روایت میں ہے کہ محرم کو احرام کی دو چادروں میں کفن دو، اسے قیامت کے دن حالتِ احرام ہی میں اٹھایا جائے گا۔
(سنن النسائي، الجنائز، حدیث: 1905)

حدیث حاشیہ:
(1)
اس حدیث میں وضاحت ہے کہ رسول اللہ ﷺ نے مرنے والے محرم کو خوشبو لگانے اور اس کا سر ڈھانپنے سے منع فرمایا کیونکہ محرم کے لیے خوشبو استعمال کرنا اور سر ڈھانپنا جائز نہیں۔
(2)
اس حدیث سے عمل حج کی اہمیت ثابت ہوتی ہے کہ ایسا شخص اگر دوران حج میں فوت ہو گیا تو قیامت کے دن اللہ کے حضور حج کرتا ہوا، تلبیہ کہتا ہوا پیش ہو گا بشرطیکہ عقیدۂ توحید مضبوط ہو اور حج کے آداب و شرائط کو سامنے رکھتے ہوئے اس فریضے کو ادا کرنے کے لیے گیا ہو۔
(3)
امام بخاری ؒ کا مقصد اس حدیث سے صرف یہ ثابت کرنا ہے کہ دوران حج میں مرد یا عورت کو خوشبو نہیں استعمال کرنی چاہیے۔
واللہ أعلم

حدیث حاشیہ:
(1)
رسول اللہ ﷺ نے اس کے ورثاء کو یہ حکم نہیں دیا کہ اس کا حج مکمل کیا جائے، حالانکہ رمی جمار، حلق، قربانی اور طواف افاضہ باقی تھے۔
چونکہ اسے بقیہ احکام ادا کرنے کا موقع ہی نہیں ملا، اس لیے وہ مکلف ہی نہیں۔
اس کی مثال ایسے ہے جیسے کوئی شخص اول وقت میں نماز شروع کر دے لیکن دوران نماز میں مر جائے تو اس پر قضا ضروری نہیں۔
(عمدةالأحکام: 543/7) (2)
بعض متاخرین نے میدان عرفات میں مرنے والے محرم کے متعلق لکھا ہے کہ وہ واقد بن عبداللہ بن عمر تھے جو احرام کی حالت میں اونٹنی سے گر کر فوت ہوئے تھے۔
لیکن یہ صحیح نہیں کیونکہ واقد بن عبداللہ صحابی نہیں۔
ان کی والدہ حضرت صفیہ بنت ابی عبید ہیں جن سے حضرت عبداللہ ؓ نے اپنے والد ماجد حضرت عمر ؓ کے دور خلافت میں نکاح کیا تھا، اس لیے رسول اللہ ﷺ کے ہمراہ وقوف کے دوران اپنی اونٹنی سے گر کر شہید ہونے والے کوئی اور شخص ہیں جن کے متعلق ہمیں معلومات نہیں مل سکیں۔
(فتح الباري: 72/4)

حدیث حاشیہ:
(1)
امام بخاری ؒ نے کتاب الجنائز میں محرم کے کفن کے متعلق ایک عنوان بایں الفاظ قائم کیا تھا:
(باب:
كيف يكفن المحرم)
”محرم کو کفن کس طرح دیا جائے؟“ اب مزید وسعت کے ساتھ عنوان بندی کی ہے۔
محرم کو اللہ تعالیٰ نے یہ اعزاز بخشا ہے کہ اس کے مرنے کے بعد بھی عمل حج کو جاری رکھا گیا ہے، حالانکہ موت کے ساتھ ہی انسان کے عمل ختم ہو جاتے ہیں جبکہ محرم قیامت کے دن بدستور "لبیک" کہتا ہوا اللہ کے حضور پیش ہو گا۔
(2)
اس کی تجہیز و تکفین بھی عام انسانوں سے ہٹ کر ہے۔
اسے پانی اور بیری کے پتوں سے غسل دے کر اس کی احرام کی چادروں میں کفن دینا ہے۔
اسے خوشبو وغیرہ نہیں لگانی اور نہ اس کا سر ہی ڈھانپنا ہے۔
بعض روایات میں ہے کہ اس کا چہرہ بھی کھلا رکھنا ہے لیکن یہ الفاظ محدثین کے ہاں غیر محفوظ ہیں۔
الغرض محرم کے مرنے کے بعد بھی اس کا احرام باقی رکھا گیا ہے اور کفن کے وقت اس کی وہی حالت برقرار رکھی گئی ہے جو اس کی زندگی کے وقت تھی۔
واللہ أعلم