1007۔ اردو حاشیہ: حضرت ابن مسعود رضی اللہ عنہ کے مصحف میں سورتوں کی ترتیب مصحف عثمانی سے کچھ مختلف تھی، اس لیے ان کی مفصل سورتوں کی ترتیب کا موجودہ قرآن مجید کی ترتیب سے اختلاف تھا۔ حضرت ابی بن کعب رضی اللہ عنہ کے پاس نزولی ترتیب تھی۔

1396. اردو حاشیہ:
➊ شیخ البانی ؒ کے نزدیک اس میں صورتوں کی تفصیل صحیح نہیں ہے۔
➋ قرآن مجید کو ترتیل اور فہم کے بغیر پڑھنا مکروہ ومعیوب ہے۔ البتہ عامی اور سادہ لوگ مستثنٰی ہیں۔
➌ رسول اللہﷺ کا نماز تہجد میں سورۃبقرہ۔ نساء۔ اور آل عمران وغیرہ پڑھنا بعض اوقات پرمحمول ہے۔ ورنہ آپ کی قراءت متوسط ہوا کرتی تھی۔
➍ رسول اللہ ﷺ نے اپنے حین حیات قرآن مجید مدون۔ ومرتب کروا دیا تھا۔ مگر وہ مختلف اوراق تختیوں اور چمڑے کے ٹکڑوں پر لکھا گیا تھا۔ حضرت ابو بکر صدیق رضی اللہ عنہ اور بعداذاں حضرت عثمان رض اللہ عنہ نے ایک مصحف اور ایک قراءت پر جمع فرما دیا۔ مختلف صحابہ کرام رضوان اللہ عنہم اجمعین کے پے پاس جو اپنے اپنے نسخے تھے۔ ان کی ترتیب مختلف تھی۔

اردو حاشہ:
1؎:
وہ سورتیں یہ ہیں:
﴿الرَّحْمنُ﴾ اور ﴿النَّجْم﴾ کو ایک رکعت میں،
﴿اِقْتَرَبَتْ﴾ اور ﴿الْحَآقَّہ﴾ کو ایک رکعت میں،
﴿الذّارِیَات﴾ اور ﴿الطُّوْر﴾ کو ایک رکعت میں،
”واقعہ“ اور ”نون“ کو ایک رکعت میں،
﴿سَأَلَ سَائِلٌ﴾ اور ﴿وَالنَّازِعَات﴾ کو ایک رکعت میں،
﴿عَبَسَ﴾ اور ﴿وَیْلٌ لِّلْمُطَفِّفِیْن﴾ کو ایک رکعت میں،
﴿الْمُدَّثِّرْ﴾ اور ﴿الْمُزَّمِّل﴾ کو ایک رکعت میں،
﴿هَلْ أَتَی عَلَی الْإِنْسَانِ﴾ اور ﴿لَاأُقْسِمُ﴾ کو ایک رکعت میں،
﴿عَمَّ یَتَسَألُوْن﴾ اور ﴿الْمُرْسَلَات﴾ کو ایک رکعت میں،
اور ﴿الشَّمْس کُوِّرَتْ﴾ اور ”الدُّخَان“ کو ایک رکعت میں۔

حدیث حاشیہ:
مفردات الحدیث:
(1)
آسِن:
وہ پانی جس کا ذائقہ اور رنگ بدل جائے اس کو ماء آسن یا ماء ياسن کہتے ہیں۔
(2)
هَذًّا كَهَذِّ الشِّعرِ:
جس طرح اشعار کو جلدی جلدی بلا سوچے سمجھے یاد کیا جاتا ہے اور نقل کیا جاتا ہے،
اس طرح تم نے بلا سوچے سمجھے ایک رکعت میں اتنی سورتیں پڑھ ڈالیں،
شعروں کی نقل و روایت میں تیزی ہوتی ہے لیکن مجمع میں پڑھتے وقت ترنم اور خوش الحانی کی جاتی ہے۔
(3)
لَا يُجَاوِزُ تَرَاقِيَهُمْ:
ترقوة ہنسلی کو کہتے ہیں،
یعنی قراءت دل تک نہیں پہنچتی اور اس کو متاثر نہیں کرتی،
محض زبان پر رواں رہتی ہے،
یا اوپر نہیں اٹھتی اور اللہ تعالیٰ کے ہاں شرف قبولیت حاصل نہیں کر پاتی۔
فوائد ومسائل:
قرآن مجید کی پہلی سات سورتوں کو طوال کہتے ہیں اور بعد والی دو سورتیں جن کی آیات سو سےاوپر ہیں،
مئین کہلاتی ہیں اور ان کے بعد والی جن کی آیات سو سے کم ہیں،
مثانی کہلاتی ہیں اور اس کے بعد سورۃ حجرات سے شروع ہونے والی سورتیں مفصل کہلاتی ہیں،
حجرات سے سورۃ بروج تک طوال مفصل اس سے آگے ﴿لَمْ يَكُنِ الَّذِينَ كَفَرُوا﴾ تک اوساط مفصل اور اس سے آگے آخر تک قصار مفصل ہیں،
گویا کہ نہیک نامی انسان نے آخری منزل ایک رکعت میں پڑھی تو حضرت عبد اللہ رضی اللہ تعالیٰ عنہ نے کہا تم نے ٹھہرٹھہر کر،
غوروفکر اور تدبر کے ساتھ قرآءت نہیں کی اور ابن نمیر کی روایت میں نہیک بن سنان کا نام نہیں ہے بلکہ بنو بجیلہ کے ایک آدمی کی آمد کا ذکر ہے۔

حدیث حاشیہ:
فوائد ومسائل:
(1)
شقیق ابو وائل کا نام ہے اور اُم عبد حضرت عبد اللہ بن مسعود رضی اللہ تعالیٰ عنہ کی والدہ ہیں۔
(2)
سورتوں کے جوڑے جوڑے حضرت عبد اللہ بن مسعود رضی اللہ تعالیٰ عنہ کے نسخہ کی روسے یہ ہیں۔
(1)
الرَّحْمَـٰنُ۔
وَالنَّجْمِ۔
(2)
اقْتَرَبَتِ السَّاعَةُ اور الْحَاقَّةُ۔
(3)
وَالطُّورِ اور الذَّارِيَاتِ۔
(4)
الْوَاقِعَةُ اور نون۔
(5)
سَأَلَ سَائِلٌ اور وَالنَّازِعَاتِ۔
(6)
وَيْلٌ لِّلْمُطَفِّفِينَ اور عَبَسَ۔
(7)
الْمُدَّثِّرُ اور الْمُزَّمِّلُ۔
(8)
هَلْ أَتَىٰ عَلَى الْإِنسَانِ اور لَا أُقْسِمُ۔
(9)
عَمَّ يَتَسَاءَلُونَ اور وَالْمُرْسَلَاتِ۔
(10)
دُخَانٍ اور إِذَا الشَّمْسُ كُوِّرَتْ۔
ان میں حٰم والی سورت صرف دُخَانٍ ہےاور تغلیباً إِذَا الشَّمْسُ کو آل حاميم میں شمار کیا گیا ہے۔
(3)
حضرت عبد اللہ بن مسعود رضی اللہ تعالیٰ عنہ کا مقصد یہ ہے کہ قرآن مجید ٹھہر ٹھہر کر،
معانی و مطالب غور وفکر کرتے ہوئے پڑھنا چاہیے جو انسان ایک رکعت میں ایک منزل پا لیتا ہے وہ اس پر غور وفکر نہیں کر سکتا اس لیے جو انسان قرآن مجید کے معانی سے آگاہ نہیں ہے وہ جس قدر چاہے پڑھ سکتا ہے،
بعض صحابہ کرام رضوان اللہ عنھم اجمعین سے ایک رکعت میں قرآن مکمل طور پڑھنا ثابت ہے کیونکہ اس وقت وہ صرف قرآءت کرتے تھے،
الفاظ کے معانی اورمطلب پر غور وفکر کو دوسرےاوقات میں اٹھا رکھتے تھے لیکن رسول اللہ صلی اللہ علیہ وسلم نے حضرت عبد اللہ بن مسعود رضی اللہ تعالیٰ عنہ کو تین راتوں سے کم میں قرآن مجید پڑھنے کی اجازت نہیں دی۔
(بخاری)

حدیث حاشیہ:
ابوذر کی روایت میں یوں ہے۔
حم کی سورتوں سے میں حم دخان اور عم یتساءلون۔
ابن خزیمہ کی روایت میں یوں ہے ان میں پہلی سورت سورۃ رحمان ہے اور آخیر کی دخان۔
اس روایت سے یہ نکلا کہ ابن مسعود رضی اللہ عنہ کا مصحف عثمانی ترتیب پر نہ تھا نہ نزول کی ترتیب پر کہتے ہیں۔
حضرت علی رضی اللہ عنہ کا مصحف بہ ترتیب نزول تھا۔
شروع میں سورۃ اقرأ پھر سورۃ مدثر، پھر سورۃ قلم اور اسی طرح پہلے سب مکی سورتیں تھیں۔
پھر مدنی سورتیں اور مصحف عثمانی کی ترتیب صحابہ رضی اللہ عنہ کی رائے اور اجتہاد سے ہوئی تھی۔
جمہور علماء کا یہی قول ہے یعنی سورتوں کی ترتیب لیکن آیتوں کی ترتیب باتفاق علماء توقیفی ہے، یعنی پہلی لکھی ہوئی حضرت جبریل آنحضرت صلی اللہ علیہ وسلم سے کہہ دیتے تھے اس آیت کو وہاں رکھو اور اس آیت کو وہاں تو آیتوں میں تقدیم تاخیر کسی طرح جائز نہیں اور اسی مضمون کی ایک حدیث ہے جس کو حاکم اور بیہقی نے نکالا۔
حاکم نے کہا وہ صحیح ہے۔
بخاری نے علامات النبوۃ میں وصل کیا۔
حافظ صاحب فرماتے ہیں۔
علی تالیف ابن مسعود فیه دلالة علی أن تألیف ابن مسعود علی غیر التألیف العثماني وکان أوله الفاتحة ثم البقرة ثم النساء ثم آل عمران ولم یکن علی ترتیب النزول و یقال إن مصحف علی کان علی ترتیب النزول أوله اقرأ ثم المدثر ثم النون والقلم ثم المزمل ثم تبت ثم التکویر ثم سبح اسم و ھکذا إلی آخر المکي ثم المدني واللہ أعلم۔
(فتح الباري)
یعنی لفظ علی تالیف ابن مسعود میں دلیل ہے کہ حضرت ابن مسعود کا تالیف کردہ قرآن شریف مصحف عثمانی سے غیر تھا اس میں اول سورۃ فاتحہ پھر سورۃ بقرہ پھر سورۃ نساء پھر سورۃ آل عمران درج تھیں اور ترتیب نزول کے موافق نہ تھا ہاں کہا جاتا ہے کہ مصحف علی ترتیب نزول پر تھا۔
وہ سورۃ اقرأ سے شروع ہوتا تھا۔
پھر سورۃ مدثر پھر سورۃ نون پھر سورۃ مزمل پھر سورۃ تبت پھر سورۃ تکویر پھر سورۃ سبح اسم پھر اس طرح پہلے کی سورتیں پھر مدنی سورتیں اس میں درج تھیں۔
بہرحال جو ہوا منشائے الٰہی کے تحت ہوا کہ آج دنیائے اسلام میں مصحف عثمانی متداول ہے اور دیگر مصاحف کو قدرت نے خود گم کر دیا تا کہ نفس قرآن پر امت میں اختلاف پیدا نہ ہو سکے۔
بعون اللہ ایسا ہی ہوا اور قیامت تک ایسا ہی ہوتا رہے گا۔
﴿وَ لَو کَرِہَ الکَافِرُونَ﴾ ۔

حدیث حاشیہ:
حضرت عبداللہ بن مسعود ؓ نے جن جوڑا جوڑا سورتوں کی نشاندہی کی ہے ان میں سے بعض موجودہ ترتیب مصحف سے مختلف ہیں جن کی تفصیل بایں طور بیان ہوئی ہے:
٭ سورۂ رحمٰن اور سورۂ نجم۔
٭سورۂ قمر اور سورۂ حاقہ۔
٭سورۂ زاریات اور سورۂ طور۔
٭ سورۂ واقعہ اور سورۂ نون۔
٭سورۂ معارج اور سورۂ نازعات۔
٭ سورۂ مطففین اور سورۂ عبس۔
٭سورۂ دھر اور سورۂ قیامہ۔
٭ سورۂ مزمل اور سورۂ مدثر۔
٭سورۂ نبااور سورۂ مرسلات۔
٭ سورۂ تکویر اور سورۂ دخان۔
انھیں مفصل کی سورتیں اکثریت کی بنا پر کہا جاتا ہے کیونکہ سورۂ دخان مفصل میں سے نہیں۔
(فتح الباري: 336/2)
اس حدیث سے ایک رکعت میں دو سورتیں پڑھنے اور موجودہ ترتیب کے خلاف پڑھنے کا جواز معلوم ہوتا ہے۔
والله أعلم

حدیث حاشیہ:
1۔
ہم اس سے پہلے کتاب الصلاۃ میں ان سورتوں کی تفصیل بیان کر آئے ہیں جنھیں رسول اللہ صلی اللہ علیہ وسلم نماز میں دو، دو کر کے پڑھا کرتے تھے۔
2۔
اس حدیث سے معلوم ہوتا ہے کہ حضرت عبداللہ بن مسعود رضی اللہ تعالیٰ عنہ کے مصحف کی ترتیب مصحف عثمانی سے مختلف تھی۔
اس میں پہلے سورہ فاتحہ، پھر سورہ بقری، اس کے بعد سورہ نساء، پھر سورہ آل عمران تھی اور وہ ترتیب نزولی کے مطابق بھی نہ تھا۔
3۔
بیان کیا جاتا ہے کہ حضرت علی رضی اللہ تعالیٰ عنہ کا مصحف ترتیب نزول کے مطابق تھا اور سورہ اقرأ سے شروع ہوتا تھا، پھر سورہ مدثر اس کے بعد سورہ نون، یعنی پہلے مکی سورتوں کا اور پھر مدنی سورتوں کا اندراج تھا۔
4۔
بہرحال آج دنیا میں مصحف عثمانی ہی رائج ہے۔
اللہ تعالیٰ نے اسے پزیرائی دی ہے جو دوسرے مصاحف کو نہیں مل سکی۔
غالباً اس مصحف کی وہی ترتیب ہے جس کے مطابق رسول اللہ صلی اللہ علیہ وسلم نے حضرت جبرئیل علیہ السلام سے آخری دور کیا تھا۔
واللہ اعلم۔