اردو حاشہ:
(1)
حضرت محمود بن ربیع رضی اللہ عنہ صغار صحابہ میں سے ہیں، یعنی جب انھوں نے رسول اللہ ﷺ کی زیارت کی تھی تو ان کا بچپن کا دور تھا۔
جب کلی کرنے کا یہ واقعہ پیش آیا اس وقت حضرت محمود کی عمر پانچ سال تھی۔
اس سے محدثین نے یہ اصول اخذ کیا ہے کہ جو بچہ پانچ سال کی عمرمیں کسی محدث سے حدیث سنے اس کا سماع معتبر ہے۔
یہ بچہ بڑا ہو کر یہ حدیث روایت کرسکتا ہے اور وہ روایت قبول کی جائے گی۔
بشرطیکہ کوئی اور ایسا سبب نہ پایا جائے جس سے حدیث ضعیف ہوجائے۔

(2)
رسول اللہ ﷺ کا کنوئیں میں کلی فرمانا برکت کے لیے تھا۔
آپ کے لعاب دہن سے متعدد مواقع پر برکت کا ظہور ہوا ہے جو حدیث اور سیرت کی کتابوں میں مذکور ہے۔
دیکھے:
(صحیح البخاری، العلم، باب متی یصح سماع الصغیر، حدیث: 77)
اس سے مقصد محض دل لگی اور بچے کو خوش کرنا تھا لہٰذا بچوں سے ایسی دل لگی جس سے انھیں پریشانی نہ ہو جائز ہےاور یہ بزرگانہ شفقت کا ایک لطیف انداز ہے۔

(4)
حضرت عتبان رضی اللہ عنہ کے گھر ایک نشیبی جگہ تھی۔
بارش کے موقع پر وہاں سے پانی گزرتا تھا جس سے راستہ بند ہوجاتا تھا اور پانی میں سے گزر کر مسجد میں پہنچنا دشوار ہوجاتا تھا۔
اس قسم کے عذر کے موقع پر گھر میں نماز پڑھنا جائز ہے۔
مسجد میں حاضری واجب نہیں۔
لیکن معمولی بارش کونماز باجماعت سے پیچھے رہ جانے کا بہانہ بنا لینا درست نہیں۔

(5)
جس کو دعوت دی جائے وہ اپنے ساتھ کسی اور کو بھی لاسکتا ہے۔
بشرطیکہ یہ یقین ہو کہ میزبان کو اس سے زحمت نہیں ہوگی بلکہ خوشی ہوگی۔
ورنہ بلائے ہوئے مہمان کے ساتھ بن بلائے چلے جانا درست نہیں میزبان کو حق ہے کہ اسے گھر میں داخل ہونے کی اجازت نہ دے۔ دیکھیے: (صحيح البخاري، الاطعمة، باب الرجل يدعي الي طعام فيقول:
وهذا معي، حديث: 5461)

(6)
جس کو بلایا گیا ہو اسے بھی گھر میں داخل ہوتے وقت اجازت لیکر داخل ہونا چاہیے۔

(7)
گھر میں نماز کے لیے ایک جگہ مقرر کرلینا جائز ہے۔

(8)
کسی اچھے کام کی ابتداء کے موقع پر کسی نیک اور بزرگ شخصیت سے ابتدا کروانا درست ہے۔

(9)
نفل نماز باجماعت ادا کرنا جائز ہے نماز تہجد باجماعت کے متعدد واقعات کتب احادیث میں مروی ہیں۔ دیکھیے: (صحيح البخاري، التهجد، باب تحريض النبي ﷺ علي قيام اليل۔
۔
۔
۔
، حدیث: 1129)
اور زيرمطالعہ حدیث کے مطابق چاشت کی نماز جماعت سے ادا کی گئی۔

(10)
قرآن مجید میں حکم ہے کہ کھانے کے لیے جس وقت بلایا گیا ہو اسی وقت جانا چاہیے بہت پہلے جا کر کھانا تیار ہونے کا انتطار کرنا اچھا نہیں۔ (سورہ احزاب آیت: 53)
زیر مطالعہ حدیث میں جو واقعہ مذکور ہے اس میں پہلے سے کھانے کا پروگرام نہیں تھا۔
جب نبی ﷺ تشریف لے آئے تو کھانا تیار کیا جانے لگا اور نبی ﷺ سے گزارش کی گئی کہ تھوڑا انتظار فرمالیں۔
یہ صورت قرآن مجید میں مذکورہ صورت سے مختلف ہے۔
حدیث میں جس کھانے کے لیے (خزيرة)
کا لفظ استعمال ہوا ہے وہ ایک خاص قسم کا کھانا ہے جو اس دور میں عرب میں رائج تھا۔
گوشت کے چھوٹے چھوٹے ٹکرے کرکے بہت سے پانی میں پکاتے تھے جب خوب گل جاتا تو اس میں آٹا ڈال دیتے تھے اور تیار ہونے پر پیش کرتے تھے۔

فوائد و مسائل:
باب اور حدیث میں مناسبت:
امام بخاری رحمہ اللہ رحمہ الله نے باب قائم فرمایا کہ مقتدی امام کو سلام کا جواب علیحدہ نہ دے یعنی وہی سلام کا جواب کافی ہو گا جو نماز میں سلام کہا گیا اور حدیث میں بھی یہی وارد ہے کہ «ثم سلّم وسلّمنا حين سلّم» پھر آپ نے نماز سے سلام پھیری اور آپ کے سلام کے وقت ہم نے بھی سلام کہی۔
لہٰذا یہیں سے باب اور حدیث میں مناسبت ہے۔
◈ حافظ ابن حجر رحمہ اللہ رحمہ الله رقمطراز ہیں:
«واعتماده فيه على قوله: ثم سلم وسلمنا حين سلّم، فان ظاهره انهم سلموا نظير سلامه، وسلامه اما واحدة وهى التى يتحلل بها من الصلاة واما هي أخري معها، فيحتاج من استحب تسليمه ثالثة على الامام بين التسليمتين، كما تقوله المالكية . إلى دليل خاص، وإلي رد ذالك اشار البخاري . . . .» [فتح الباري ج2 ص411]
یعنی ظاہر اس حدیث سے (آپ نے سے سلام پھیرا اور آپ کے سلام کے وقت ہم نے بھی سلام پھیرا) یہ معلوم ہوتا ہے کہ مقتدیوں نے امام کے جواب میں علیحدہ کوئی سلام نہیں کہا اس لئے کہ سلام کا جواب اصل سلام کے بعد ہوتا ہے اور مذکورہ بالا حدیث سے یہ بھی ثابت ہوا کہ مقتدیوں کی سلام نبی کریم صلی اللہ علیہ وسلم کی سلام کی طرح تھی آپ کی سلام ایک بار تھی جس کے ساتھ آدمی نماز سے حلال ہو جاتا ہے یا وہ دو بار تھیں جس مقتدیوں کی سلام بھی دوبارہ ہو گی نہ کہ تین مرتبہ جیسا کہ مالکیہ کہتے ہیں۔ پس یہیں سے ترجمۃ الباب اور حدیث میں مناسبت ظاہر ہوتی ہے۔
لہٰذا معلوم ہوا کہ مالکیہ کا مسلک صحیح معلوم نہیں ہوتا جو تین بار سلام کے قائل ہیں۔
◈ صاحب توفیق الباری ڈاکٹر عبدالکبیر رقمطراز ہیں:
اس کے الفاظ «وسلمنا حين سلّم» سے یہ استدلال مقصود ہے کہ مقتدی امام کے سلام کے الفاظ «السلام عليكم ورحمة الله» ہی استعمال کریں گے۔ یہ نہیں کہ امام کے سلام کے جواب میں «و عليكم السلام» کہہ دیں۔ مالکیہ کا مسلک ہے کہ ان دونوں سلام کے درمیان مقتدی امام کے سلام کا جواب دیں مگر اس کی کوئی دلیل نہیں ہے۔ [توفيق الباري شرح صحيح البخاري ج1 ص746]
◈ صدیق حسن خان القنوجی فرماتے ہیں:
«. . . . . . فيحتاج من استحب تسليمة ثالثة على الامام بين التسليمتين كما يقوله المالكية الي دليل خاص وإلي رد ذالك أشار البخاري فى الترجمة بقوله بابب من لم يرد السلام على الامام . .» [عون الباري ج 2 ص 59]
”یعنی مالکیہ دو سلام کے درمیان تیسرے سلام کے قائل ہیں۔ لہٰذا امام بخاری رحمہ اللہ نے ترجمۃ الباب کے ذریعہ ان کے اس تیسرے سلام کا رد فرمایا ہے کہ امام کو (تیسرا) سلام کرنے کی ضرورت نہیں، صرف نماز کے دو سلام ہی کافی ہوں گے۔‏‏‏‏“
◈ ابن بطال رحمہ اللہ فرماتے ہیں:
«أظنه كان قصد الرد على من يوجب التسليمة الثانية»
”یعنی میرے خیال سے امام بخاری رحمہ اللہ نے ان لوگوں کے رد کا قصد کیا جو دوسرے سلام کے بھی قائل ہیں (یعنی سلام کے جواب دینے کے)۔‏‏‏‏“ [شرح ابن بطال: 2؍456]

فائدہ: امام بخاری رحمہ اللہ نے مذکورہ بالا حدیث کو کم و بیش بیس جگہ سے زیادہ مقامات پر روایت کیا ہے اور اس حدیث سے کئی اہم ترین مسائل کی تخریج فرمائی ہے۔ اسی حدیث کو ایک اور مقام پر بیان فرمایا جس پر امام بخاری رحمہ اللہ نے باب قائم فرمایا ہے کہ۔ «باب المساجد فى البيوت» یعنی اس بیان میں (کہ بوقت ضرورت) گھروں میں جائے نماز مقرر کرنا۔
◈ حافظ ابن حجر رحمہ اللہ نے اس حدیث سے کئی اہم مسائل کی نشاندہی فرمائی ہے۔ مثلاً:
① اندھے کی امامت کا جائز ہونا۔
② اپنی بیماری کا بیان کرنا شکایت میں داخل نہیں۔
③ مذکورہ حدیث سے یہ بھی واضح ہوتا ہے کہ مدینہ میں مسجد نبوی کے علاوہ دیگر مساجدوں میں نماز کا اہتمام تھا۔
④ عتبان رضی اللہ عنہ جیسے معذوروں کے لیے اندھیرے اور بارشوں میں جماعت کا معاف ہونا۔
⑤ بوقت ضرورت (شرعی عذر کے) نماز گھر میں پڑھنے کے لئے ایک جگہ کا مقرر کرنا۔
⑥ صفوں کا برابر کرنا۔
⑦ ملاقات کے لیے آنے والے بڑے آدمی کی امامت کا جائز ہونا بشرط یہ کہ صاحب خانہ اجازت دیں۔
⑧ نبی کریم صلی اللہ علیہ وسلم نے جہاں نماز ادا فرمائی وہاں کا متبرک ہونا۔
⑨ اگر کسی صالح نیک انسان کو گھر میں برکت کے لئے بلایا جائے تو اس کا جائز ہونا۔
⑩ بڑے لوگوں کا چھوٹے بھائیوں کی دعوت کو قبول کرنا۔
⑪ وعدہ پورا کرنا اور اس کے لئے ان شاء اللہ کہنا۔
⑫ اگر میزبان پر بھروسہ ہے تو بغیر بلائے ہوئے اپنے ساتھ دوسرے احباب کو لے جانا۔
⑬ گھر میں داخل ہونے سے قبل صاحب خانہ سے اجازت طلب کرنا۔
⑭ اہل محلہ کا عالم یا امام کے پاس جمع ہونا برکت حاصل کرنے کے لئے۔
⑮ جس سے دین میں نقصان کا ڈر ہو اس کا حال امام کے سامنے بیان کر دینا۔
⑯ ایمان میں صرف زبانی اقرار کافی نہ ہو گا جب تک دل میں یقین اور ظاہر میں عمل نہ ہو۔
⑰ توحید پر مرنے والے کا ہمیشہ دوزخ میں نہ رہنا۔
⑱ برسات میں گھر میں نماز پڑھ لینا۔
⑲ نوافل جماعت سے ادا کرلینا۔
نوٹ: محترم قاری نکتہ 15، 16، 17 یہ تینوں نکا ت کے لئے اسی حدیث کا وہ طرق جہاں اس حدیث کو مزید تفصیل سے امام بخاری رحمہ اللہ نے ذکر کیا ہے اسکی طرف مراجعت فرمائیں۔ «باب المساجد فى البيوت»

تخریج الحدیث:
[الموطأ رواية يحييٰ بن يحييٰ 172/1 ح 416، ك 9، ب 24، ح 82، التمهيد 226،227/6، الاستذكار: 382 ● أخرجه البخاري 667، عن مالك به ورواه مسلم 33 بعد ح 657، من حديث ابن شهاب الزهري به نحو المعني]
تفقه:
➊ شرعی عذر کے بناء پر گھر میں نماز پڑھنا اور پڑھانا جائز ہے۔
➋ نبی اکرم صلی اللہ علیہ وسلم کے آثار سے تبرک حاصل کرنا صحیح ہے۔
➌ ایک روایت میں آیا ہے کہ نبی اکرم صلی اللہ علیہ وسلم نے عتبان رضی اللہ عنہ کو گھر میں نماز پڑھنے کی اجازت نہیں دی تھی۔ دیکھئے: [مسند الامام أحمد 43/4 وطبقات ابن سعد 550/3 التمهيد 229/6] لیکن یہ روایت سفان بن عینیہ و زہری کی تدلیس اور سند میں شک کی وجہ سے ضعیف و مردود ہے۔
➍ نماز باجماعت ضروری ہے إلا یہ کہ شرعی عذر ہو۔
➎ کسی مسجد، مدرسے اور مکان وغیرہ کا کسی نیک شخصیت کے ذریعے سے افتتاح کرانا جائز ہے۔
گھر میں نماز کے لئے کسی حصے کو مختص کرنا جائز ہے۔
➐ نماز باجماعت کے لئے جگہ کا مسجد کے لئے وقف ہونا ضروری نہیں ہے۔
➑ نابینا امام کی امامت بالکل صحیح اور شرعاً جائز ہے۔

789 ۔ اردو حاشیہ:
➊ نابینے کی امامت میں اختلاف ہے۔ بعض کہتے ہیں کہ مکروہ ہے کیونکہ وہ نجاست سے بچ نہیں سکتا۔ بعض نے اس کے برعکس کہا ہے کہ اس کی امامت افضل ہے کیونکہ نظر نہ ہونے کی وجہ سے اس میں خشوع و خضوع زیادہ ہو گا۔ یہ دونوں قول محض رائے کی بنیاد پر ہیں۔ صحیح بات یہ ہے کہ نابینے کی امامت صرف جائز ہے لیکن قاریٔ قرآن اور پرہیز گار صاحب علم کو مقدم کرنا افضل ہے۔ نجاست تو آنکھوں والے کو بھی لگ سکتی ہے بلکہ لگ جاتی ہے اور نابینے کا والی بھی اللہ تعالیٰ ہے اور وہ اسے بصیرت عطا فرماتا ہے۔ بڑے بڑے اجل صحابہ نابینا تھے تو کیا وہ پلید ہی رہتے تھے؟ نعوذ باللہ من ذالك۔
➋ نبی صلی اللہ علیہ وسلم سے گھر میں نماز کی گزارش بطور تبرک تھی۔ تفصیل کے لیے دیکھیے: حدیث نمبر: 702 کا فائدہ نمبر: 4 اور اس کتاب کا ابتدائیہ۔

845 ۔ اردو حاشیہ: نفل نماز کی جماعت اتفاقاً ہو جائے تو کوئی حرج نہیں لیکن لوگوں کو دعوت دے کر نہ بلایا جائے، البتہ مخصوص نمازیں اس سے مستثنیٰ ہیں، مثلاً: نماز کسوف، نماز استسقاء، نماز عیدین اور نماز تراویح وغیرہ۔ ان کے لیے لوگوں کو بلانا جائز ہے کیونکہ ان کا سنت سے ثبوت ملتا ہے مگر ان کے لیے اذان و اقامت درست نہیں۔

1328۔ اردو حاشیہ:
➊ جب امام سلام کہے تو اگر مقتدی کی نماز مکمل ہو گئی ہے تو وہ بھی سلام کہہ دے۔ اگر اس کی نماز مکمل نہیں ہوئی تو وہ نماز مکمل کرنے کے بعد سلام پھیرے۔
➋ آدمی کو اگر کوئی تکلیف ہو تو وہ اس کے متعلق بتلا سکتا ہے، یہ شکوہ نہیں سمجھا جائے گا۔
➌ مدینہ منورہ میں نبی صلی اللہ علیہ وسلم کی مسجد کے علاوہ بھی مسجدیں تھیں۔
➍ اگر بارش وغیرہ جیسے شرعی عذر کی بنا پر جماعت رہ جائے تو گناہ نہیں۔
➎ شرعی عذر کی وجہ سے گھر میں نماز کے لیے جگہ متعین کر لینا جائز ہے۔
➏ نماز کے لیے صف درست کرنا لازم ہے۔
➐ اس حدیث مبارکہ سے وعدہ وفا کرنے کی حیثیت نمایاں ہوتی ہے۔
➑ کسی کے گھر میں داخل ہونے سے پہلے اجازت لینا ضروری ہے، بغیر اجازت کوئی بھی کسی کے گھر میں داخل نہیں ہو سکتا جیسا کہ نبیٔ اکرم صلی اللہ علیہ وسلم اپنے صحابہ کے گھر میں بھی بغیر اجازت داخل نہیں ہوئے تھے۔ اگر صاحب خانہ اندر داخل ہونے کی اجازت نہ دیں تو برا محسوس نہیں کرنا چاہیے۔
➒ نفل نماز میں جماعت کرانا مشروع ہے۔

حدیث حاشیہ:
مقصد یہ ہے کہ جہاں نماز باجماعت کی شدید تاکید ہے وہاں شریعت نے معقول عذروں کی بنا پر ترک جماعت کی اجازت بھی دی ہے۔
جیسا کہ احادیث بالا سے ظاہر ہے۔

حدیث حاشیہ:
دوسری حدیث میں مروی ہے کہ کسی شخص کو اجاز ت نہیں کہ دوسری جگہ جاکر ان کے امام کی جگہ خود امام بن جائے۔
مگر وہ لوگ خود چاہیں اور ان کے امام بھی اجازت دیں تو پھر مہمان بھی امامت کرا سکتا ہے۔
ساتھ ہی یہ بھی ہے کہ بڑا امام جسے خلیفہ وقت یا سلطان کہہ جائے چونکہ وہ خود آمر ہے، اس لیے وہاں امامت کراسکتا ہے۔

حدیث حاشیہ:
جمہور فقہاءکے نزدیک نماز میں دو سلام ہیں۔
لیکن امام مالک ؒ کے نزدیک تنہا نماز پڑھنے والے کے لیے صرف ایک سلام کافی ہے اورنماز با جماعت ہو رہی ہو تو دو سلام ہونے چاہئیں۔
امام کے لیے بھی اور مقتدی کے لیے بھی۔
لیکن اگر مقتدی امام کے بالکل پیچھے ہے یعنی نہ دائیں جانب نہ بائیں جانب تو اسے تین سلام پھیرنے پڑیںگے۔
ایک دائیں طرف کے مصلیوں کے لیے دوسرا بائیں طرف والوں کے لیے اور تیسرا امام کے لیے۔
گویااس سلام میں بھی انہوں نے ملاقات کے سلام کے آداب کا لحاظ رکھا ہے امام بخاری ؒ جمہور کے مسلک کی ترجمانی کر رہے ہیں۔
(تفہیم البخاری)
حضرت امام بخاری ؒ اس حدیث کو کئی جگہ لائے ہیں اور اس سے متعدد مسائل کا استنباط فرمایا ہے۔
یہاں اس حدیث سے باب کا مطلب یوںنکلا کہ ظاہر یہ ہے کہ مقتدیوں کا سلام بھی انحضرت ﷺ کے سلام کی طرح تھا اور اگر مقتدیوں نے کوئی تیسرا سلام کہا ہوتا تو اس کا ضرور بیان کرتے یہ بھی حدیث سے نکلا کہ معذورین کے لیے اور نوافل کے لیے گھر کے کسی حصہ میں نماز کی جگہ متعین کر دیجائے تو اس کی اجازت ہے۔
یہ بھی ثابت ہے کہ کسی واقعی اہل اللہ بزرگ سے اس قسم کی درخواست جائز ہے۔

حدیث حاشیہ:
1۔
اس عنوان کے دو جز ہیں۔
مہمان اپنے اختیار سے جہاں چاہے نماز پڑھ لے۔
جس جگہ اہل خانہ کہیں وہیں نماز ادا کرے۔
ان دونوں اجزاء کے درمیان کلمہ (اَؤ)
ہےجو دو معنوں میں استعمال ہوتا ہے۔
تخبیر مہمان کو ان دونوں میں سے کسی بھی ایک صورت کا اختیار ہے، چاہے تو گھر میں داخل ہونے کی اجازت سے فائدہ اٹھاتے ہوئے جہاں چاہے نماز پڑھ لے اور چاہے تو اہل خانہ کی نشان دہی کے مطابق عمل کرے۔
یعنی اسے ان دونوں باتوں میں سے کسی بھی صورت پر عمل کرنے کی آزادی ہے۔
تعیین احد الامرین کلمہ اَو دونوں صورتوں میں سے ایک کی تعیین کے لیے ہے۔
اس کا مطلب یہ ہو گا کہ مہمان کو ان دونوں صورتوں میں سے کس صورت کو اختیار کرنا ہے۔
یہ معنی لینے میں اس پہلے (هَل)
مقدور ہوگا۔
2۔
اس مختصر روایت سے معلوم ہوتا ہے کہ میزبان کی خواہش کا احترام کیا جائے، خود اپنی مرضی سے کوئی اقدام نہ کیا جائے، کیونکہ اس روایت میں وضاحت ہے کہ رسول اللہ ﷺ نے خود پوچھا کہ تم اپنے گھر میں کس جگہ نماز پڑھنے کو پسند کرتے ہو تاکہ میں وہاں نماز پڑھوں، لیکن تفصیلی روایت سے معلوم ہوتا ہےکہ میزبان کو اپنے اختیارات استعمال کرنے کا حق ہے، کیونکہ حضرت عتبان بن مالک ؓ نے رسول اللہ ﷺ سے عرض کیا تھا کہ آپ میرے گھر تشریف لا کر کسی بھی جگہ نماز پڑھ دیں تاکہ میں اس متبرک مقام کو خانگی مسجد بنا لوں۔
لیکن امام بخاری ؒ نے عنوان میں جو:
(لَايَتَجَسَّسُ)
کے الفاظ کا اضافہ کیا ہے کہ وہ تجسس نہ کرے، اس سے بھی معلوم ہوتا ہے کہ وہ اہل خانہ کی مرضی کا پابند ہے، کیونکہ جہاں چاہے نماز پڑھنے میں یہ بھی ہو سکتا ہے کہ ایسی جگہ پڑھنا چاہے جہاں گھر والوں کو پسند نہ ہو یا اہل خانہ کے ستر و حجاب کے منافی ہو یا ایسی جگہ پڑھنا چاہے جہاں ان کا ایسا گھریلوسامان پڑا ہو جسے وہ کسی پر ظاہر نہ کرنا چاہتے ہوں وغیرہ۔
ہاں!اگر گھر والا ہی عام اجازت دے دے کہ جہاں چاہے نماز پڑھ لے تو پھر اپنے اختیارات استعمال کرنے میں کوئی حرج نہیں۔
یہ تو عام بات کے متعلق تفصیل ہے، لیکن اگر کوئی کسی بزرگ کو اسی مقصد کے لیے بلاتا ہے تو بزرگ کو چاہیے کہ وہ اہل خانہ سے جگہ دریافت کرے۔
جیسا کہ رسول اللہ ﷺ نے حضرت عتبان ؓ سے دریافت فرمایا تھا۔
الغرض امام بخاری ؒ کا مقصد ان دونوں صورتوں میں سے ایک کی تعیین معلوم ہوتا ہے۔
اگرچہ دونوں صورتوں میں سے کسی بھی صورت پر عمل کرنے کی آزادی بھی ہو سکتا ہے، تاہم اس کے لیے روایت کے دیگر طرق میں ذکر کردہ تفصیلات کا سہارا لینا پڑے گا۔
حافظ ابن حجر ؒ نے ابن منیر ؒ کے حوالے سے اس دوسری صورت کو ترجیح دی ہے۔
(فتح الباري: 671/1)
لیکن دل اس پر مطمئن نہیں۔
واللہ أعلم۔

حدیث حاشیہ:
(1)
اس حدیث سے معلوم ہوا کہ سیلاب،اندھیرا اور نابینا ہونا ہر ایک ترک جماعت کےلیے مستقل عذر ہے کیونکہ ان میں علت مشقت موجود ہے۔
عذر خواہ کوئی بھی ہو اگر اس میں مشقت موجود ہے تو وہ عذر قابل التفات ہے بصورت دیگر نہیں۔
اور اس بات کا فیصلہ خود انسان کا ضمیر کرسکتا ہے کہ موجودہ صورت حال عذر کے لیے قابل قبول ہوسکتی ہے یا محض ایک بہانہ سازی ہے کیونکہ انسانی ضمیر ہی اپنے حالات کا صحیح ادراک رکھنے کی وجہ سے درست فیصلہ کرنے کی پوزیشن میں ہوتا ہے (بشرطیکہ وہ مردہ نہ ہوچکا ہو)
۔
(شرح الکرمانی: 2/54) (2)
رسول اللہ صلی اللہ علیہ وسلم نے حضرت عتبان رضی اللہ عنہ کو ترک جماعت کی اجازت دے دی لیکن حضرت ابن ام مکتوم رضی اللہ عنہ کو اجازت نہ دی جبکہ وہ بھی نابینا تھے،اس کی چند ایک وجوہات ہوسکتی ہیں، مثلا:
٭ رسول اللہ صلی اللہ علیہ وسلم نے حضرت عتبان رضی اللہ عنہ کے لیے رخصت کو پسند فرمایا اور حضرت ابن ام مکتوم رضی اللہ عنہ کے لیے عزیمت کا انتخاب فرمایا۔
٭حضرت عتبان رضی اللہ عنہ اذان نہ سنتے ہوں گے جبکہ حضرت ابن ام مکتوم رضی اللہ عنہ اذان کی آواز سنتے تھے جیسا کہ حدیث میں اس کی صراحت ہے۔
٭ممکن ہے حضرت ابن ام مکتوم رضی اللہ عنہ کا عذر حضرت عتبان رضی اللہ عنہ کے مقابلے میں کم درجے کا ہو،اس لیے انھیں اجازت نہیں دی گئی۔ w

حدیث حاشیہ:
اصل یہ ہے کہ جب کوئی شخص کسی کہ ہاں ملاقات کے لیے جائے تو نہ امامت کے مصلے پر کھڑا ہو اور نہ ان کی مسند عزت پر ہی فروکش ہو۔
جیسا کہ حدیث میں ہے، البتہ دو صورتوں میں مہمان کو میزبان کے گھر میں امام بنایا جاسکتا ہے:
٭میزبان خود مہمان سے امامت کی درخواست کرے یاا سے اجازت دےدے٭ مہمان بڑا امام، یعنی خلیفۂ وقت ہو۔
میزبان کو چاہیے کہ اگر مہمان خلیفۂ وقت ہے تو خود ہی اسے امامت کی پیش کش کردے۔
حافظ ابن حجر ؒ فرماتے ہیں کہ جن روایات میں دوسرے کے گھر جاکر امامت نہ کرانے کا ذکر ہے امام بخاری ؒ اس حکم امتناعی سے”خلیفۂ وقت“ کو مستثنیٰ قراردینا چاہتے ہیں کہ اسے اجازت ہے جہاں جائے وہاں نماز پڑھائے، کیونکہ اسے ولایت عظمیٰ حاصل ہے۔
اس بنا پر عنوان میں امام کی قید احترازی ہے۔

حدیث حاشیہ:
(1)
بعض فقہاء کا موقف ہے کہ نماز کے آخر میں صرف ایک مرتبہ سلام کہا جائے جیسا کہ سعد بن ابی وقاص ؓ سے روایت ہے کہ رسول اللہ ﷺ نماز کے آخر میں صرف ایک مرتبہ السلام علیکم کہتے تھے۔
(شرح معاني الآثار: 266/1، والاستذکار: 291/4)
لیکن اکثر فقہاء و محدثین نے اس موقف کو اختیار کیا ہے کہ نماز کے آخر میں دو دفعہ سلام کہا جائے ایک دائیں جانب اور دوسرا بائیں جانب، اسے سلام نماز بھی کہتے ہیں۔
تقریبا بیس صحابۂ کرام رضی اللہ عنہم سے دو دفعہ سلام کہنا مروی ہے اور ایک دفعہ سلام کہنے کی روایت وہم پر مبنی ہے کیونکہ حضرت ابن مبارک نے اس روایت کو دو سلام سے بیان کیا ہے۔
(عمدة القاري: 601/4)
ہمارے نزدیک راجح بات یہی ہے کہ ایک سلام پر اکتفا بھی جائز ہے، اگرچہ اکثر و بیشتر آپ کی عادت مبارکہ دو سلام کی تھی، اس لیے اسے وہم قرار دینا محل نظر ہے، نیز یہ سلام سامنے منہ کر کے ہی پھیرنا ہے۔
دیکھیے:
(أصل صفة صلاة النبي صلی اللہ علیه وسلم: 1030/3)
بعض روایات میں ہے کہ امام کو بھی سلام کہنا چاہیے جیسا کہ حضرت سمرہ بن جندب ؓ کہتے ہیں کہ رسول اللہ ﷺ نے ہمیں امام کو سلام کہنے کا حکم دیا تھا۔
(سنن أبي داود، الصلاة، حدیث: 1001)
اس کی توجیہ بعض شارحین نے بایں طور فرمائی ہے کہ ایک سلام دائیں جانب، دوسرا بائیں جانب والوں کو، اور تیرے سامنے امام کو کیا جائے۔
امام بخاری ؒ نے اس موقف کی تردید فرمائی ہے کیونکہ امام کو سلام کہنے کا مطلب ہے کہ جو شخص دائیں جانب ہے وہ بائیں سلام میں اور جو بائیں جانب ہے وہ دائیں سلام میں امام کے لیے سلام کی نیت کرے اور جو امام کے پیچھے ہے وہ پہلے سلام میں امام کی نیت کرے۔
(2)
حدیث کی عنوان سے مطابقت اسی طرح ہے کہ روایت کے مطابق پہلے رسول اللہ ﷺ نے سلام پھیرا، پھر قوم نے بھی سلام پھیر دیا۔
اس میں تیسرے سلام کا کوئی ذکر نہیں ہے۔
(عمدة القاري: 602/4)
حافظ ابن حجر ؒ نے بھی لکھا ہے کہ حدیث کے ظاہر الفاظ سے معلوم ہوتا ہے کہ صحابۂ کرام رضی اللہ عنہم نے رسول اللہ ﷺ کی متابعت میں آپ کے سلام جیسا سلام کیا اور آپ کا سلام ایک تھا جس سے نماز ختم کی گئی یا اس کے ساتھ دوسرا سلام بھی تھا، تیسرے سلام کے لیے دلیل درکار ہے جیسا کہ بعض مالکی حضرات کا موقف ہے۔
امام بخاری رحمہ اللہ نے اس مؤخر الذکر موقف کی تردید کے لیے عنوان بندی کی ہے اور حدیث پیش کی ہے۔
(فتح الباري: 418/2)
واللہ أعلم۔