861۔ اردو حاشیہ:
➊ مذکورہ بالا چھ روایات «حديث مسئي الصّلاة» کے نام سے مشہور و معروف ہیں۔ (یعنی وہ آدمی جس نے غلط انداز میں نماز پڑھی تھی) اس کا نام خلاد بن رافع رضی اللہ عنہ ہے۔
➋ علم نہ ہونے کے عذر سے انسان کے افعال عبادت کسی طور بھی صحیح اور جائز نہیں ہو سکتے، اس لیے ضروری ہے کہ ہر مسلمان اپنے دین کا ضروری علم حاصل کرنے کا اہتمام کرے اور یہ فرض ہے۔
➌ تعلیم و تربیت کی غرض سے طلبہ میں طلب علم، اور اصلاح اغلاط کا داعیہ اجاگر کرنے کے لیے مربی کو مختلف انداز اختیار کرنے چاہیں۔ جیسے کہ رسول اللہ صلی اللہ علیہ وسلم نے اس شخص سے دو تین بار نماز پڑھوائی۔
➍ اس حدیث میں نماز کے بہت سے مسائل آ گئے ہیں۔ ان کے متعلق ائمہ حدیث یہ کہتے ہیں کہ شاید وہ ان سے واقف تھا۔
➎ وضو کی باترتیب تکمیل، اس کے بعد دعا، منفرد کے لیے اقامت، ابتدائے نماز کے لیے لفظ اللہ اکبر کی تخصیص، ثناء اور فاتحہ، قرأت قرآن، تکبیرات انتقال اور تسمیع، رکوع سجود میں کمر کو سیدھا رکھنا، بیٹھے ہوئے اقعاء کی بجائے پاؤں بچھا کر بیٹھنا اور اطمینان و اعتدال ارکان ایسے مسائل ہیں جو نبی صلی اللہ علیہ وسلم نے اپنی زبان مبارک سے اسے تعلیم فرمائے ہیں۔ فقہائے کرام نے ان مسائل میں فرض، واجب، سنت اور مستحب کی اصطلاحات استعال کی ہیں، مگر حقیقت یہ ہے کہ اس طرح ان کی اہمیت کم ہو جاتی ہے۔ حالانکہ فرمان رسول کے سامنے سوائے تسلیم و تعمیل کے اور کسی بحث کا سوال پیدا نہیں ہونا چاہیے۔
➏ اس حدیث کے پس منظر میں سب سے اہم مسئلہ اعتدال و اطمینان کے وجوب کا ہے، اس کے بغیر نماز نہیں ہوتی۔ خواہ مسجد نبوی میں کیوں نہ پڑھی جائے۔ ائمہ احناف میں سے امام طحاوی رحمہ اللہ نے بھی وجوب اطمینان کی صراحت کی ہے۔
➐ کچھ لوگوں نے «ثم اقرا بما تيسر معك من القرآن» سے استدلال کرنے کی کوشش کی ہے کہ قرأت فاتحہ واجب نہیں ہے مگر یہ استدلال ازحد ضعیف ہے، کیونکہ اس حدیث کی ایک سند (حدیث: 859) میں «ثمَّ اقرَأْ بأُمِّ القُرآنِ وبما شاء اللهُ أنْ تَقرَأَ» کی صراحت موجود ہے۔ یعنی فاتحہ کی قرأت کرو اور جو الله توفیق دے۔
ان لوگوں کا استدلال ضعیف ہونے کی ایک نظیر یہ ہے کہ قرآن مجید میں الله تعالیٰ نے حج کے مسائل میں فرمایا ہے:
«فَمَن تَمَتَّعَ بِالْعُمْرَةِ إِلَى الْحَجِّ فَمَا اسْتَيْسَرَ مِنَ الْهَدْيِ» [2-البقرة:196]
اور جو کوئی عمرہ کو حج کے ساتھ ملانے کا فائدہ اٹھائے تو اس پر قربانی ہے جو اسے میسر آئے اور ظاہر ہے کہ حج تمتع میں کم از کم قربانی ایک بکری ہے اور شرط ہے کہ اس کے دانت ٹوٹ کر پھر سے نکل چکے ہوں۔ جیسے کہ صحیح احادیث سے واضح ہے۔ ”میسر آنے“ کا مفہوم کسی صورت بھی کھلی چھوٹ نہیں، بلکہ خاص صفت سے مخصوص ہے۔ ایسے ہی «ثم اقرا بما تيسر معك من القرآن» کی توضیح سورت فاتحہ ہے جیسے کہ حدیث:859 اور دیگر صحیح و صریح احادیث میں آیا ہے۔ الا یہ کہ کوئی ازحد عاجز ہو اور کچھ بھی نہ پڑھ سکتا ہو تو تسبیح و تہلیل کر سکتا ہے۔
➑ «ثم افضل ذلك فى صلاتك كلها» کے الفاظ کی روشنی میں مذکورہ آداب و تعلیمات کو ہر ہر رکعت میں ملحوظ خاطر رکھنا لازم ہے۔ اور اسی میں سے اطمینان اور قراءت فاتحہ بھی ہے، اور الله توفیق دینے والا ہے۔