فائدہ:
اس حدیث سے ثابت ہوا کہ جنت و جہنم کا وجود ہے، اس حدیث میں منکر ین آخرت کی تردید ہے، اس حدیث سے یہ بھی ثابت ہوا کہ اگر کسی نے جنت میں جانا ہے تو اللہ کی رحمت کے ساتھ جانا ہے، جہنم میں جانا ہے تو اللہ کے غضب کے ساتھ جانا ہے۔ اللہ ہمیں جہنم سے بچا کر جنت کا وارث بنائے، آمین۔

حدیث حاشیہ:
فوائد ومسائل:
جنت اور دوزخ کا یہ مکالمہ یا مباحثہ حقیقی معنوں میں ہوگا،
اللہ تعالیٰ ہر چیز کی زبان کو سمجھتا ہے،
گویا زبان قال سے مباحثہ ہوگا،
زبان حال سے نہیں اور جنت میں اکثریت ان لوگوں کی ہوگی،
جو اہل دنیا کی نظر میں کم مرتبہ لوگ تھے،
اگرچہ اللہ کے ہاں ان کا مقام ومرتبہ بہت بلند تھا۔

حدیث حاشیہ:
یہ اللہ کے قدم رکھنا برحق ہے جس کی تفصیل اللہ ہی کو معلوم ہے اس میں کرید کرنا بدعت ہے اورتسلیم کرنا طریقہ سلف ہے۔

حدیث حاشیہ:
1۔
اس سوال وجواب میں دوزخ نے متکبرین کا انداز اختیار کیا جبکہ جنت عاجزی اور انکسار کا اظہار کرے گی۔
اللہ تعالیٰ کے فیصلے کے مطابق ان دونوں کو بھرنا ضرورہے۔
اہل جنت جب جنت میں پہنچ جائیں گے تو جنت میں ابھی بہت سی جگہ خالی ہوگی، اسے بھرنے کے لیے اللہ تعالیٰ موقع پر کوئی مخلوق پیدا کرے گا اور اسے وہاں بسا دے گا لیکن دوزخ کا بھرنے کے لیے اپنا قدم اس پر رکھ دے گا جس کی وجہ سے وہ بس، بس کہنے لگے گی۔
2۔
اللہ تعالیٰ کسی پر ظلم نہیں کرتا کہ جہنم کو بھرنے کے لیے وہاں کسی مخلوق کو پیدا کرکے اس میں جھونک دے لیکن بعض روایات میں ہے کہ اللہ تعالیٰ جہنم کو بھرنے کے لیے موقع پر کوئی مخلوق پیدا کرے گا۔
(صحیح البخاري، التوحید، حدیث: 7449)
اس مقام پر علامہ ابن تیمیہ رحمۃ اللہ علیہ نے بہت خوبصورت بات کہی ہے فرماتے ہیں:
جنت میں فالتو جگہ بھرنے کے لیے تواللہ تعالیٰ موقع پر کوئی مخلوق پیدا کرکے وہاں انھیں بسا دے گا، لیکن جہنم میں بھی فالتو جگہ ہوگی۔
صحیح بخاری میں ایک جگہ پر ہے کہ اسے بھرنے کے لیے بھی اللہ تعالیٰ موقع پر کوئی مخلوق پیدا کرے گا جبکہ صحیح بخاری کی دیگر روایات میں ہے کہ اللہ تعالیٰ اس پر اپنا قدم رکھ دے گا۔
امام بخاری رحمۃ اللہ علیہ نے راوی کی غلطی کو واضح کرنے کے لیے جان بوجھ کر یہ انداز اختیار کیا ہے کہ ایک مقام پر اس کی غلطی کی نشاندہی کی ہے جبکہ دوسرے مقامات پر صحیح بات ذکر کی ہے۔
(منھاج السنة: 25/3)
3۔
ہمارے رجحان کے مطابق جہنم کو بھرنے کے لیے کسی مخلوق کو پیدا نہیں کرے گا، بلکہ اپنا قدم رکھ دے گا پھر وہ جہنم بس، بس کہہ اٹھے گی۔
واللہ اعلم۔

حدیث حاشیہ:
1۔
اللہ تعالیٰ کے حضور جنت اور دوزخ کا جھگڑنا حقیقت پر مبنی ہے۔
اللہ تعالیٰ ان میں شعور تمیز اور قوت گویائی پیدا فرمائے گا۔
ایسا کرنا صرف جنت یا دوزخ کے ساتھ خاص نہیں بلکہ پہاڑبھی حضرت داؤد علیہ السلام کے ساتھ تسبیح کرتے تھے جیسا کہ قرآن مجید میں اس کی صراحت ہے بلکہ کائنات کی ہر چیز اللہ تعالیٰ کی تسبیح کرتی ہے لیکن ہم اس تسبیح کو سمجھنے سے قاصر ہیں ارشاد باری تعالیٰ ہے۔
”ساتوں آسمان زمین اور جو (مخلوق)
بھی ان میں ہے سب اس کی تسبیح کرتے ہیں بلکہ کوئی بھی چیز ایسی نہیں جو اس کی حمد کے ساتھ اس کی تسبیح نہ کر رہی ہو لیکن تم ان کی تسبیح کو سمجھتے نہیں ہو۔
“ (بنی اسرائیل17۔
44)
2۔
امام بخاری رحمۃ اللہ علیہ نے اس حدیث سے ثابت کیا ہے کہ بعض اوقات رحمت کا اطلاق مخلوق پر بھی ہوتا ہے جیسا کہ اللہ تعالیٰ نے جنت سے فرمایا:
”تو میری رحمت ہے“ اور جنت اللہ تعالیٰ کی پیدا کی ہوئی ہے اور یہ اس رحمت کا نتیجہ ہے جو اللہ تعالیٰ کی صفت ہے اور جنت اللہ تعالیٰ کے مخلص اور نیکو کار بندوں کے بہت قریب ہے۔
ایک روایت میں ہے جنت میں بے شمار مخلوق کو داخل کرنے کے بعد بھی اس کی بہت سی جگہ بچ رہے گی تو اسے بھرنے کے لیے اللہ تعالیٰ اس وقت کوئی مخلوق پیدا فرمائے گا۔
اور اسے جنت کے باقی ماند ہ حصے میں ٹھہرائے گا۔
(صحیح البخاري، التوحید، حدیث: 7384)
نیز صحیح مسلم میں ہے۔
”اللہ تعالیٰ جنت کو بھرنے کے لیے وہاں کوئی مخلوق پیدا کرے گا۔
“ (صحیح مسلم، الجنة ونعیمها، حدیث: 7175 (2846)
امام بخاری رحمۃ اللہ علیہ نے کتاب التفسیر میں بھی انھی الفاظ سے اس حدیث کو بیان کیا ہے کہ اللہ تعالیٰ جنت کو بھرنے کے لیے وہاں کوئی مخلوق پیدا کرےگا۔
(صحیح البخاري، التفسیر، حدیث: 4850)
لیکن پیش کردہ روایت میں ہے کہ اللہ تعالیٰ جہنم کو بھرنے کے لیے کسی مخلوق کو پیدا کرے گا جبکہ اللہ تعالیٰ نے جہنم بھرنے کا قاعدہ ان الفاظ میں بیان کیا ہے۔
”حق بات یہ ہے اور میں حق ہی کہا کرتا ہوں کہ میں جہنم کو تجھ سے اور ان سب لوگوں سے بھروں گا۔
جو تیری پیروی کریں گے۔
“ (ص: 38۔
84۔
85)
3۔
اس آیت کریمہ کے پیش نظر علمائے امت نے مذکورہ حدیث صحیح بخاری کے متعلق دو مختلف موقف اختیار کیے ہیں۔
علامہ کرمانی رحمۃ اللہ علیہ صحیح بخاری کی اس حدیث کا دفاع کرتے ہوئے فرماتے ہیں۔
جو شخص گناہ گار نہ ہو اسے عذاب دینے میں کچھ حرج نہیں کیونکہ اللہ تعالیٰ اگر اسے عذاب دے تو عدل کے منافی نہیں وہ جو چاہے کر سکتا ہے لیکن ہمیں اس موقف سے اختلاف ہے کیونکہ ایسا کرنا اس کی شان کریمی کے خلاف ہے اس نے خود پر رحمت کو لازم کر لیا ہے۔
(الأنعام: 54)
اور دوسرے مقام پر فرمایا:
”اور تیرا رب (کسی پر ذرہ بھربھی)
ظلم نہیں کرے گا۔
“ (الکهف: 1849)
البتہ انعام کی کچھ اور بات ہے وہ نافرمان پر کیا جا سکتا ہے لیکن بے گناہ کو عذاب دینا کرم الٰہی کے لائق نہیں۔
دوسرا موقف ہے کہ حدیث کے راویوں سے خطا ہوئی ہے۔
انھوں نے معاملہ الٹ کر کے بیان کیا ہے اصل واقعہ یہ ہے کہ جنت کو بھرنے کے لیے موقع پر اللہ تعالیٰ کسی مخلوق کو پیدا کرے گا۔
لیکن راویوں نے سہواً جنت کے بجائے جہنم کا ذکر کر دیا ہے۔
حافظ ابن قیم رحمۃ اللہ علیہ نے اسی موقف کو اختیار کیا ہے۔
(حاوي الأرواح: 295)
امام بخاری رحمۃ اللہ علیہ کا دفاع کرتے ہوئے امام ابن تیمیہ رحمۃ اللہ علیہ لکھتے ہیں کہ امام بخاری رحمۃ اللہ علیہ نے اپنی صحیح میں متعدد مقامات پر یہ حدیث بیان کی ہے کہ جنت کے لیے اپنی مخلوق پیدا کرے گا جبکہ مذکورہ روایت اس کے برعکس ہے کہ جہنم کے لیے موقع پر کوئی مخلوق پیدا کرے گا۔
امام بخاری رحمۃ اللہ علیہ کا مقصد راویوں کے وہم کی نشاندہی کرنا ہے جیسا کہ ان کی عادت ہے کہ جب کسی راوی سے غلط بیانی ہو جائے تو صحیح روایات کو بیان کر کے اس کی غلطی کو واضح کرتے ہیں اس مقام پر بھی ایسا ہوا ہے۔
(منهاج السنة: 25/3)
4۔
ہمارا رجحان بھی یہی ہے کہ مذکورہ روایت میں قلب واقع ہوا ہے کیونکہ قرآن کریم سے ثابت ہے کہ اللہ تعالیٰ لوگوں کی طرف رسول بھیج کر اتمام حجت کرتا ہے پھر اصرار و انکار پر قیامت کے دن انھیں عذاب دے گا۔
جیسا کہ ارشاد باری تعالیٰ ہے۔
”اور ہم اس وقت تک عذاب نہیں دیا کرتے جب تک اپنا رسول نہ بھیج لیں۔
“ (بني إسرائیل: 17۔
15)
نیز فرمایا:
”جب جہنم میں کوئی گروہ پھینکا جائے تو دوزخ کے محافظ ان سے پوچھیں گے:
کیا تمھارے پاس کوئی ڈرانے والا نہیں آیا تھا؟ وہ کہیں گے:
کیوں نہیں! یقیناً ڈرانے والا تو ہمارے پاس آیا تھا مگر ہم نے اسے جھٹلادیا اور کہا کہ اللہ نے کچھ نہیں اتارا تم ہی بڑی گمراہی میں پڑے ہوئے ہو۔
“ (الملك: 67۔
6۔
9)
بہر حال راویوں کی طرف وہم کی نسبت کرنا اس موقف سے کہیں آسان ہے کہ اسے اختیار کرنے سے اللہ تعالیٰ کی شان کریمی پر حرف آئے۔
واللہ أعلم۔