921- سیدنا عبدالرحمٰن بن اظہر رضی اللہ عنہ بیان کرتے ہیں: غزوۂ حنین کے موقع پر سیدنا خالد بن ولید رضی اللہ عنہ زخمی ہوگئے، نبی اکرم صلی اللہ علیہ وسلم میرے پاس سے گزرے میں اس وقت کمسن لڑکا تھا۔ آپ صلی اللہ علیہ وسلم یہ ارشاد فرمارہے تھے: ”کون شخص خالد بن ولید کی رہائشی جگہ تک مجھے لے کے جائے گا“؟ تو میں نبی اکرم صلی اللہ علیہ وسلم کے آگے دوڑتا ہوا گیا۔ میں یہ کہتا جارہا تھا: کون شخص سیدنا خالد بن ولید رضی اللہ عنہ کی رہائشی جگہ تک پہنچائے گا؟ یہاں تک کہ نبی اکرم صلی اللہ علیہ وسلم ان کے پاس تشریف لائے وہ اس وقت پالان کے ساتھ ٹیک لگا کر بیٹھے ہوئے تھے۔ انہیں زخم لاحق ہوئے تھے۔ نبی اکرم صلی اللہ علیہ وسلم ان کے پاس تشریف فرما ہوئے آپ صلی اللہ علیہ وسلم نے ان کے لیے دعائے رحمت کی۔
(راوی کہتے ہیں) میرا خیال ہے روایت میں یہ الفاظ بھی ہیں۔ ”نبی اکرم صلی اللہ علیہ وسلم نے انہیں دم کیا (یا ان پر لعاب دہن لگایا)“۔