وَصَفَ کے معنی کسی کا حلیہ بیان کرنا ، کسی چیز کا حلیہ اور نعت بیان کرنا خواہ وہ صحیح ہو یا غلط ، منظر کشی کرنا ۔

قَصَّ کے معنی کسی کے نشان قدم پر چلنا ہے۔

ضَرَبَ (مَثَلاً )کسی بات کو اس طرح بیان کرنا کہ اس سے کوئی دوسری بات سمجھ میں آجائے۔ کہاوت یا مثال بیان کرنا۔ ضرب المثل مشہور لفظ ہے ۔

حَدَثَ کے معنی کسی ایسی چیز کا وجود میں آنا ہے جو پہلے موجود نہ تھی اور حَدَّثَ کے معنی ایسی بات یا خبر بتلانا جس سے عام لوگ بے خبر ہوں۔

بیان کے معنی فصیح گفتگو اور بَیِّنة کے معنی دلیل اور ثبوت کے ہیں اور بَیَّنَ سے مراد کسی بات کو دلائل سے پیش کرنا ہے۔ ابن فارس کےنزدیک بین میں تین باتیں بنیادی طور پر پائی جاتی ہیں۔ (1) افتراق (2) بُعد اور (3) وُضوح یعنی کسی چیز کا دوسری سے جدا اور واضح ہونا۔

صرف معنی کسی چیز کو ایک حالت سے دوسری میں پھیر دینا اور صرّف معنی بات کو لوٹا لوٹا کر بیان کرنا ہے۔ یعنی کسی معاملہ کو سمجھانے کے لیے اسے مختلف انداز سے بیان کرنا اور اس کے مختلف پہلوؤں پر روشنی ڈالنا ہے۔

فَصَلَ کے معنی ایک چیز کا دوسری سے اس طرح الگ ہونا کے ان کے درمیان فاصلہ ہو جائے اور فَصَّلَ کے معنی کسی معاملہ کو الگ الگ کر کے اور ترتیب وار کر کے بیان کرنا ہے۔

الفسر کے معنی کسی چیز کی معنوی صفت بیان کرنا نیز فَسَرَ معنی مراد بتلانا اور وضاحت کرنا ہے اور فَسَّرَ کسی چیز سے پردہ ہٹانا ہے۔ اور یہ عموما دو الفاظ سے کی جاتی ہے لفظ اَیْ سے مبہم کی وضاحت اور اَوْ سے معنی اور مراد کی وضاحت کی جاتی ہے اور بمعنی جملہ کے ایک ایک لفظ کو کھول کر بیان کرنا اور تنزیل کا لحاظ رکھنا۔