(ضد نقص) بمعنی بڑھنا اور بڑھانا ۔ دونوں افعال لازم و تعدی دونوں طرح آتے ہیں۔ یہ بڑھنے اور بڑھانے کے لیے عام لفظ ہے جو عموما مقدار اور صفات میں اضافہ کے لیے استعمال ہوتا ہے اور الزيادة بمعنی وہ اضافہ ہے جو کسی چیز کے پورا ہونے کے بعد بڑھایا جائے۔ اب ان کی مثالیں دیکھیے :

كَثُرَ (ضدقلّ) تعداد اور مقدار میں زیادہ ہونا ۔

ضعفبمعنی دوگنا ( ضد نصف ) ضعف الشئ بمعنی کسی چیز کی مثل اتنا ہی اور خواہ یہ اضافہ مقدار میں ہو یا تعداد میں ۔ اور ضَعَّفَ بمعنی دوگنا کرنا اور ضَاعَفَ میں اور زیادہ مبالغہ پایا جاتا ہے ۔

عفا کا عام معنی معاف کرنا ہے تا ہم اس کا لغوی معنی یہ بھی ہے کہ کسی چیز کو اس کے حال پر چھوڑ دیا جائے تا کہ وہ بڑھ جائے۔ عفاالشعر یعنی بالوں کو چھوڑ دینا تاکہ وہ بڑھ جائیں اور لمبے ہو جائیں ۔ ارشاد نبوی ہے : قَصُّوا الشَّوَارِبَ وَاعْفُوْا اللُّحٰي یعنی مونچھوں کو کترو اور داڑھیاں بڑھاؤ ۔ اور یہ لفظ لازم اور متعدی دونوں طرح استعمال ہوتا ہے۔

طوع بمعنی دل کی خوشی سے تابعدار ہونا ہے۔ اور تَطَوُّع کے اصل معنی تو بہ تکلیف تربیت حکم بجا لانا ہے ۔ مگر عرف عام میں وہ نیکی کے کام اور عبادات ہیں جو فرائض کے علاوہ اپنے شوق سے سرانجام دی جائیں ۔ مثلاً نفلی نماز وصدقات وغیرہ ۔

نفل بھی واجب پر زیادتی کو کہتے ہیں۔ اور انفال اموال غنیمت کو نَفْل اور تَطَوُّع میں فرق یہ ہے کہ تطوع میں دل کی خوشی اور شوق بھی ضروری ہوتا ہے جبکہ نوافل کی ادائیگی میں یہ بات ضروری نہیں۔

رِبَا الْمَال بمعنی مال کا زیادہ ہونا ۔ اور رِبٰو بمعنی سود ۔ اصل زر پر بلامحنت زائد اضافہ ۔ رِبَا الْفَرْس بمعنی گھوڑے کا سانس پھول جانا اور رِبَا الْوَلْد بمعنی بچے کا نشوونما پاکر بڑھنا ہے اور اَرْبٰی بمعنی کسی چیز کی تربیت کرنا یا پال پوس کر بڑھانا ہے۔