بمعنی بردبار ہونا ، حوصلہ والا ہونا ، یہ ایک مستقل صفت ہے جو ہر وقت حلیم انسان کے اندر موجود رہتی ہے۔ یعنی جب وہ کوئی ناگوار بات سنے یا اسے کوئی صدمہ پیش آئے یا کوئی بےعزتی کرے یا کوئی بڑی خوش کن بات سنے تو اس کی طبیعت میں اتارچڑھاؤ پیدا نہ ہو یا اگر ہو تو معمولی قسم کا ہو اور علٰی حالہ برقرار رہے۔ اور یہ بڑی محمود صفت اور ابو ہلال اس کا معنی اِمْھَال بِتَا خِیْرِ الْعِقَابِ الْمُسْتَحَق یعنی کسی مستحقِ سزا کو سزا میں تاخیر کرکے مہلت دینا ہے۔

”اَلصَّبْر“ کے لغوی معنی ہیں کسی کو تنگی کی حالت میں روکنا (مف) اور رسول اللہ صلی اللہ علیہ وسلم نے ”الصّبر“ کی یوں تعریف فرمائی کہ ”اَلصَّبْرُ عِنْدَ الصَّدْمَةِ الْاُوْلٰي“ یعنی کسی صدمہ ، مصیبت یا ناگوار حادثہ کے پڑنے پر فورا اپنے نفس کو جزع فزع اور بےقراری سے روکنا اور اسے برداشت کر جانا ہے۔

كَظَمَ سانس کی نالی کو کہتے ہیں اور كَظَمَ السِّقَاء بمعنی مشک کو پانی سے لبالب بھر کر اس کا منہ بند کر دینا (مف) اور كَظِیْم اور مَکْظوم اس شخص کو کہتے ہیں جو غم یا غصہ سے سانس کی نالی تک بھرا ہوا ہو۔ مگر اس کا اظہار نہ کرے اور اسے دبا جائے۔