بَدَل معروف لفظ ہے یعنی ایک چیز کے عوض کوئی چیز اور بدّل سے مراد کسی چیز کے بدلے دوسری چیز لے آنا۔ گویا پہلی چیز مفقود اور اس کی جگہ دوسری چیز آ موجود ہوتی ہے۔

حول کے معنی ابن فارس کےنزدیک تحرك في دور یعنی چکر میں حرکت کرنا ہے. اور کسی چیز کے ارد گرد کو اس کا حول کہتے ہیں۔ اور حَوَّل کے معنی کسی چیز کو اصلی جگہ سے ہٹا کر کسی دوسری جگہ رکھ دینا۔ گویا حول میں چیز مفقود نہیں ہوتی بلکہ اصل مقام سے ہٹ جاتی ہے۔

غیر کا معنی سوا۔ کوئی دوسرا اور غیر سے مراد حالت کی تبدیلی ہے۔ غَیّر میں کوئی چیز نہ مفقود ہوتی ہے اور نہ اپنی جگہ سے ٹلتی ہے بلکہ اس کی حالت یا صورت میں تبدیلی واقع ہوتی ہے۔

حرف کے بنیادی معنی کسی چیز کے کنارے کے ہیں اور حرف کے معنی اس کنارے کو موڑ دینا۔ اور حرف کی جمع حروف اور حروف الکلام سے مراد حروف تہجی ہیں۔ تحریف الکلم یہ ہے کہ مسلسل عبارت کے کچھ الفاظ کو سیاق و سباق کا خیال نہ رکھ کر اصل مقام کے بجائے دوسرے مقام پر چسپاں کر دینا۔ جس سے کوئی دوسرا مطلب حاصل کیا جا سکے اور اگر کچھ لفظوں کی بجائے دوسرے لفظ داخل کر دیے جائیں تو یہ تبدیلی ہوگی اور یہود یہ دونوں کام کرلیا کرتے تھے۔

نکر میں دو باتیں بنیادی طور پر پائی جاتی ہیں۔ (1) اجنبیت (2) ناگواری تنکیر کی ضد تعریف ہے اور منکر کی معروف۔ تنکیر بمعنی کسی کو نہ پہچاننا اور تعریف بمعنی کسی کو پہچاننا۔ اسم نکرہ اور اسم معرفہ مشہور لفظ الفاظ ہیں۔ اور منکر بمعنی برے کام اور معروف بمعنی بھلے کام اور نکر کے معنی اسم نکرہ بنانا بھی ہے۔ اور کسی چیز کی ہیبت کو اس طرح بدل دینا کے وہ اچنبھا معلوم ہو۔

اَلدَّوْلَة وَ الدَّوْلَة بمعنی گردش کرنا اور دَالَ کی ضد دَارَ ہے۔ دَوْر اور دائرة کا لفظ تنگدستی بدحالی اور گردشِ ایام کے لئے آتا ہے. اور دَوْلَة اور دُوْلَة برے دنوں سے خوشحالی کے ایام پھرنے کو کہتے ہیں. اور دَاوَل بمعنی خوشحالی کے دنوں کا اول بدل کرنا یا پھیر پھیر کر لانا۔