معروف لفظ ہے یعنی کسی مرد کا غیر عورت سے یا عورت کا اپنے مرد کے علاوہ کسی دوسرے سے بدفعلی کا ارتکاب زنا کہلاتا ہے۔

بغی کے معنی حد سے تجاوز کرنا۔ نافرمانی کرنا ۔ دراز دستی کرنا ہے اور بَاغَتِ الْاَمَةُ بِغَاءً کے معنی لونڈی کا زنا کرنا ہے۔ اور بَغیِّ کے معنی زنا کار فاحشہ عورت کے ہیں۔ یعنی بغآء کا لفظ یا تو لونڈی کے زنا سے مخصوص ہے یا پھر پیشہ ور بدکار عورت یعنی کنجری کے لیے۔ جو دوسروں میں زانیہ مشہور ہو چکی ہو۔ قرآن ان دونوں معنوں کی تائید کرتا ہے ۔

سفح کے معنی خون یا پانی بہانا اور سَافَحَ کے معنی زنا کرنا ہے اور ابن الفارس کے الفاظ میں صَبَّ الْمَاء بِلَا عَقْدِ نِکَاحٍ یعنی نکاح کے عقد کے بغیر زنا کرنا۔ گویا زنا اور سافح میں فرق یہ ہے کہ اس میں تکرار پایا جاتا ہے۔ اور قرآن کریم میں مُحْصِنِیْن کے مقابلے میں مُسَافِحِیْن کا لفظ استعمال کر کے اس کی تائید کردی ہے۔ تو سَافَحَ کے معنی ہماری زبان میں بطور داشتہ رکھنا ہیں اور مُسَافِح بمعنی ایسی عورت اور مرد ہے جن کے آپس میں علانیہ تعلقات استوار ہوں۔ آشنا کا لفظ بھی آج کل اسی معنی میں استعمال ہوتا ہے ۔

فحش کے معنی ہر وہ قول یا فعل جو قباحت اور برائی میں حد سے بڑھا ہوا ہو اور فاحشة سے مراد ایسے اقوال و افعال ہیں جو زنا کے قریب لے جاتے ہیں یعنی بے حیائی کے کام اور باتیں اور ان معنوں میں یہ لفظ قرآن کریم میں بارہا استعمال ہوا ہے۔ اور زنا کی لیے فاحشة مُبَیِّنَةکا لفظ استعمال ہوا ہے۔