بمعنی کسی کو ناراضگی کی بنا پر اپنے سے دور کرنا اور دھتکارنا ہے اور جب اس کی نسبت اللہ تعالی کی طرف ہو تو اس کا مطلب اللہ کی رحمت اور توفیق سے دور ہونا ہے اور نیز بمعنی گالی دینا نیکی سے دور کرنا اور اور دھتکارنا ہے اور لعنت بد دعا کے لیے عام اور جامع لفظ ہے۔

بَعِدَ اور بَعُدَ (بُعْدًا) بمعنی دور ہونا ، ہلاک ہونا ، مرنا اور بُعْدًا بددعا کا کلمہ ہے یعنی اللہ اس کو ہلاک کرے یا اپنی رحمت سے دور کرے۔

سَحَقَ بمعنی دوا وغیرہ کو پیسنا ہے اور اَسْحَقَ الثَّوْب بمعنی کپڑے کا پرانا ہونا اور اَسْحَقَهُ الله کے معنی اللہ اسے ہلاک کرے نیز سَحِقَ سُحْقًا بمعنی دور ہونا اور اِسْتَحَقَ بمعنی دور کرنا گویا یہ بھی بد دعا کا کلمہ ہے اور اس کا معنی بھلائی سے دوری ہے۔ مگر اس میں بُعْدًا سے زیادہ شدت پائی جاتی ہے۔

اَبْھَلْتُ فُلَاناً محاورۃً استعمال ہوتا ہے اور اس کا معنی ہے کسی کو اس کی رائے اور ارادہ میں آزاد چھوڑ دینا اور اَلْبَھْلُ وَالْاِ بْتِھَالُ فِیْ الدُّعَاِء کے معنی دعا میں پوری آزادی اور عاجزی سے دعا کرنا پھر چونکہ آیت مباہلہ میں اللہ کی لعنت کا ذکر ہے۔ اس لیے مباہلہ کا لفظ ایک دوسرے پر لعنت بھیجنے کے معنوں میں مشہور ہو گیا گویا اس کا استعمال بھی برے مفہوم میں ہوتا ہے۔