بَخِلَ کے معنی اپنے جمع شدہ مال میں سے بھی ایسی جگہ خرچ نہ کرنا جہاں خرچ کرنا چاہئے۔ بخل دو قسم کا ہوتا ہے (1)کسی دوسرے کے حقوق کی ادائیگی میں یا انفاق فی سبیل اللہ میں بخل کرنا (2)اپنی جائز ضروریات پر بھی خرچ نہ کرنا۔ یہ دونوں قسم کا بخل مذموم فعل ہے اور یہ لفظ عام ہے جو ہر طرح کے بخل پر استعمال ہو سکتا ہے ۔

اَمْسَکَ کے معنی جو کچھ پاس ہو اسے ہاتھ سے نکلنے نہ دینا اور تھامے رکھنا یا کسی چیز سے چمٹ جانا اور اس کی حفاظت کرنا کے ہیں اور امساک کے معنی بخل اور ممسک بمعنی بخیل بھی استعمال ہوتا ہے ۔

الاِیْعَاءکے معنی کسی چیز (مال وغیرہ) کو تھیلی میں سنبھال کر اوپر سے منہ بند کر دینا صاحب منجد کے نزدیک یہ تین معنوں میں استعمال ہوتا ہے (1) کسی چیز کو یاد رکھنا (2)جمع کرنا اور (3)بخل کرنا اور ابن الفارس کے نزدیک اس کا بنیادی معنیٰ صرف منہ بند کرنا ہے اور وِعَاء ہر ایسے سامان کو کہتے ہیں جس کا منہ بند کر دیا جائے یامقفل کر دیا جائے۔

كُدْيَةٌ سخت زمین کو کہتے ہیں اور حَفَرَ فَاَكْدٰي کے معنی ہیں وہ گڑھا کھودتے کھودتے سخت زمین تک جا پہنچے اور مال کے خرچ کرنے کی نسبت سے اَکْدٰی کے معنی تھوڑا سا خرچ کر کے ہاتھ روک لینا یا خرچ کرنے کا ارادہ کر کے پھر رک جانا۔

قَتَرَ کے معنی بہت کم خرچ کرنا اور اقتار اسراف کی ضد ہے یعنی اپنی جائز ضروریات پر بھی ضرورت سے کم خرچ کرنا اور کنجوسی کر جانا صاحب منتہی الارب کے نزدیک اس کے معنی وہ شخص جس نے اپنے اہل و عیال پر نفقہ تنگ کر رکھا ہو ۔

ضَنَّ کے معنی کسی پسندیدہ اور مرغوب شے کے دینے میں بخل کرنا اور الضائن وہ چیزیں ہیں جن کی نفاست کی وجہ سے بخل کیا جائے جیسے حکیم اپنے مجرب نسخہ بتانے یا کوئی فنکار اپنا کسب سکھلانے میں بخل کرتا ہے۔

شَحَّ کے معنی بخل کرنا، حرص و لالچ کرنا جب بخل اور حرص دونوں باتیں جمع ہو جائے تو اسے شُحَّ کہتے ہیں اور اسی کا دوسرا نام شدّتِ حرص ہے بمعنی ہر وقت مال و دولت سمیٹنے کی فکر میں رہنا اور خرچ کرنے میں بخل کرنا۔

غَلَّ کے بنیادی معنی اس طرح کی خیانت ہے کہ اپنے زیر تصرف کوئی چیز جو اپنی ملکیت نہ ہو اٹھا کر چپکے سے اپنے سامان میں رکھ لی جائے جیسے غنیمت کے مشترکہ مال سے کوئی چیز اٹھا کر اپنی ملکیت میں کرلینا اور غُلٌّ بمعنی طوق ، ہتھکڑی یا بیڑی یعنی ہر وہ چیز جس سے کسی کے اعضاء کو جکڑ کر وسط میں باندھ دیا جاتا ہے اور اس کی جمع اغلال ہے اسی نسبت سے کنایہ مغلول الید یعنی کنجوس شخص کو بھی کہ دیتے ہیں جس کے ہاتھ بندھے ہوئے ہوں اور وہ خرچ نہیں کرسکتا۔