النھی کے معنی روکنا اور انتھٰی کے معنوں میں آتا ہے ۔ النھاء والنھاية کسی چیز کی غایت اور آخر اور نھایۃ الدار گھر کی چار دیواری کو کہتے ہیں اور منتہٰی اسم ظرف ہے۔ زمانہ یا جگہ کے لحاظ سے کوئی چیز جہاں تک پہنچ کر رک جائے وہ اس کی آخری حد یا منتھٰی یا انجام ہے۔

صَارَ کے معنی میں دو باتیں بنیادی ہیں 1) رجوع اور 2) مال یعنی انجام اور صیر الامر سے مراد کسی کام کا آخری حصہ یا اس کی انتہا ہے۔ جب کسی شخص کا کوئی کام اختمام پزیر ہو تو کہتے ہیں فُلَانٌ عَلٰی صَیْرِالْاَمْرِ پھر صَارَ کے معنی ایک حالت سے دوسری حالت میں منتقل ہونا بھی ہیں۔ گویا صَارَ کا لفظ عام کی نوعیت سے بھی تعلق رکھتا ہے۔ ایک کام جس نہج پر ہو رہا ہے۔ وہ کوئی اور رخ اختیار نہیں کرے گا اور جس انداز میں وہ جا کر ختم ہوگا اس آخری کیفیت کا نام صَیْر ہے۔ اور مَصِیْر اس جگہ کو کہتے ہیں جہاں کوئی چیز نقل و حرکت کے بعد پہنچ کر ختم ہو جاتی ہے۔

عقب معنی ایڑی اور عَقَّبَ کے معنی کسی کے پیچھے چلنا اور پیچھے آنا اور عاقبۃ ہر چیز کا آخر یا عمل کا انجام ہے پھر عقب کے مفہوم میں شدت اور صعوبت بھی پائی جاتی ہے۔ عَاقِبَهٗ کے معنی کسی کو اس کے عمل کے بدلہ میں پکڑنا بھی ہے اور عِقَاب کا لفظ عموما کسی برے کام کے بدلہ کے لیے استعمال ہوتا ہے۔