البتہ اگر ”کافی کھلی جگہ“ کے بجائے کافی فرق (خواص وغیرہ کا) ہوتا تو موزوں تر تھا۔
”برزخ“ دراصل دو چیزوں کے درمیان ایک تیسری چیز ہوتی ہے جو آڑ کا کام بھی دیتی ہے مگر اس تیسری چیز یعنی ”برزخ“ میں دونوں چیزوں کے خواص بھی موجود ہوتے ہیں خوا وہ ایک چیز کے دوسری سے زیادہ ہوں یا برابر۔ عالم برزخ کی بھی یہی صورت ہے کہ مومن کے لیے راحت اور کافر کے لئے عذاب یہیں سے شروع ہو جاتا ہے لیکن یہ اخروی راحت یا عذاب سے کم تر درجہ کا ہوتا ہے۔
اور دو دریاؤں کا درمیانی برزخ یوں ہوتا ہے کہ سمندر میں ایک گرم رو چل رہی ہے دوسری سرد رو ہے تو اس برزخ کا پانی معتدل ہوگا۔ اسی طرح اگر ایک طرف میٹھا پانی ہو اور دوسری طرف کڑوا اور کھاری تو اس برزخ کا پانی درمیانی کیفیت کا حامل ہوگا اور اس برزخ کی چند مثالیں دی جا سکتی ہیں۔ جن میں درمیانہ قسم کے خواص موجود ہوتے ہیں۔ مثلاً جنت اور دوزخ کے درمیان اعراف کے یہاں نہ عذاب ہو گا نہ راحت۔ انسان اور حیوان کے درمیان بن مانس ، انسان، اور مچھلی کے درمیان جل پری، حیوانات اور جمادات کے درمیان مرجان ، ٹھوس اور مائع اشیاء کے درمیان پارہ وغیرہ وغیرہ۔

”حِجْراً مَحْجُوْرَا“ کا لفظ اہل عرب کسی دشمن یا آفت کے نازل ہونے کا وقت محاورتاً استعمال کرتے تھے جیسے ہم کہتے ہیں ”اس سے خدا کی پناہ“ تو سننے والا اس کو عموما کوئی تکلیف نہ پہنچاتا۔
پھر ”حجر“ کا لفظ ایسی عقل کے لیے بھی استعمال ہوتا ہے جو غلط اور باطل نظریات اور بیہودہ باتوں کو قبول کرنے سے انکار کر دے۔ گویا ایسی محتاط عقل کو بھی اپنا بچاؤ سوچ لے ”حجر“ کہتے ہیں۔