فوائد:
مذکورہ حدیث سے معلوم ہوا ہمیشہ روزہ رکھنا خلاف سنت ہے۔ حدیث میں موجود ہے: ((لَا صَامَ وَلَا آلَ مَنْ صَامَ الْاَبَدَ)) .... ”نہ اس کو روزے رکھنے کا ثواب ملتا ہے نہ اس کو چھوڑنے کا ثواب ملتا ہے۔“ ایک دوسری روایت میں ہے کہ رسول اللہ صلی اللہ علیہ وسلم نے فرمایا: ”میں (نفلی) روزے رکھتا بھی ہوں اور چھوڑتا بھی ہوں اور جو میری سنت سے بے رغبتی اختیار کرے گا، اس کا مجھ سے کوئی تعلق نہیں۔“ (بخاري، کتاب النکاح، رقم: 5063)
سیّدنا عبداللہ بن عمرو رضی اللہ عنہما نے ہمیشہ روزے رکھنے شروع کیے تو رسول اللہ صلی اللہ علیہ وسلم نے انہیں اس سے منع فرما دیا، ان کی بار بار کی درخواست پر زیادہ سے زیادہ جو اجازت دی وہ سیّدنا داود علیہ السلام والے روزے کی تھے، یعنی ایک دن روزہ رکھنا اور ایک دن نہ رکھنا۔ جب سیّدنا عبداللہ رضی اللہ عنہ نے فرمایا: میں اس سے افضل عمل کی طاقت رکھتا ہوں، یعنی اس سے زیادہ روزے رکھ سکتا ہوں تو نبی مکرم صلی اللہ علیہ وسلم نے فرمایا تھا: ((لَا اَفْضَلَ مِنْ ذٰٰلِكَ)) ”اس سے کوئی افضل نہیں۔ “ (بخاري، کتاب الصوم، رقم: 1967)
معلوم ہوا کہ جو زیادہ سے زیادہ نفلی روزے رکھنا چاہے تو وہ ایک دن چھوڑ کر ایک دن روزہ رکھے، یہی سب سے افضل روزہ ہے۔ لیکن جب سیدنا عبداللہ رضی اللہ عنہ بڑھاپے میں کمزور ہوگئے تو کہا کرتے تھے: کاش میں نے رسول اللہ صلی اللہ علیہ وسلم کے فرمائے ہوئے تین دن قبول کرلیے ہوتے، وہ مجھے میرے اہل اور مال سے زیادہ محبوب تھے۔ (مسلم، کتاب الصیام، رقم: 1159)