626 لغوی تشریح:
«حتيٰ رميٰ جمرة العقبه» جمرۃ عقبہ کو کنکری مارنے کے عمل سے فارغ ہونے کے بعد تلبیہ اپنے اختتام کو پہنچ گیا۔ یہ امام احمد رحمہ الله کی رائے ہے۔ جو دلیل کے اعتبار سے قوی ہے۔ اور جمہور کا مسلک یہ ہے کہ جونہی پہلی کنکری ماری جائے گی۔ تلبیہ ختم ہو جائے گا۔

راوئ حدیث:
حضرت اسامہ بن زید رضی اللہ عنہ، ان کنیت ابومحمد یا ابوزید تھی۔ اسامہ کے ”ہمزہ“ ”پر ضمہ ہے۔ نسب نامہ اس طرح ہے: اسامہ بن زید بن حارثہ بن شراحیل کلبی۔ رسول اللہ صلی اللہ علیہ وسلم کے پیارے، محبوب، آزاد کردہ غلام اور آزاد کردہ غلام کے بیٹے تھے۔ ان کی والدہ محترمہ ام ایمن رسول اللہ صلی اللہ علیہ وسلم کی رضاعی والدہ تھی۔ آپ صلی اللہ علیہ وسلم نے اپنی وفات سے چند دن قبل انہیں ایسے لشکر کا سربراہ مقرر فرمایا جس میں اکابر صحابہ کرام ابوبکر و عمر رضی اللہ عنہما جیسے جلیل القدر لوگ بھی شامل تھے۔ یہ اس وقت اٹھارہ برس کے نوجوان تھے۔ یہ لشکر نبی صلی اللہ علیہ وسلم کی وفات کی وجہ سے روانہ نہ ہو سکا بعد میں حضرت ابوبکر رضی اللہ عنہ نے اسے روانہ فرمایا۔ حضرت اسامہ رضی اللہ عنہ نے حضرت عثمان رضی اللہ عنہ کی شہادت کے بعد وفات پائی اور یہ بھی کہا گیا ہے کہ ان کی وفات 54 ہجری میں ہوئی۔