حدیث حاشیہ:
حدیث میں حوض کا ذکر نہیں ہے مگر دستور یہ ہے کہ باغ میں جب پانی کنویں سے نکالا جائے تو ایک حوض میں جمع ہو کر آگے درختوں میں جاتا ہے یہاں بھی ایسا ہی ہوگا کیونکہ وہ باغ والا اپنے درختوں کو پانی دے رہا تھا۔

صحیح بخاری کی حدیث نمبر: 5621 کا باب: «بَابُ الْكَرْعِ فِي الْحَوْضِ:»
باب اور حدیث میں مناسبت:
امام بخاری رحمہ اللہ نے ترجمة الباب میں حوض کا ذکر فرمایا ہے، لیکن تحت الباب جس حدیث کا ذکر فرمایا ہے اس میں حوض کا ذکر نہیں ہے، لہٰذا باب سے حدیث کی مناسبت کس طرح سے ممکن ہو گی؟

حافظ ابن حجر رحمہ اللہ العسقلانی رحمہ اللہ لکھتے ہیں:
«وانما قيد فى الترجمة بالحوض لما بينته هناك أن جابرة أعاد قوله: ”وهو يحول بالماء“ في أثناء مخاطبة النبى صلى الله عليه وسلم الرجل مرتين، وأن الظاهر أنه كان ينقله من أسفل البئر إلى اعلاه، فأنه كان هناك حوض يجمعه فيه ثم يحوله من جانب الي جانب.» [فتح الباري: 75/11]
”ترجمة الباب کو حوض کے ساتھ مقید کیا ہے کیونکہ وہاں سیدنا جابر رضی اللہ عنہ نے بیان کیا تھا کہ قوله «وهو يحول الماء» کا ان کے نبی کریم صلی اللہ علیہ وسلم کے ساتھ اثنائے مخاطب دو مرتبہ اعادہ کیا اور وہ بظاہر کنویں کی تہہ سے اوپر کی جانب منتقل کر رہا تھا، گویا وہاں کوئی حوض تھا جس میں پانی جمع کرتے پھر وہاں سے باغ کے چاروں طرف لگاتے تھے۔“

اور یہ بات معروف ہے کہ عموماً «كرع» کی ضرورت حوض وغیرہ میں پیش آتی ہے، اگرچہ حدیث میں مطلقاً «كرع» کا ذکر ہے لیکن چونکہ اس کا وقوع عموماً حوض وغیرہ کے پاس ہوتا ہے اس لیے امام بخاری رحمہ اللہ نے لوگوں کی عادت اور ان کے فعل کے عموی وقوع کے پیش نظر ترجمته الباب میں «في الحوض» کا ذکر فرمایا ہے۔

حدیث حاشیہ:
(1)
كرع کے متعدد معانی کتب لغت میں منقول ہیں۔
كراع الارض اس گڑھے کو کہتے ہیں جہاں بارش وغیرہ کا پانی جمع ہو جاتا ہے۔
پہاڑ یا پتھریلے میدانوں سے نکلنے والی پانی کو بھی کراع کہا جاتا ہے۔
كرع القوم کے معنی ہیں کہ لوگوں کو بارش وغیرہ کا جمع شدہ پانی مل گیا جو انہوں نے استعمال کیا۔
اس حدیث میں كرعنا کے یہی معنی مراد ہو سکتے ہیں کہ رسول اللہ صلی اللہ علیہ وسلم نے انصار سے فرمایا:
”اگر تمہارے پاس ایسا پانی ہو جو رات بھر سے مشکیزے میں ہے تو لے آؤ، ورنہ ہم حوض سے جمع شدہ پانی پی لیتے ہیں۔
“ کرع کے ایک معنی برتن یا ہاتھ استعمال کیے بغیر منہ سے پانی پینا بھی ہیں۔
یہ معنی بھی مراد ہو سکتے ہیں۔
اس مفہوم کے اعتبار سے بوقت ضرورت اس طرح پانی پینے کا جواز ثابت ہوتا ہے۔
(2)
حدیث میں اگرچہ حوض کا ذکر نہیں ہے، تاہم حضرت جابر رضی اللہ عنہ نے اس کے متعلق دو دفعہ کہا ہے کہ وہ اپنے باغ کو پانی دے رہا تھا۔
عام دستور کے مطابق پہلے کنویں سے پانی نکالا جاتا ہے اور اسے جمع کیا جاتا ہے، پھر اسے درختوں میں لگایا جاتا ہے۔
یہاں بھی ایسا ہی ہو گا پہلے وہ کنویں سے پانی نکالتا ہو گا، پھر جمع کیا ہوا پانی آگے درختوں میں لگاتا ہو گا۔
واللہ أعلم

فوائد ومسائل:
فائدہ: (کرع) کے متعدد معنی ہیں۔
(کراع) انسان کی پنڈلی یا جانور کے اگلے پچھلے پائوں کے اوپر گھنٹے تک کے حصے کو کہتے ہیں۔
حافظ ابن حجر نے ابن التین کے حوالے سے ابو عبد الملک سے نقل کیا ہے۔
کہ اس کے معنی دونوں ہاتھوں سے پانی پینا ہیں۔
ابن تین نے اسے اہل لغت کے خلاف قرار دیا ہے۔
لیکن (کراع) کے اصل معنی کے حوالے سے یہ مفہوم غلط نہیں۔
(کراع الارض) زمین کے کناے کو کہتے ہیں۔
جہاں گہرا ہونے کی وجہ سے بارش کا صاف پانی جمع ہوجاتا ہے۔
(کراع) پہاڑ یا پتھریلے میدانوں سے نکلنے والے پانی کو بھی کہتے ہیں۔
(کرع القوم) یا (أکر ع القوم) کے معنی ہیں۔
کہ لوگوں کو بارش وغیرہ کا جمع شدہ پانی مل گیا۔
جو انہوں نے استعمال کیا۔
(لسان العرب۔
کرع) یہاں یہی معنی مراد ہیں۔
رسول اللہ ﷺ نے انصاری سے فرمایا۔
اگر تمہارے پاس ایسا پانی ہو جو رات بھر سے مشکیزے میں ہے۔
(تو لے آئو) ورنہ ہم حوض سے جمع شدہ پانی پی لیتے ہیں۔
(کرع) کے ایک معنی برتن یا ہاتھ استعمال کئے بغیر جانوروں کی طرح منہ سے پانی پینا بھی ہیں۔
بہت سے مترجمین نے اس حدیث کا ترجمہ اس طرح کیا ہے۔
امام نووی نے بھی ریاض الصالحین (باب جواز الشرب من جمیع الأواني۔
۔
۔
)میں اس کے یہی معنی بیان کیے ہیں۔
اس لئے اسے بھی غلط نہیں کہا جا سکتا۔
اور اس مفہو م کے اعتبار سے بوقت ضرورت اس طرح پانی پینے کا جواز کا اثبات ہوتا ہے۔

اردو حاشہ:
فوائد و مسائل:
(1)
بہتے پانی کو منہ لگا کر پی لیناجائز ہے۔
البتہ بہتر یہ ہے کہ ہاتھوں میں یا برتن میں لے کر پیے۔

(2)
مہمان کو عمدہ چیز پیش کرنی چاہیے۔

(3)
رات کا رکھا ہوا پانی ٹھنڈا ہوجاتا ہے۔
گرمی کے موسم میں ٹھنڈا پانی زیادہ مرغوب ہوتا ہے۔

(4)
رات کا پانی پینا درست ہے۔
بشرط یہ کہ احتیاط سے ڈھانپ کر یا مشکیزے وغیرہ میں محفوظ رکھا گیا ہو۔

(5)
شن پرانی مشک کو کہتے ہیں۔
اس میں پانی زیادہ ٹھنڈا ہوتا ہے۔

(6)
اس موقع پر رسول اللہ ﷺ کے ساتھ حضرت ابو بکررضی اللہ تعالیٰ عنہ تھے۔ (حاشہ سنن ابن ماجہ از وحید الزمان خان رحمۃ اللہ علیہ)

حدیث حاشیہ:
(1)
ایک روایت میں ہے کہ انصاری کے پاس جو پانی تھا وہ برف کی طرح ٹھنڈا تھا۔
اس نے اس پانی پر بکری کا دودھ دوہا تاکہ اس کی ٹھنڈک گرم دودھ سے معتدل ہو جائے، پھر خالص پانی پیش کرنے کے بجائے ضیافت کے طور پر دودھ کی ملاوٹ کی۔
ایک مرتبہ سیدنا ابوبکر صدیق رضی اللہ عنہ نے گرم گرم دودھ کو ٹھنڈا کرنے کے لیے اس میں ٹھنڈا پانی ڈالا تھا تاکہ دودھ کی گرمی اس پانی سے معتدل ہو جائے۔
(صحیح البخاري، في اللقطة، حدیث: 2439) (2)
واضح رہے کہ رسول اللہ صلی اللہ علیہ وسلم کے ہمراہ سیدنا ابوبکر صدیق رضی اللہ عنہ تھے۔
اس حدیث سے یہ بھی معلوم ہوا کہ کوئی فاضل بزرگ اپنے کسی عقیدت مند کے ہاں قصد کر کے جا سکتا ہے، ایسا کرنا چاہیے تاکہ عقیدت مندوں کی حوصلہ افزائی ہو۔