سیدنا بریدہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”منافق کو سردار نہ کہو اگر وہی تمہارا سردار ہوا تو تم نے اپنے رب اللہ عزوجل کو ناراض کر دیا۔“ [صحيح الادب المفرد/حدیث: 588]

عدی بن ارطاۃ بیان کرتے ہیں کہ نبی صلی اللہ علیہ وسلم کے صحابہ میں سے کسی آدمی کو پاک باز قرار دیا جاتا تو کہتا: اے اللہ! یہ لوگ جو (میرے بارے میں) کہتے ہیں اس کا مجھ سے مواخذہ نہ کرنا اور جو (میری کوتاہیاں یہ) نہیں جانتے اس پر مجھے مغفرت عطا کرنا۔ [صحيح الادب المفرد/حدیث: 589]

ابوقلابہ سے مروی ہے کہ ابوعبداللہ نے ابومسعود سے کہا: یا ابومسعود نے ابوعبداللہ سے کہا: آپ نے نبی صلی اللہ علیہ وسلم سے «زعم» کے بارے میں کیا سنا ہے۔ کہا: «زعم» کسی شخص کی بری سواری ہے (یعنی یہ جھوٹ ہے)۔ [صحيح الادب المفرد/حدیث: 590]

ابومسعود نے کہا: اور میں نے آپ صلی اللہ علیہ وسلم کو فرماتے سنا: مومن پر لعنت کرنا ایسا ہی ہے جیسے اسے قتل کرنا۔ [صحيح الادب المفرد/حدیث: 591]

سیدنا ابن عباس رضی اللہ عنہما سے مروی ہے کہ تم میں سے کوئی آدمی کسی چیز کے بارے میں جس کو وہ نہیں جانتا یہ نہ کہے کہ اس کو اللہ جانتا ہے، حالانکہ جو اللہ جانتا ہے وہ کچھ اور ہے تو وہ اللہ کے علم میں وہ چیز داخل کر رہا ہے جس کو وہ نہیں جانتا یہ اللہ کے ہاں بڑا گناہ ہے۔ (یعنی کوئی یہ کہہ دے کہ اللہ جانتا ہے سچ بات ایسے ہے حالانکہ سچ بات ایسے نہ ہو تو وہ اللہ کے علم میں وہ بات داخل کر رہا ہے جو حقیقت میں اللہ کے علم میں تو سچی ہے تو پھر اللہ کی طرف منسوب نہیں کرنا چاہیے)۔ [صحيح الادب المفرد/حدیث: 592]

ابوطفیل سے مروی ہے ابن الکوا نے سیدنا علی رضی اللہ عنہ سے کہکشاں کے بارے میں پوچھا: انہوں نے کہا کہ یہ آسمان کی وادی ہے وہاں سے آسمان کو انتہائی برسنے والے پانی کے ساتھ کھولا جاتا ہے۔ [صحيح الادب المفرد/حدیث: 593]

سیدنا ابن عباس رضی اللہ عنہما سے مروی ہے: قوس قزح: زمین والوں کے لیے ڈوبنے سے امان (تحفط) ہے اور کہکشاں: آسمان کا وہ دروازہ ہے جہاں سے یہ پھوٹتی ہے۔ [صحيح الادب المفرد/حدیث: 594]

ابوحارث کرمانی سے مروی ہے انہوں نے کہا: میں نے ایک شخص کو سنا جو ابورجاء سے کہہ رہا تھا: میں تم کو سلام کہتا ہوں اور میں اللہ سے دعا کرتا ہوں کہ وہ مجھے اور آپ کو اپنی رحمت کی جگہ میں داخل کر دے، انہوں نے کہا کہ کیا کوئی اس کی طاقت رکھتا ہے؟ انہوں نے پوچھا: رحمت کی جگہ سے تم کیا مراد لیتے ہو؟ اس نے کہا: جنت۔ انہوں نے کہا کہ تم نے صحیح نہیں کہا: وہ آدمی ابورجا ء سے پوچھتا ہے تمہارے نزدیک رحمت کی جگہ کیا ہے؟ میں نے کہا کہ وہ رب العالمین ہے۔ [صحيح الادب المفرد/حدیث: 595]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”تم میں سے کوئی یہ نہ کہے کہ اے زمانے کی ناکامی۔ بیشک اللہ ہی زمانہ (کے نطام کو چلانے والا)ہے۔“ اور ایک روایت میں ہے: اللہ عزوجل نے فرمایا: میں زمانہ ہوں، میں رات اور دن کو بھیجتا ہوں، پھر جب میں چاہوں گا انہیں روک لوں گا۔ اور انگور کو کرم ہر گز نہ کہو، کرم مرد مسلمان ہوتا ہے۔ [صحيح الادب المفرد/حدیث: 596]

سیدنا انس رضی اللہ عنہ سے روایت ہے کہ نبی صلی اللہ علیہ وسلم نے ایک شخص کو دیکھا کہ ایک ایسی اونٹنی ہانک کر لے جا رہا تھا جو مکہ میں جا کر ذبح کرنی تھی۔ آپ صلی اللہ علیہ وسلم نے فرمایا: ”اس پر سوار ہو جا۔“ اس نے کہا: یہ مکہ میں ذبح ہونے والی اونٹنی ہے۔ آپ صلی اللہ علیہ وسلم نے فرمایا: ”اس پر سوار ہو جا۔“ اس نے کہا: یہ مکہ میں ذبح ہونے والی اونٹنی ہے۔ آپ صلی اللہ علیہ وسلم نے فرمایا: ”اس پر سوار ہو جا۔“ اس نے کہا: یہ تو مکہ میں ذبح ہونے والی اونٹنی ہے۔ آپ صلی اللہ علیہ وسلم نے فرمایا: ”افسوس تجھ پر اس پر سوار ہو جا۔“ [صحيح الادب المفرد/حدیث: 597]