سیدنا ابودرداء رضی اللہ عنہ نے فرمایا: کیا میں تم سے ایسی حدیث نہ بیان کروں جو تمہارے لیے صدقہ اور روزہ سے بھی بہتر ہے، (وہ چیز) دو لڑنے والوں میں صلح کرا دینا ہے۔ خبردار اور بیشک (دونوں میں) عداوت ڈالنا، یہ تو مونڈ دینے والی (بات) ہے۔ [صحيح الادب المفرد/حدیث: 319]

وہب بن کیسان سے مروی ہے انہوں نے سیدنا عبداللہ بن عمر رضی اللہ عنہما کا زمانہ پایا تھا کہتے ہیں، ابن عمر رضی اللہ عنہما نے ایک چرواہے اور بکریوں کو ایک بنجر (خراب جگہ پر) بکریاں چراتے ہوئے دیکھا اور اس سے بہتر جگہ بھی دیکھی تو کہا، اللہ بھلا کرے، اے چرواہے! بکریوں کو (بہتر جگہ) ہانک لے، میں نے نبی صلی اللہ علیہ وسلم سے سنا ہے کہ ہر چرواہا اپنی رعیت کے بارے میں مسئول (جواب دہ) ہے۔ [صحيح الادب المفرد/حدیث: 320]

سیدنا ابن عباس رضی اللہ عنہما نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”بری مثال ہمارے لئے نہیں ہے (ہماری شایان شان نہیں ہے)، اپنی کوئی چیز عطیہ کر کے واپس لینے والا اس کتے کی طرح ہے جو اپنی قے کو خود چاٹ لے۔“ [صحيح الادب المفرد/حدیث: 321]

سیدنا ابوہریرہ رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”مومن بھولا بھالا اور فراخ دل ہوتا ہے، اور فاجر انتہائی چالاک اور کنجوس ہوتا ہے۔“ [صحيح الادب المفرد/حدیث: 322]

ام درداء سے روایت ہے (اور یہ چھوٹی ام درداء ہیں جو عالمہ تھیں)، کہ ایک شخص ان کے پاس آیا اور اس نے کہا: ایک شخص نے عبدالملک کے نزدیک آپ کو برا بھلا کہا ہے تو انہوں نے کہا کہ اگر اس نے وہ بات کہی ہے جو ہم میں نہیں ہے تو ایک مدت سے ہم میں ایسے فضائل مانے گئے جو ہم میں نہیں تھے۔ (ابودرداء کی دو بیویاں تھیں جب پہلی بیوی فوت ہو گئی تو انہوں نے دوسری شادی کی جنہیں چھوٹی ام درداء کہا: جاتا ہے۔) [صحيح الادب المفرد/حدیث: 323]

سیدنا عبداللہ (ابن مسعود) سے مروی ہے: جب ایک شخص اپنے ساتھی سے کہتا ہے: تو میرا دشمن ہے تو ان میں سے ایک اسلام سے خارج ہو جاتا ہے، یا (اگر یہ کہا) کہ میں اپنے ساتھی سے بری الذمہ ہوں۔ [صحيح الادب المفرد/حدیث: 324]

سیدنا ابن عباس رضی اللہ عنہما سے روایت ہے اور طاوس کہتے ہیں میں گمان کرتا ہوں کہ اسے رسول اللہ صلی اللہ علیہ وسلم کی طرف مرفوع بیان کیا۔ لیث کو شک ہے۔ انہوں نے کہا: ابن آدم میں تین سو ساٹھ جوڑ ہوتے ہیں، یا ہڈیاں یا جوڑ ہیں، ان میں سے ہر ایک پر روزانہ صدقہ (لازم) ہے، ہر اچھی بات ایک صدقہ ہے، آدمی کا اپنے بھائی کی مدد کرنا صدقہ ہے، اور ایک مرتبہ کا پانی جو وہ پلاتا ہے صدقہ ہے، راستے سے تکلیف دہ چیز کو ہٹا دینا بھی صدقہ ہے۔ «الشَّرْبَةُ:» ایک مجلس میں مکمل پانی پلانے کی ضرورت پوری کرنا۔ [صحيح الادب المفرد/حدیث: 325]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”دو آدمی گالی گلوچ کریں تو گناہ ابتدا ء کرنے والے پر ہو گا، بشرطیکہ مظلوم (جس کو پہلے گالی دی گئی) نے حد سے تجاوز نہ کیا ہو۔“ [صحيح الادب المفرد/حدیث: 326]

سیدنا انس بن مالک رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”دو آدمی جب گالی گلوچ کریں تو گناہ ابتداء کرنے والے پر ہو گا جب تک کہ مظلوم زیادتی نہ کرے۔“ [صحيح الادب المفرد/حدیث: 327]

اور نبی صلی اللہ علیہ وسلم نے فرمایا: ”کیا تم جانتے ہو کہ «عضه» (بہتان)کیا ہے؟“ لوگوں نے عرض کیا: اللہ اور اس کا رسول زیادہ جاننے والے ہیں، فرمایا: ”بات کو ایک آدمی سے دوسرے آدمی تک پہنچانا تاکہ ان لوگوں میں فساد برپا ہو جائے۔“ [صحيح الادب المفرد/حدیث: 328]