سیدنا عبداللہ بن عمر رضی اللہ عنہ سے مروی ہے، رسول اللہ صلی اللہ علیہ وسلم عید الاضحی کے دن مدینہ میں (اونٹ) نحر کرتے اور جب (اونٹ)نحر نہ کرتے تو (بھیڑ، بکری) ذبح کرتے تھے۔ [مسند عبدالله بن عمر/حدیث: 81]

سیدنا عبداللہ بن عمر رضی اللہ عنہ سے مروی ہے، ایک آدمی نے رسول اللہ صلی اللہ علیہ وسلم کو مسجدمیں آواز دی اور دریافت کیا، محرم کون سے کپڑے نہ پہنے؟ تو آپ صلی اللہ علیہ وسلم نے فرمایا: ”محرم قمیص، پگڑی، ٹوپی اور شلوار نہ پہنے اور نہ ہی موزے پہنے الا یہ کہ جوتے میسر نہ ہوں۔ اگر جوتے نہ ہوں تو موزے پہن لے اور ان کو ٹخنوں سے نیچے تک کاٹ دے اور نہ ایسا لباس استعمال کرے جس کو زعفران یا ورس (خوشبو) لگی ہو۔“ [مسند عبدالله بن عمر/حدیث: 82]

سیدنا عبداللہ بن عمر رضی اللہ عنہ بیان کرتے ہیں، رسول اللہ صلی اللہ علیہ وسلم نے فرمایا: ”تم میں سے کوئی بھی قربانی کا گوشت تین دن سے زیادہ نہ کھائے۔“
جب تیسرے دن کا سورج غروب ہوجاتا تو عبداللہ بن عمر رضی اللہ عنہ اپنی قربانی کا گوشت نہیں کھاتے تھے۔
[مسند عبدالله بن عمر/حدیث: 83]

سیدنا عبداللہ بن عمر رضی اللہ عنہ نے بیان کیا، رسول اللہ صلی اللہ علیہ وسلم نے فرمایا: ”پانچ جانوروں کو محرم مار سکتا ہے۔ چوہیا، کاٹنے والا کتا، چیل، کوا اور بچھو۔“ [مسند عبدالله بن عمر/حدیث: 84]

سیدنا عبداللہ بن عمر رضی اللہ عنہ نے بیان کیا، رسول اللہ صلی اللہ علیہ وسلم کو جب جلدی سفر پر روانہ ہونا ہوتا تو مغرب کو مؤخر کرتے اور مغرب اور عشاء کوجمع کر لیتے۔ نافع رحمہ اللہ کہتے ہیں، عبداللہ بن عمر رضی اللہ عنہ نے بھی اسی طرح کیا جبکہ میں ان کے ساتھ تھا۔ [مسند عبدالله بن عمر/حدیث: 85]

سیدنا عبداللہ بن عمر رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”تین افراد جا رہے تھے کہ آسمان کی بارش و بجلی نے ان کو گھیر لیا تو انہوں نے ایک پہاڑ کی غارمیں پناہ لی کہ ایک بڑا پتھر اس (غار کے منہ) پر آگرا۔ آگے حدیث کو تفصیل سے بیان کیا۔ [مسند عبدالله بن عمر/حدیث: 86]

سیدنا عبداللہ بن عمر رضی اللہ عنہ سے مروی ہے، نبی اکرم صلی اللہ علیہ وسلم نے فتح مکہ کے دن عورتوں اور بچوں کو قتل کرنے سے منع کیا۔ [مسند عبدالله بن عمر/حدیث: 87]

سیدنا عبداللہ بن عمر رضی اللہ عنہ نے بیان کیا، نمازپڑھنے سے پہلے کھانا کھا لینا مسنون ہے۔ [مسند عبدالله بن عمر/حدیث: 88]

سیدنا عبداللہ بن عمر رضی اللہ عنہ سے مروی ہے، نبی اکرم صلی اللہ علیہ وسلم نے فرمایا: ”جس نے دنیا میں شراب پی وہ آخرت میں نہیں پی سکے گا الا یہ کہ توبہ کر لے۔“ [مسند عبدالله بن عمر/حدیث: 89]

سیدنا عبداللہ بن عمر رضی اللہ عنہ نے نبی اکرم صلی اللہ علیہ وسلم سے متعلق کہاکہ آپ سواری پر نماز پڑھتے تھے۔ اسی طرح وتر بھی سواری پر ادا کر لیتے تھے۔
موسیٰ بن عقبہ کاخیال ہے،نافع رحمہ اللہ سے مروی ہے کہ عبد اللہ بن عمر رضی اللہ عنہ نے بیان کیا،انہوں نے نبی اکرم صلی اللہ علیہ وسلم کو سواری پر وتر پڑھتے دیکھا۔“
[مسند عبدالله بن عمر/حدیث: 90]