سیدنا ابن عمر رضی اللہ عنہما کہتے ہیں کہ نبی کریم صلی اللہ علیہ وسلم نے فرمایا: ”آدمی نماز ادا کرنے والوں، زکوٰۃ دینے والوں، حج و عمرہ کرنے والوں اور جہاد کرنے والوں سے ہوتا ہے۔“ یہاں تک کہ آپ صلی اللہ علیہ وسلم نے نیکی کے تمام حصے ذکر فرمائے تو فرمایا: ”یہ چیزیں قیامت کے روز اس کی عقل کے مطابق ہی اس کے کام آئیں گی۔“ [معجم صغير للطبراني/كِتَابُ صِفَةِ الْجَهَنَّمِ/حدیث: 820]

سیدنا ابوسعید خدری رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”یقیناًً جہنم کے ستر حصوں میں سے انہتر حصے قتل کا حکم کرنے والے کو اور ایک حصہ قاتل کو پہنچے گا، اور وہ اس کو کافی ہو گا۔“ [معجم صغير للطبراني/كِتَابُ صِفَةِ الْجَهَنَّمِ/حدیث: 821]

سیدنا ابوایوب انصاری رضی اللہ عنہ کہتے ہیں: میں نے نبی صلی اللہ علیہ وسلم سے سنا، آپ صلی اللہ علیہ وسلم فرما رہے تھے: ”جس نے رمضان کے روزے رکھے، اور پھر شوال کے چھ روزے رکھے تو گویا اس نے سارے سال کے روزے رکھے۔“ [معجم صغير للطبراني/كِتَابُ صِفَةِ الْجَهَنَّمِ/حدیث: 822]

سیدنا انس رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”اللہ عز و جل قیامت کے روز فرمائے گا: ”جس کے دل میں ایک رائی کے دانے برابر بھی ایمان ہو اس کو آگ سے نکال دو۔“ پھر اللہ تعالیٰ فرمائے گا: ”میری عزت اور جلال کی قسم! جو مجھ پر رات یا دن کسی وقت بھی ایمان لایا اس کو اس شخص کی طرح نہیں کروں گا جو مجھ پر ایمان نہیں لایا۔“ [معجم صغير للطبراني/كِتَابُ صِفَةِ الْجَهَنَّمِ/حدیث: 823]