سیدنا ابن عمر رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا: ”میں مزاح نہیں کرتا اور صرف حق ہی بولتا ہوں۔“ [معجم صغير للطبراني/کتاب الادب/حدیث: 707]

سیدنا ابن عبّاس رضی اللہ عنہما کہتے ہیں: رسول اللہ صلی اللہ علیہ وسلم نے اشج عبدالقیس کو فرمایا: ”تجھ میں دو خصلتیں ہیں جنہیں اللہ پسند فرماتا ہے، ایک حوصلہ اور دوسری آہستگی اور سکون۔“ [معجم صغير للطبراني/کتاب الادب/حدیث: 708]

سیدنا جریر بن عبداللہ رضی اللہ عنہ سے مروی ہے، وہ نبی صلی اللہ علیہ وسلم کے پاس آدمیوں سے بھرے ہوئے ایک گھر میں آئے اور دروازے پر ہی کھڑے ہو گئے، اور نبی صلی اللہ علیہ وسلم دائیں بائیں دیکھنے لگے تو آپ صلی اللہ علیہ وسلم کو کوئی خالی جگہ نظر نہ آئی، تو آپ صلی اللہ علیہ وسلم نے اپنی چادر لپیٹ کر اس کی طرف پھینکی اور فرمایا: ”جریر! اس پر بیٹھ جاؤ۔“ تو انہوں نے اسے اٹھایا اور چوم کر آپ صلی اللہ علیہ وسلم کو واپس کر دی، اور عرض کی: اے اللہ کے رسول صلی اللہ علیہ وسلم ! جس طرح آپ نے میری عزت کی اسی طرح اللہ آپ کو عزت دے، تو سول اللہ صلی اللہ علیہ وسلم نے فرمایا: ”جب تمہارے پاس کسی قوم کا معزز آدمی آئے تو اس کی عزت کرو۔“ [معجم صغير للطبراني/کتاب الادب/حدیث: 709]

سیدنا معاذ بن جبل رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”جس شخص نے حق پر ہونے کے باوجود جھگڑا ترک کر دیا، اور مزاح میں بھی جھوٹ بولنا چھوڑ دیا، اور اپنی خو اور عادت اچّھی بنا لی تو میں اس کے لیے جنّت کے گرد ایک مکان اور ایک جنّت کے وسط میں اور ایک اس کی بلندی میں عطا کرنے کی ضمانت دیتا ہوں۔“ [معجم صغير للطبراني/کتاب الادب/حدیث: 710]

سیدنا انس رضی اللہ عنہ کہتے ہیں کہ مجھے رسول اللہ صلی اللہ علیہ وسلم نے وصیت فرمائی تو فرمایا: ”اے انس! وضو مکمّل کرو، تمہاری عمر بڑھ جائے گی۔ میری امّت سے جس کو بھی ملو اس کو سلام کہو تو تمہاری نیکیاں زیادہ ہوں گی۔ اور جب تم اپنے گھر میں داخل ہو تو اپنے گھر والوں کو سلام کہو۔ اور چاشت کی نماز پڑھو، یہ ”صلوٰۃ الأوابین“ ہے۔ چھوٹوں پر رحم کرو اور بڑے کی عزت کرو، تو تم قیامت کے روز میرے ساتھیوں میں سے ہوگے۔“ [معجم صغير للطبراني/کتاب الادب/حدیث: 711]

سیدنا ابوموسیٰ رضی اللہ عنہ کہتے ہیں کہ نبی صلی اللہ علیہ وسلم نے فرمایا: ”(قیامت کے دن) آدمی اس شخص کے ساتھ ہو گا جس سے وہ محبّت کرتا ہے۔“ [معجم صغير للطبراني/کتاب الادب/حدیث: 712]

سیدنا ابوہریرہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”تم میں سے سب سے زیادہ مجھے محبوب وہ لوگ ہیں جو اخلاق میں سب سے اچھے ہوں، اور نرم پہلو رکھنے والے جو دوسروں سے الفت رکھتے ہیں اور ان سے بھی الفت رکھی جاتی ہے، اور تم میں میری طرف سب سے برے لوگ وہ ہیں جو چغلیاں کھاتے ہیں، دوستوں میں جدائی ڈال دیتے ہیں، اور پاک دامن لوگوں کے عیب تلاش کرتے ہیں۔“ [معجم صغير للطبراني/کتاب الادب/حدیث: 713]

سیدنا ابن عمر رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا: ”آدمی جب ایک جھوٹ بولتا ہے تو فرشتہ اس سے ایک میل کی مسافت تک اس کی بدبو کی وجہ سے بھاگ جاتا ہے۔“ [معجم صغير للطبراني/کتاب الادب/حدیث: 714]

سیدنا انس بن مالک رضی اللہ عنہ کہتے ہیں: نبی کریم صلی اللہ علیہ وسلم بچوں کے ساتھ سب لوگوں سے زیادہ خوش مزاجی کرتے تھے۔“ [معجم صغير للطبراني/کتاب الادب/حدیث: 715]

سیدنا علی رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”تین باتیں برحق ہیں: (1) جس شخص کا دین میں کوئی حصّہ نہیں، اللہ تعالیٰ اس کو اس شخص کی طرح نہیں کرے گا جس کا اسلام میں حصّہ ہو۔ (2) اور جس کو اللہ تعالیٰ اپنا دوست بنا لے، اس کو کسی دوسرے کے حوالے نہیں کرتا۔ (3) جو شخص جن لوگوں سے بھی محبّت کرتا ہے اس کا حشر قیامت کے روز انہیں کے ساتھ ہو گا۔“ [معجم صغير للطبراني/کتاب الادب/حدیث: 716]