سیدنا انس بن مالک رضی اللہ عنہ نبی کریم صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”علم کو حاصل کرنا ہر مسلمان پر لازم اور ضروری ہے۔“ [معجم صغير للطبراني/کِتَابُ الْعِلْم/حدیث: 68]

سیدنا حسین بن علی رضی اللہ عنہما فرماتے ہیں: رسول اللہ صلی اللہ علیہ وسلم نے فرمایا: ”علم حاصل کرنا ہر مسلمان پر فرض ہے۔“ اس کو سیدنا حسین بن علی رضی اللہ عنہما سے صرف اسی سند سے روایت کیا گیا ہے۔ [معجم صغير للطبراني/کِتَابُ الْعِلْم/حدیث: 69]

سیدنا ابوہریرہ رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”جس سے کوئی علم کی بات پوچھی گئی، اس نے وہ چھپا لی تو اسے قیامت کے روز آگ کی لگام پہنائی جائے گی۔“ [معجم صغير للطبراني/کِتَابُ الْعِلْم/حدیث: 70]

یحییٰ بن ابی کثیر کہتے ہیں: جس نے یہ کہا کہ میں عالم ہوں تو وہ جاہل ہے، اور جو کہے کہ میں جاہل ہوں وہ جاہل ہے، اور جو کہے میں جنّت میں جاؤں گا تو وہ جہنّم میں جائے گا، اور جو کہے کہ میں جہنّم میں جاؤں گا تو وہ بھی جہنّم میں جائے گا۔ [معجم صغير للطبراني/کِتَابُ الْعِلْم/حدیث: 71]

سیدنا ابوقرصافہ جندرہ بن خیشنہ لیثی رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”اللہ اس آدمی کو تر و تازہ رکھے جو میرى بات کو سن کر یاد رکھتا ہے اور اس کى حفاظت کرتا ہے۔ بہت سارے علم کے حامل اپنے سے زیادہ جاننے والوں تک پہنچاتے ہیں۔ تین چیزیں ہیں کہ دل کو ان پر خیانت نہیں کرنى چاہیے، ایک اخلاصِ عمل اللہ کے لئے، حاکموں سے خیر خواہى اور جماعت کے ساتھ لازم رہنا۔“ [معجم صغير للطبراني/کِتَابُ الْعِلْم/حدیث: 72]

سیدنا ابوہریرہ رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”جس شخص سے کوئی علم کی بات پوچھی جائے، وہ اس کو چھپا دے تو قیامت کے روز اس کو آگ کی لگام دی جائے گی۔“ [معجم صغير للطبراني/کِتَابُ الْعِلْم/حدیث: 73]

سیدنا انس بن مالک رضی اللہ عنہ کہتے ہیں کہ نبی صلی اللہ علیہ وسلم نے فرمایا: ”جو شخص علم حاصل کرنے کے لیے گھر سے نکلا تو اس کا سفر واپسی تک فی سبیل اللہ شمار ہوگا۔“ [معجم صغير للطبراني/کِتَابُ الْعِلْم/حدیث: 74]

سیدنا ابوقتادہ رضی اللہ عنہ کہتے ہیں کہ میں نے نبی صلی اللہ علیہ وسلم سے سنا: ”بہترین چیز جو مرنے کے بعد انسان پیچھے چھوڑ جاتا ہے وہ نیک اولاد ہے جو اس کے لیے دعا کرے، اور صدقہ جاریہ ہے جس کا اجر اس کو پہنچتا رہتا ہے، اور وہ علم جس پر اس کے بعد عمل کیا جائے۔“ [معجم صغير للطبراني/کِتَابُ الْعِلْم/حدیث: 75]

سیدنا ابوہریرہ رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”جس سے کسی علم کے متعلق پوچھا گیا، اور اس نے وہ چھپا لیا تو اسے قیامت کے روز آگ کی لگام پہنائی جائے گی۔“ [معجم صغير للطبراني/کِتَابُ الْعِلْم/حدیث: 76]

سیدنا عبداللہ بن عمر رضی اللہ عنہما کہتے ہیں: رسول اللہ صلی اللہ علیہ وسلم نے فرمایا: ”اللہ تعالیٰ علم لوگوں سے چھین کر قبض نہیں کرے گا بلکہ علم کو علماء کے فوت کرنے سے اٹھائے گا، جب کوئی عالم نہ رہے گا تو لوگ جاہلوں کو مفتی بنا لیں گے، تو ان سے جب مسئلہ پوچھا جائے تو وہ بغیر علم فتویٰ دیں گے، وہ خود گمراہ ہوں گے اور اوروں کو بھی گمراہ کریں گے۔“ [معجم صغير للطبراني/کِتَابُ الْعِلْم/حدیث: 77]