1. صدقہ فطر کی مقدار کا بیان۔
سیدنا عبداللہ بن عمر رضی اللہ عنہما کہتے ہیں کہ رسول اللہ صلی اللہ علیہ وسلم نے صدقہ فطر کے لیے کھجوروں کا یا ”جو“ کا ایک صاع مسلمانوں میں سے ہر غلام اور آزاد اور مرد اور عورت اور بچے اور بڑے سب پر فرض فرمایا اور لوگوں کو نماز (عید) کے لیے نکلنے سے پہلے اسے ادا کر دینے کا حکم دیا ہے۔ [مختصر صحيح بخاري/حدیث: 766]
2. نمازعید سے پہلے صدقہ (فطر دے دینا چاہیے)۔
سیدنا ابو سعید خدری رضی اللہ عنہ کہتے ہیں کہ ہم نبی کریم صلی اللہ علیہ وسلم کے عہد میں عیدالفطر کے دن ایک صاع کھانا (محتاجوں کو) دیا کرتے تھے اور ہمارا کھانا ”جو، خشک انگور، پنیر اور کھجور“ تھا۔ [مختصر صحيح بخاري/حدیث: 767]
3. صدقہ فطر، آزاد اور غلام دونوں پر واجب ہے۔
سیدنا عبداللہ بن عمر رضی اللہ عنہما سے روایت ہے کہ صدقہ فطر، ایک صاع کھجوریں یا ایک صاع جو، نبی کریم صلی اللہ علیہ وسلم نے ہر مسلمان مرد، عورت اور آزاد اور غلام سب پر فرض کر دیا ہے۔ [مختصر صحيح بخاري/حدیث: 768]