سیدنا عثمان بن ابو العاص رضی اللہ عنہ کہتے ہیں کہ میں نے رسول اللہ صلی اللہ علیہ وسلم سے قرآن مجید بھول جانے کی شکایت کی۔ آپ صلی اللہ علیہ وسلم نے میرے سینے پر ہاتھ مارا اور فرمایا: ”او شیطان! عثمان کے سینے سے نکل جا۔“ آپ صلی اللہ علیہ وسلم نے ایسے تین دفعہ کیا۔ عثمان کہتے ہیں: اس کے بعد مجھے کوئی ایسا لفظ نہیں بھولا، جس کو میں یاد کرنا پسند کرتا تھا۔ [سلسله احاديث صحيحه/الطب والعيادة/حدیث: 1657]

سیدہ ام المنذر بنت قیس انصاریہ رضی اللہ عنہا کہتی ہیں: رسول اللہ صلی اللہ علیہ وسلم میرے پاس آئے، آپ صلی اللہ علیہ وسلم کے ہمراہ سیدنا علی رضی اللہ عنہ بھی تھے، جو ابھی بھی (کسی بیماری سے) صحت یاب ہوئے تھے۔ کچھ نیم پختہ کھجوریں، جو پک گئیں تھیں، لٹکی ہوئی تھیں۔ رسول اللہ صلی اللہ علیہ وسلم نے ان کو کھانا شروع کر دیا اور سیدنا علی بھی کھانے کے لیے کھڑے ہوئے، لیکن رسول اللہ صلی اللہ علیہ وسلم نے یوں کہہ کر منع فرمانا شروع کر دیا: ”رک جاؤ، کیونکہ ابھی تک بیماری کی کمزوری باقی ہے۔“ سو وہ رک گئے۔ میں نے جو اور چقندر کا ایک کھانا تیار کیا اور آپ صلی اللہ علیہ وسلم کے پاس لے کر آئی۔ رسول اللہ صلی اللہ علیہ وسلم نے فرمایا: ”علی! یہ کھانا کھاؤ، یہ تمہارے لیے زیادہ مفید ہے۔“ [سلسله احاديث صحيحه/الطب والعيادة/حدیث: 1658]