امام مالک رحمہ اللہ نے فرمایا: کسی شخص کو نہ چاہیے کہ بعد نمازِ عصر کے اور فجر کے آیت سجدہ کی پڑھے، اس لئے کہ رسول اللہ صلی اللہ علیہ وسلم نے منع کیا نماز سے بعد صبح کے یہاں تک کہ طلوع ہو آفتاب، اور منع کیا نماز سے بعد عصر کی یہاں تک کہ غروب ہو آفتاب، اور سجدۂ تلاوت بھی بمنزلہ نماز کے ہے، تو کسی شخص کو نہیں چاہیے کہ آیت سجدہ کی ان دونوں وقتوں میں پڑھے۔ [موطا امام مالك رواية يحييٰ/كِتَابُ الْقُرْآنِ/حدیث: 484B3]

امام مالک رحمہ اللہ سے سوال ہوا کہ ایک شخص نے آیت سجدہ کی پڑھی اور ایک عورت حائضہ نے سنا، کیا وہ عورت بھی سجدہ کرے؟ تو جواب دیا امام مالک رحمہ اللہ نے کہ نہیں، مرد یا عورت دونوں کو سجدہ جب ہی درست ہے کہ وہ دونوں باوضو ہوں۔ [موطا امام مالك رواية يحييٰ/كِتَابُ الْقُرْآنِ/حدیث: 484B4]

امام مالک رحمہ اللہ سے سوال ہوا کہ ایک عورت نے آیت سجدہ کی پڑھی اور کسی مرد نے اس کو سنا، کیا وہ مرد بھی سجدہ کرے عورت کے ساتھ؟ جواب دیا: نہیں، بلکہ سجدہ سننے والے پر جب واجب ہوتا ہے کہ وہ سننے والے مقتدی ہوں اس شخص کے جو آیت سجدہ کی پڑھتا ہے، اور یہ بات نہیں ہے کہ جو شخص آیت سجدہ کی کسی سے سنے اور وہ مقتدی نہ ہو پڑھنے والے کا تو وہ سجدہ کرے۔ [موطا امام مالك رواية يحييٰ/كِتَابُ الْقُرْآنِ/حدیث: 484B5]

سیدنا ابوسعید خدری رضی اللہ عنہ سے روایت ہے کہ میں نے سنا ایک شخص کو «﴿قُلْ هُوَ اللَّهُ أَحَدٌ﴾» بار بار پڑھتے ہوئے، تو جب صبح ہوئی آئے رسول اللہ صلی اللہ علیہ وسلم کے پاس اور بیان کیا اُن سے یہ امر، اور سیدنا ابوسعید رضی اللہ عنہ اپنی دانست میں کم جانتے تھے اس سورۃ کو، پس فرمایا آنحضرت صلی اللہ علیہ وسلم نے: ”قسم ہے اس ذات کی جس کے قبضۂ قدرت میں میری جان ہے کہ یہ سورۃ برابر ہے تہائی قرآن کے۔“ [موطا امام مالك رواية يحييٰ/كِتَابُ الْقُرْآنِ/حدیث: 485]

سیدنا ابوہریرہ رضی اللہ عنہ سے روایت ہے، کہتے تھے: آیا میں رسول اللہ صلی اللہ علیہ وسلم کے ساتھ، سو سنا آپ صلی اللہ علیہ وسلم نے ایک شخص کو «﴿قُلْ هُوَ اللّٰهُ أَحَدٌ﴾» پڑھتے ہوئے۔ فرمایا: ”واجب ہوئی۔“ پوچھا میں نے: کیا چیز؟ فرمایا: ”جنت۔“ کہا سیدنا ابوہریرہ رضی اللہ عنہ نے: میں نے چاہا کہ اس شخص کو جاکر خوشخبری دوں، لیکن میں ڈرا کہ ایسا نہ ہو کہ میرا صبح کا کھانا جاتا رہے رسول اللہ صلی اللہ علیہ وسلم کے ساتھ، تو میں نے پہلے کھانا کھایا، پھر گیا میں تو دیکھا کہ وہ شخص چلا گیا تھا۔ [موطا امام مالك رواية يحييٰ/كِتَابُ الْقُرْآنِ/حدیث: 486]

حمید بن عبدالرحمٰن بن عوف نے کہا کہ «﴿قُلْ هُوَ اللّٰهُ أَحَدٌ﴾» برابر ہے تہائی قرآن کے اور «﴿تَبَارَكَ الَّذِي بِيَدِهِ الْمُلْكُ﴾» لڑے گی اپنے پڑھنے والی کی طرف سے۔ [موطا امام مالك رواية يحييٰ/كِتَابُ الْقُرْآنِ/حدیث: 487]

سیدنا ابوہریرہ رضی اللہ عنہ سے روایت ہے کہ فرمایا رسول اللہ صلی اللہ علیہ وسلم نے: ”جو شخص کہے «لَا إِلَهَ إِلَّا اللّٰهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرٌ» ایک روز میں سو بار تو گویا اس نے دس غلام آزاد کئے، اور سو نیکیاں اس کے لئے لکھی جائیں گی، اور سو برائیاں اس کی مٹائی جائیں گی، اور وہ اس دن بھر شیطان کے شر سے بچا رہے گا یہاں تک کہ شام ہو، اور کوئی شخص اس سے بہتر عمل نہ لائے گا مگر جو اس سے بھی زیادہ عمل کرے۔“ [موطا امام مالك رواية يحييٰ/كِتَابُ الْقُرْآنِ/حدیث: 488]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس شخص نے کہا: «سُبْحَانَ اللّٰهِ وَبِحَمْدِهِ» ایک دن میں سو بار، مٹائے جائیں گے گناہ اس کے اگرچہ ہوں مثلِ سمندر کے پھین (جھاگ) کے۔“ [موطا امام مالك رواية يحييٰ/كِتَابُ الْقُرْآنِ/حدیث: 489]

سیدنا ابوہریرہ رضی اللہ عنہ نے کہا: جو شخص ہر نماز کے بعد «سُبْحَانَ اللّٰهِ» کہے تینتیس بار اور «اَللّٰهُ أَكْبَر» کہے تینتیس بار اور «اَلْحَمْدُ لِلّٰهِ» کہے تینتیس بار اور ختم کرے سو کے عدد «لَا إِلٰهَ إِلَّا اللّٰهُ، وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرٌ»، پس بخش دیئے جائیں گے گناہ اس کے اگرچہ ہوں مثل سمندر کی پھین (یعنی جھاگ) کے۔ [موطا امام مالك رواية يحييٰ/كِتَابُ الْقُرْآنِ/حدیث: 490]

سعید بن مسیّب نے کہا: باقیات صالحات یہ کلمے ہیں: «اَللّٰهُ أَكْبَرُ»، «سُبْحَانَ اللّٰهِ»، «اَلْحَمْدُ لِلّٰهِ»، «لَا إِلٰهَ إِلَّا اللّٰهُ»، «لَا حَوْلَ وَلَا قُوَّةَ إِلَّا بِاللّٰهِ» ۔ [موطا امام مالك رواية يحييٰ/كِتَابُ الْقُرْآنِ/حدیث: 491]