سیدنا عبداللہ بن عمرو رضی اللہ عنہ کہتے ہیں کہ ہم رسول اللہ صلی اللہ علیہ وسلم کے پاس بیٹھے ہوئے تھے کہ بادیہ نشینوں میں سے ایک شخص آیا وہ سبز شال کا جبہ پہنے ہوئے تھا۔ یہاں تک کہ وہ نبی صلی اللہ علیہ وسلم کے سر پر کھڑا ہو گیا، اور کہنے لگا: تمہارے ان صاحب نے ہر شہسوار کا مرتبہ گرا دیا۔ یا کہا کہ تمہارے یہ صاحب چاہتے ہیں کہ ہر سوار کا مرتبہ گرا دیں اور ہر چرواہے کا مرتبہ بلند کر دیں اس پر نبی صلی اللہ علیہ وسلم نے اس کے جبہ کو مجتمع کر کے پکڑ لیا اور فرمایا: ”کیا میں تم پر یہ بیوقوفوں کا لباس نہیں دیکھ رہا ہوں“، پھر فرمایا: ”جب اللہ کے نبی نوح علیہ السلام کی وفات کا وقت آیا تو انہوں نے اپنے بیٹے سے کہا: میں تم سے ایک وصیت بیان کر رہا ہوں میں تمہیں دو باتوں کا حکم دیتا ہوں اور دو باتوں سے منع کرتا ہوں میں تمہیں «لا اله الا الله» کا حکم دیتا ہوں، اگر ساتوں آسمان اور ساتوں زمینیں ترازو کے ایک پلڑے میں رکھ دی جائیں اور دوسرے پلڑے میں «لا اله الا الله» رکھ دیا جائے تو اس کا پلہ بھاری ہو گا، اور اگر ساتوں آسمان اور ساتوں زمینیں انگوٹھی بن جائیں تو «لا اله الا الله وسبحان الله وبحمده» اس کو توڑ دیں گی (ایک روایت میں ہے اس کا نگینہ ہوں گی)، یہی ہر چیز کی نماز ہے اور اسی سے ہر چیز کو رزق دیا جاتا ہے اور میں تمہیں شرک اور تکبر سے منع کرتا ہوں“، اس پر میں نے عرض کیا یا عرض کیا گیا: یا رسول اللہ! یہ شرک تو ہم نے پہچان لیا لیکن تکبر کیا ہے؟ کیا تکبر یہ ہے کہ ہم میں سے کسی کے پاس حلہ ہو وہ اسے پہن لے؟ فرمایا: ”نہیں“، عرض کیا گیا کہ کیا یہ ہے کہ ہم میں سے کسی کے پاس بہت ہی خوبصورت جوتے ہوں، اور اس کے بہت ہی خوبصورت تسمے ہوں؟ فرمایا: ”نہیں“، عرض کیا گیا کہ کیا کیا یہ ہے کہ کسی کے پاس بہت اچھا جانور ہو جس پر وہ سواری کرے؟ فرمایا: ”نہیں“، عرض کیا گیا کہ کسی کے پاس احباب ہوں جو اس کے پاس ادب سے بیٹھتے ہوں؟ آپ صلی اللہ علیہ وسلم نے فرمایا: ”یہ بھی نہیں“، عرض کیا: یا رسول اللہ! تو پھر تکبر کیا ہے؟ آپ صلی اللہ علیہ وسلم نے فرمایا: ”حق کو ٹھکرا دینا اور لوگوں کو حقیر سمجھنا۔“ [صحيح الادب المفرد/حدیث: 426]

سیدنا عبداللہ بن عمر رضی اللہ عنہما سے مروی ہے وہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جس نے اپنی ذات کو بڑا سمجھا یا اپنی چال میں تکبر اختیار کی وہ اللہ عزوجل سے اس حال میں ملے گا کہ وہ اس پر غضبناک ہو گا۔“ [صحيح الادب المفرد/حدیث: 427]

سیدنا ابوہریرہ رضی اللہ عنہ سے روایت ہے انہوں نے کہا کہ رسول اللہ صلی اللہ علیہ وسلم نے فرمایا: ”جس نے اپنے خادم کے ساتھ کھانا کھا لیا اور گدھے پر سوار ہو کر بازاروں میں چلا گیا، اور بکری کو ٹانگوں سے جکڑ کر اس کا دودھ دوہ لیا، اس میں تکبر نہیں ہے۔“ [صحيح الادب المفرد/حدیث: 428]

سیدنا ابوسعید خدری اور اور سیدنا ابوہریرہ رضی اللہ عنہما سے روایت ہے وہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”عزت اللہ کا تہبند ہے اور بڑائی اللہ کی اوپر اوڑھنے والی چادر ہے جو ان دونوں میں سے کوئی بھی چیز مجھ سے چھینے گا میں اس کو عذاب دوں گا۔“ [صحيح الادب المفرد/حدیث: 429]

ہیثم بن مالک طائی سے مروی ہے انہوں نے کہا کہ میں نے نعمان بن بشیر کو منبر پر کہتے ہوئے سنا: بیشک شیطان کے جال اور شکنجے ہوتے ہیں اور بیشک شیطان کے جال اور شکنجے اللہ کی نعمتوں پر سرکشی کرنا (مغرور ہو جانا) ہے اور اللہ کے عطیہ پر فخر کرنا ہے اور اللہ کے بندوں پر بڑائی کا اظہار کرنا اور اللہ کی ذات کو چھوڑ کر اپنی خواہشات کی اتباع کرنا ہے۔ [صحيح الادب المفرد/حدیث: 430]

سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جنت و دوزخ کا آپس میں جھگڑا ہوا“، اور سفیان نے یہ بھی کہا: ”جنت دوزخ جھگڑ پڑے۔ جہنم نے کہا: میرے اندر ظالم (اور جابر) جمع ہوں گے اور میرے اندر متکبر داخل ہوں گے اور جنت نے کہا: میرے اندر کمزور داخل ہوں گے اور میرے اندر فقراء داخل ہوں گے۔ اللہ تبارک وتعالیٰ نے جنت سے فرمایا: تو میری رحمت ہے میں جسے چاہوں گا تیرے ذریعے (اس پر) رحم کروں گا اور جہنم سے فرمایا: تو میرا عذاب ہے میں جسے چاہوں گا تیرے ذریعہ عذاب دوں گا اور تم دونوں میں سے ہر ایک کو میں نے بھرنا ہے۔“ [صحيح الادب المفرد/حدیث: 431]

ابوسلمہ بن عبدالرحمن سے روایت ہے انہوں نے کہا کہ رسو ل اللہ صلی اللہ علیہ وسلم کے صحابہ مجتمع ہونے والے نہیں تھے اور نہ اپنے آپ کو بیمار و کمزور ظاہر کرنے والے تھے (یعنی ایسے ظاہر نہیں کرتے تھے کہ عبادت کر کر کے وہ تھک گئے ہیں) اور وہ اپنی مجلسوں میں ایک دوسرے کو شعر و شاعری سنایا کیا کرتے تھے اور وہ اپنے جاہلیت کے حالات کو یاد کیا کرتے تھے اور جب ان میں سے کسی ایک کو اللہ کے حکم پر کسی چیز پر طلب کیا جاتا تو اس کی آنکھوں کی پتلیاں گھومنے لگتیں گویا کہ وہ مجنون ہے۔ (یعنی اللہ کے حکم پر اتنے پریشان ہو جاتے کہ اپنی پوری آنکھیں کھول دیتے اور اس پر خوفزدہ ہوتے کہ کہیں ان سے عمل میں کوتاہی نہ ہو جائے۔) [صحيح الادب المفرد/حدیث: 432]

سیدنا ابوہریرہ رضی اللہ عنہ سے مروی ہے کہ نبی صلی اللہ علیہ وسلم کی خدمت میں ایک شخص حاضر ہوا، اور وہ خوبصورت تھا، اس نے کہا: میرے دل میں خوبصورت بننے کی محبت ڈال دی گئی ہے، اور مجھے یہ (جمال) عطا بھی ہوا ہے جیسا کہ آپ دیکھ رہے ہیں، حتیٰ کہ مجھے یہ پسند نہیں کہ کوئی شخص اس (حسن و جمال) میں مجھ سے بڑھ جائے، یا یہ کہا کہ جوتے کے ایک تسمے کے برابر یا کہا کہ سرخ تسمے کے برابر، کیا یہ تکبر ہے؟ آپ صلی اللہ علیہ وسلم نے فرمایا: ”نہیں، لیکن تکبر یہ ہے کہ جو حق کو ٹھکرا دے اور لوگوں کو حقیر جانے۔“ [صحيح الادب المفرد/حدیث: 433]

عمرو بن شعیب اپنے والد سے اور وہ اپنے دادا سے روایت بیان کرتے ہیں کہ نبی صلی اللہ علیہ وسلم نے فرمایا: ”قیامت کے دن متکبروں کو چیونٹیاں بنا کر مردوں کی صورت میں اٹھایا جائے گا ان پر ہر طرف سے ذلت چھائی ہو گی اور ہنکا کر انہیں دوزخ کے ایک قید خانے میں پہنچا دیا جائے گا جس کا نام بولس ہے، ان پر دہکتی ہوئی آگ غالب آ جائے گی اور انہیں جہنمیوں کے زخموں کی پیپ پلائی جائے گی (یعنی لہوکچلو)۔“ [صحيح الادب المفرد/حدیث: 434]