ام المؤمنین عائشہ رضی اللہ عنہا کہتی ہیں کہ نبی کریم صلی اللہ علیہ وسلم نے ایک شخص کو مسجد میں قرآن پڑھتے ہوئے دیکھا تو فرمایا: ”اللہ تعالیٰ اس شخص پر رحمت کرے، بیشک اس نے فلاں فلاں سورتوں کی فلاں فلاں آیات جو کہ میں بھول گیا تھا مجھے یاد دلا دیں۔“ [مختصر صحيح بخاري/حدیث: 1177]

ام المؤمنین عائشہ رضی اللہ عنہا ایک دوسری روایت میں کہتی ہیں کہ نبی کریم صلی اللہ علیہ وسلم نے میرے گھر میں تہجد کی نماز پڑھی پھر عباد رضی اللہ عنہ کی آواز سنی وہ مسجد میں نماز پڑھ رہے تھے تو آپ صلی اللہ علیہ وسلم نے فرمایا: ”اے عائشہ! کیا یہ عباد کی آواز ہے؟“ میں نے عرض کی جی ہاں تو فرمایا: ”اے اللہ عباد پر رحمت فرما۔“ [مختصر صحيح بخاري/حدیث: 1178]