فوائد ومسائل:
آیت کریمہ: ﴿هَلْ جَزَآءُ الْاِِحْسَانِ اِِلَّا الْاِِحْسَانُ﴾ کی تفسیر یہ ہے کہ جو شخص دنیا میں اچھے اعمال کرے گا اسے آخرت میں اللہ تعالیٰ اچھا بدلہ عطا کرے گا بلکہ اپنی طرف سے زیادہ بھی عنایت فرمائے گا۔ اسی طرح دنیا میں اگر کوئی برا شخص کسی کے ساتھ نیکی کرتا ہے تو اس کا بدلہ بھی دینا چاہیے قطع نظر اس کے کہ وہ برا ہے یا اچھا۔ بلکہ برا سلوک کرنے والے کے ساتھ بھی حسن سلوک کرنا چاہیے۔ آپ صلی اللہ علیہ وسلم کا ارشاد گرامی ہے:
((لَیْسَ الْوَاصِلُ بِالْمُکَا فِیئِ وَلٰکِنِ الْوَاصِلُ الَّذِی إذَا قُطِعَتْ رَحِمُهُ وَصَلَهَا))
”بدلہ دینے والا صلہ رحمی کرنے والا نہیں، حقیقتاً صلہ رحمی کرنے والا وہ ہے کہ جس کے ساتھ قطع رحمی کی جائے تو بھی وہ صلہ رحمی کرے۔“ (صحیح البخاري، الأدب، حدیث:۵۹۹۱)