فوائد:
حج کی تین اقسام ہیں: (1).... حج تمتع۔ (2).... حج قران۔ (3).... حج افراد
(1).... حج تمتع سے مراد ہے حج کے مہینوں میں عمرے کا احرام باندھ کر مکہ معظمہ میں داخل ہونا۔ عمرہ کرکے احرام کھول دینا اور پھر غیر محرم ہی رہنا حتی کہ ایام حج میں حج کرنا، اس میں قربانی کرنا ضروری ہے۔
(2).... حج قران سے مراد میقات سے عمرہ اور حج دونوں کا احرام باندھنے کے بعد مکہ پہنچ کر عمرہ کرنا، لیکن سعی کے بعد نہ بال اتروانا اور نہ ہی احرام کھولنا۔ بلکہ حالت احرام میں ہی اعمال حج مکمل کرنا ہے۔ حج قران کرنے والے پر قربانی واجب ہے۔ اور جو قربانی کی طاقت نہ رکھتا ہو وہ دس روزے رکھے۔ قربانی اگر ساتھ لے جائے تو بہتر ہے کیونکہ یہی مسنون طریقہ ہے اور اس میں تین طواف: طواف عمرہ، طواف حج اور طواف وداع۔ اور دو سعی: سعی عمرہ اور سعی حج ضروری ہیں۔
(3).... حج افراد سے مراد حج مفرد ہے۔ حج مفرد میقات سے صرف حج کے لیے احرام باندھ کر تمام مناسک حج سر انجام دینے کو کہتے ہیں اور عمرہ مفردہ میقات سے صرف عمرے کے قصد سے احرام باندھ کر عمرے کے تمام افعال سے فراغت حاصل کرنا ہے۔ اس میں قربانی واجب نہیں ہے۔ رسول اللہ صلی اللہ علیہ وسلم نے اگرچہ حج قران کیا ہے لیکن حج تمتع کی خواہش کا اظہار کیا ہے۔ امام مالک اور امام احمد ; کا موقف ہے کہ حج تمتع افضل ہے۔ (فتح الباري: 4؍ 216۔ کتاب الام: 2؍ 312۔ المغنی: 5؍ 82)
علامہ شوکانی رحمہ اللہ کا بھی یہی موقف ہے کہ حج تمتع افضل ہے۔ (نیل الاوطار: 3؍ 317)
مولانا صدیق حسن خان رحمہ اللہ کا بھی یہی موقف ہے کہ حج تمتع افضل ہے۔ (الروضة الندیة: 1؍ 594)
یہ بھی معلوم ہوا حج کے مہینوں میں عمرہ کرنا جائز ہے۔ اس کی وضاحت پیچھے گزر چکی ہے۔