تخریج:
«أخرجه البخاري، الجمعة، باب الساعة التي في يوم الجمعة، حديث:935، ومسلم، الجمعة، باب في الساعة التي في يوم الجمعة، حديث:852.» تشریح:
اس حدیث سے معلوم ہوتا ہے کہ جمعے کے روز ایک مخصوص وقت ایسا ہے جس میں بندے کی ہر دعا (سوائے قطع رحمی اور گناہ کے) شرف قبولیت سے ہمکنار ہوتی ہے۔
نبی صلی اللہ علیہ وسلم نے اس کی تعیین بیان نہیں فرمائی۔
اس گھڑی کو بھی شب قدر کی طرح مخفی اور پوشیدہ رکھا تاکہ لوگ اسے تلاش کرنے میں اپنا زیادہ سے زیادہ قیمتی وقت صرف کریں۔
اس طرح ان کا شوق جستجو بڑھے اور ان کی نیکیوں میں اضافہ ہو۔

تخریج الحدیث:
[وأخرجه البخاري 935، ومسلم 852، من حديث مالك به]
قولِ راجح میں جمعہ کے دن عصر کے بعد مغرب تک کا وقت دعا کی مقبولیت کا وقت ہوتا ہے لہٰذا اسے غنیمت سمجھتے ہوئے کثرت سے اذکار و ادعیہ میں مصروف رہنا چاہئے۔ واضح رہے کہ دعا صرف اللہ ہی سے مانگنی چاہئے۔
تفقه:
➊ جمعہ کے دن مقبولیت دعا کے وقت کے بارے میں روایات میں اختلاف ہے:
◄ ایک روایت میں آیا ہے کہ یہ جمعہ کے دن کا آخری وقت ہوتا ہے۔ دیکھئے الموطأ حدیث: 515
◄ سیدنا ابوموسیٰ الاشعری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: یہ وقت امام کے (منبر پر) بیٹھنے اور نماز ختم ہونے کے درمیان ہے۔ [صحيح مسلم: 853، دارالسلام: 1975]
◄ سیدنا جابر بن عبداللہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: «فالتمسوھا آخر ساعة بعد العصر۔» اسے عصر کے بعد آخری گھڑی میں تلاش کرو۔ [سنن ابي داود: 1048، وسنده صحيح وصححه الحاكم عليٰ شرط مسلم 1/279 ووافقه الذهبي]
● بعض کہتے ہیں کہ «فالتمسوها» سے آخر تک ابوسلمہ بن عبدالرحمٰن رحمہ اللہ راویٔ حدیث کا قول ہے لیکن اس قول کی کوئی دلیل معلوم نہیں ہے۔ واللہ اعلم
● ممکن ہے کہ مختلف لوگوں کے احوال کے لحاظ سے مقبولیتِ دعا کی یہ گھڑی کسی کے لئے بعد از عصر ہو اور کسی کے لئے خطبے اور نماز کے درمیان ہو۔ واللہ اعلم
➋ کھڑے ہو کر نماز پڑھنے سے یہ بھی مراد ہوسکتی ہے کہ مذکورہ شخص نماز کا پابند ہو۔ دیکھئے [التمهيد 19/18، 19] اور [فتح الباري 2/416 تحت ح935،]
➌ طاؤس تابعی رحمہ اللہ نے فرمایا: یہ وقت جس کی اُمید ہے، جمعہ کے دن عصر کے بعد ہوتا ہے۔ [مصنف ابن ابي شيبه 2/144 ح5471 وسنده صحيح]
➍ باقی ایام کی بہ نسبت جمعہ کا دن سب سے افضل ہے۔
➎ نماز میں اپنے لئے عربی زبان میں ہر اچھی دعا مانگنا جائز ہے اگرچہ اس کے الفاظ حدیث میں نہ ملیں۔
➏ ابوسلمہ بن عبدالرحمٰن بن عوف نے کہا: صحابۂ کرام میں سے کچھ لوگ اکٹھے ہوئے تو انہوں نے جمعہ کے دن کی گھڑی کے بارے میں تذکرہ کیا پھر ان کا اس پر اتفاق ہوگیا کہ یہ جمعے کی آخری گھڑی ہے۔ [الاوسط لابن المنذر 4/13، وسنده صحيح]
➐ حافظ ابن حجر رحمہ اللہ نے فتح الباری میں اس حدیث کی تشریح میں طویل بحث و تحقیق لکھی ہے۔ رحمہ اللہ

شرح الحدیث:
اس حدیث سے جمعہ کے دن کی فضیلت ثابت ہوتی ہے۔ اور اس دن میں ایسی گھڑی ہے جو الله تعالیٰ کی خاص رحمت اور قبولیت کی گھڑی ہوتی ہے۔ اس گھڑی کے تعین میں اختلاف ہے کہ یہ گھڑی کس وقت آتی ہے؟ بعض صحابہ کا خیال یہ ہے کہ یہ گھڑی عصر کے بعد سے غروب شمس تک ہے، اس بات کو سعید بن جبیر نے عبدالله بن عباس رضی الله عنہما سے روایت کیا ہے، اور یہی قول امام احمد اور اسحاق بن راہویہ رحمہما الله کا ہے۔
امام احمد بن حنبل رحمة الله عليه فرماتے ہیں کہ اکثر احادیث سے یہی ثابت ہوتا ہے کہ یہ گھڑی عصر کے بعد ہے، اور زوال شمس کے بعد بھی اس کی امید کی جا سکتی ہے۔ [شرح السنة: 209/4 - سنن الترمذي، تحت حديث، رقم: 489]
سیدنا انس بن مالک رضی الله عنہ نے نبی صلی الله علیہ وسلم سے روایت کیا ہے کہ آپ صلی الله علیہ وسلم نے فرمایا:
«التمسوا الساعة التى ترجى فى يوم الجمعة بعد العصر إلى غيبوبة الشمس» [سنن الترمذي، كتاب الجمعه، رقم: 489]
- البانی رحمه الله نے اسے ”حسن“ کہا ہے۔
”جس گھڑی میں دعا کے قبول ہونے کی امید ہے تم اسے عصر کے بعد سے سورج کے غروب ہونے تک تلاش کرو۔“
سیدنا جابر بن عبدالله رضی الله عنہ، نبی مکرم صلی الله علیہ وسلم سے روایت کرتے ہیں کہ آپ صلی الله علیہ وسلم نے فرمایا:
«فالتمسوها آخر ساعة بعد العصر» [سنن أبو داؤد، رقم: 1048 - سنن نسائي، رقم: 139 - مستدرك حاكم: 279/1]
حاکم اور علامہ البانی نے اسے ”صحیح“ کہا ہے۔
”تم اس گھڑی کو عصر کے بعد آخر وقت (یعنی غروب شمس کے قریب) تلاش کرو۔“
بعض روایات میں اس کے لیے وہ وقت بتلایا گیا ہے، جب امام نماز جمعہ شروع کرتا ہے، گویا نماز ختم ہونے تک درمیان میں یہ گھڑی آتی ہے۔ چنانچہ ابو موسیٰ اشعری رضی الله عنہ، نبی کریم صلی الله علیہ وسلم سے روایت کرتے ہیں کہ آپ صلی الله علیہ وسلم نے فرمایا:
«هي ما بين ان يجلس الإمام إلى ان تقضى الصلاة» [صحيح مسلم، كتاب الجمعه، رقم: 853/16]
”وہ گھڑی امام کے (خطبہ کے دوران) بیٹھنے سے لے کر نماز کے ختم ہونے تک کے درمیان ہے۔“
سیدنا عبدالله بن عباس رضی الله عنہ سے مروی ہے:
«أَنَّهَا فِيْمَا بَيْنَ الَٔاذَانِ إِلَي انْصِرَافِ الْاِمَامِ.» [شرح السنة: 211/4]
”یقیناً وہ گھڑی اذان سے لے کر امام کے نماز سے فارغ ہونے تک کے درمیان ہے۔“
اور ابو ہریرہ رضی الله عنہ سے مروی ہے کہ:
«هِيَ عِنْدَ نُزُوْلِ الْإِمَامِ»
”وہ امام کے منبر سے اترتے وقت ہے۔“ [شرح السنة: 211/4]
حافظ ابن حجر رحمة الله علیہ نے فتح الباری (2/ 415-420) پر بڑی تفصیل کے ساتھ ان جملہ روایات پر روشنی ڈالی ہے، اور اس کے متعلق علمائے اسلام و فقہائے عظام کے تنتالیس 43 اقوال نقل کیے ہیں۔
امام شوکانی نے علامہ ابن منیر رحمة الله علیہ کا خیال ان لفظوں میں نقل فرمایا ہے:
«إن فائدة الابهام لهذا الساعة ولليلة القدر بعث الدواعي على الاكثار من الصلاة والدعاء ولو وقع البيان لا تكل الناس على ذالك وتركوا ما عداها فالعجب بعد ذلك ممن يتكل الناس فى طلب تحديدها، وقال فى موضع آخر: يحن جمع الأقوال فتمون ساعة الاجابة واحدة منها لا بعينها فيصاد فها من اجتهد ي جميعها.» [نيل الاوطار: 277/3]
”یقیناً اس گھڑی کے پوشیدہ رکھنے اور اسی طرح لیلة القدر کے پوشیدہ ہونے میں فائدہ یہ ہے کہ ان کی تلاش کے لیے بکثرت نماز نفل ادا کی جائے اور دعائیں کی جائیں، اس صورت میں ضرور ضرور وہ گھڑی کسی نہ کسی ساعت میں حاصل ہو گی، اگر ان کو ظاہر کر دیا جاتا تو لوگ بھروسہ کر کے بیٹھ جاتے، اور صرف اسی گھڑی میں عبادت کرتے۔ پس اس شخص پر تعجب ہے جو اس محدود وقت کو پا لینے پر بھروسہ کیے ہوئے ہے۔ بہتر ہے کہ مذکورہ اقوال کو بایں صورت جمع کیا جائے کہ اجابت کی گھڑی وہ ایک ہی ساعت ہے جسے معین نہیں کیا جا سکتا۔ پس جو تمام اوقات میں اس کے لیے کوشش کرے گا، وہ ضرور اسے کسی نہ کسی وقت میں پا لے گا۔“
اس بارے میں راجح قول یہی ہے (یعنی ابن منیر رحمة الله علیہ کا) کہ اجابت اور قبولیت کی گھڑی وہ ایک ہی ساعت ہے جسے معین نہیں کیا جا سکتا، لہذا اس کو پانے کے لیے ان تمام اوقات میں کوشش اور اجتہاد کرنا چاہیے۔ «والله اعلم!»

1432۔ اردو حاشیہ: جو چیز جتنی زیادہ قیمتی، بلند مرتبہ اور افضل ہو، اتنی ہی کم ہوتی ہے۔ یہ فطری اصول ہے۔ یہ وقت بھی بہت فضیلت والا ہے، اس لیے قلیل ہے، نیز ایسی چیز بڑی چھپا کر رکھی جاتی ہے اور اس کے حصول میں بڑی جدوجہد کی ضرورت ہوتی ہے، لہٰذا اس وقت کو مبہم رکھا گیا تاکہ اس کی خصوصی شان ظاہر ہو۔ مباک ہیں وہ لوگ جو ایسی ساعات لطیفہ سے بہرہ ور ہوتے ہیں۔ لمثل ھذا فلیعمل العاملون۔ وفقنا اللہ لما یحبہ ویرضی۔

اردو حاشہ:
فوائد ومسائل:

(1)
صحیح مسلم کی حدیث کے مطابق یہ گھڑی امام کے منبر پر بیٹھنے سے لے کر نماز ختم ہونے تک کے وقفہ میں ہے۔ (صحیح مسلم، الجمعة، باب فی الساعة التی فی یوم الجمعة، حدیث: 853)

(2)
اس مسئلے میں بعض دیگر اقوال آئندہ روایات میں آرہے ہیں۔

حدیث حاشیہ:
مفردات الحدیث:
يُقَلِّلُهَا يُزَهِّدُهَا:
دوسرا لفظ اپنے لفظ کی تاکید ہے کیونکہ تزهید کا معنی بھی تقلیل ہے،
کیونکہ کم اور حقیر چیز سے انسان بے رغبتی اور پرہیز کرتا ہے۔

حدیث حاشیہ:
س گھڑی کی تعیین میں اختلاف ہے کہ یہ گھڑی کس وقت آتی ہے بعض روایات میں اس کے لیے وہ وقت بتلایا گیاہے جب امام نماز جمعہ شروع کر تا ہے۔
گویا نماز ختم ہونے تک درمیان میں یہ گھڑی آتی ہے بعض روایات میں طلوع فجر سے اس کا وقت بتلایاگیا ہے۔
بعض روایات میں عصر سے مغرب تک کا وقت اس کے لیے بتلایا گیا ہے۔
حافظ ابن حجر ؒ نے فتح الباری میں بہت تفصیل کے ساتھ ان جملہ روایات پر روشنی ڈالی ہے اور اس بارے میں علمائے اسلام وفقہاء عظام کے143قوال کیے ہیں۔
امام شوکانی نے علامہ ابن منیر کا خیال ان لفظوں میں نقل فرمایا ہے:
قَالَ ابْنُ الْمُنِيرِ:
إذَا عُلِمَ أَنَّ فَائِدَة الْإِبْهَام لِهَذِهِ السَّاعَة وَلِلَيْلَةِ الْقَدْر بَعْثَ الدَّوَاعِي عَلَى الْإِكْثَار مِنْ الصَّلَاة وَالدُّعَاءِ، وَلَوْ وَقَعَ الْبَيَان لَهَا لَاتَّكَلَ النَّاس عَلَى ذَلِكَ وَتَرَكُوا مَا عَدَاهَا، فَالْعَجَب بَعَدَ ذَلِكَ مِمَّنْ يَتَّكِل فِي طَلَب تَحْدِيدهَا. وَقَالَ فِي مَوْضِع آخَر:
يَحْسُن جَمْع الْأَقْوَال فَتَكُون سَاعَة الْإِجَابَة وَاحِدَة مِنْهَا لَا بِعَيْنِهَا، فَيُصَادِفهَا مَنْ اجْتَهَدَ فِي الدُّعَاء فِي جَمِيعهَا. (نیل الأوطار)
یعنی اس گھڑی کے پوشیدہ رکھنے میں اور اسی طرح لیلۃ القدر کے پوشیدہ ہونے میں فائدہ یہ ہے کہ ان کی تلاش کے لیے بکثرت نماز نفل ادا کی جائے اور دعائیں کی جائیں، اس صورت میں ضرورضرور وہ گھڑی کسی نہ کسی ساعت میں اسے حاصل ہوگی۔
اگر ان کو ظاہر کر دیا جاتا تو لوگ بھروسہ کر کے بیٹھ جاتے اور صرف اس گھڑی میں عبادت کرتے۔
پس تعجب ہے اس شخص پر جواسے محدود وقت میں پالینے پر بھروسہ کئے ہوئے ہے۔
بہتر ہے کہ مذکورہ بالا اقوال کو بایں صورت جمع کیا جائے کہ اجابت کی گھڑی وہ ایک ہی ساعت ہے جسے معین نہیں کیا جاسکتا پس جوتمام اوقات میں اس کے لیے کوشش کرے گا وہ ضرور اسے کسی نہ کسی وقت میں پالے گا۔
امام شوکانی ؒ نے اپنا فیصلہ ان لفظوں میں دیا ہے:
وَالْقَوْل بِأَنَّهَا آخِر سَاعَة مِنْ الْيَوْم هُوَ أَرْجَحُ الْأَقْوَال، وَإِلَيْهِ ذَهَبَ الْجُمْهُور من الصحابة والتابعین والأئمة الخ۔
یعنی اس بارے میں راجح قول یہی ہے کہ وہ گھڑی آخر دن میں بعد عصر آتی ہے اور جمہور صحابہ وتابعین وائمہ دین کا یہی خیال ہے۔

حدیث حاشیہ:
حجۃ الہند حضرت شاہ ولی اللہ مرحوم فرماتے ہیں۔
ثمَّ اخْتلفت الرِّوَايَة فِي تَعْيِينهَا فَقيل:
هِيَ مَا بَين أَن يجلس الإِمَام إِلَى أَن تقضى الصَّلَاة لِأَنَّهَا سَاعَة تفتح فِيهَا أَبْوَاب السَّمَاء، وَيكون الْمُؤْمِنُونَ فِيهَا راغبين إِلَى الله، فقد أجتمع فِيهَا بَرَكَات السَّمَاء وَالْأَرْض. وَقيل بعد الْعَصْر ألى غيبوبة الشَّمْس لِأَنَّهَا وَقت نزُول الْقَضَاء، وَفِي بعض الْكتب الإلهية إِن فِيهَا خلق آدم، (حجة اللہ)
یعنی اس گھڑی کی تعیین میں اختلاف ہے۔
یہ بھی امام کے ممبر پر بیٹھنے سے ختم نماز تک ہوتی ہے اس لئے کہ اس گھڑی میں آسمان کے دروازے کھولے جاتے ہیں اور اس میں مومنوں کو اللہ کی طرف سے رغبت زیادہ ہوتی ہے، پس اس میں آسمانی وزمینی برکات جمع کی جاتی ہیں اور یہ بھی کہا گیا ہے کہ یہ عصر کے بعد سے غروب تک ہے، اس لئے یہ قضائے الٰہی کے نزول کا وقت ہے اور بعض حوالوں کی بنا پر یہ آدم کی پیدائش کا وقت ہے۔

حدیث حاشیہ:
(1)
اس گھڑی کی تعیین کے متعلق حافظ ابن حجر ؒ نے 42 اقوال ذکر کیے ہیں۔
ان میں دو قول زیادہ مشہور ہیں:
٭ وہ گھڑی امام کے منبر پر بیٹھنے سے لے کر اختتام صلاۃِ جمعہ تک ہے۔
اس قول کو امام مسلم نے حضرت ابو موسیٰ اشعری ؓ سے بیان کیا ہے۔
٭ عصر کے بعد سے لے کر غروب شمس تک ہے۔
اس پر اعتراض ہوتا ہے کہ عصر کے بعد کوئی نماز نہیں ہوتی جبکہ اس گھڑی کے متعلق ہے کہ انسان اس وقت حالت نماز میں ہوتا ہے۔
یہی اشکال ایک صحابی نے دوسرے صحابی کے سامنے رکھا تو انہوں نے جواب دیا کہ کیا رسول اللہ ﷺ کا یہ ارشاد نہیں ہے کہ جو نماز کا انتظار کرتا ہے وہ نماز ہی میں شمار ہوتا ہے۔
(2)
حافظ ابن حجر ؒ نے علامہ محب طبری کے حوالے سے لکھا ہے کہ اس کے متعلق زیادہ صحیح حدیث، حدیث ابی موسیٰ ہے اور سب سے زیادہ مشہور قول عبداللہ بن سلام ؓ کا ہے۔
ان کے علاوہ جتنے بھی اقوال ہیں وہ ان دونوں یا کسی ایک کے مطابق ہیں یا وہ ضعیف الاسناد یا موقوف روایات ہیں۔
امام بیہقی ؒ نے امام مسلم سے نقل کیا ہے کہ حدیث ابی موسیٰ اس بات میں سب سے زیادہ عمدہ اور صحیح ہے اور یہی بات خود امام بیہقی، ابن العربی اور جماعت محدثین نے کہی ہے۔
امام قرطبی ؒ نے کہا ہے کہ حدیث، اختلاف کے وقت بمنزلہ نص کے فیصلہ کن ہے، لہذا دوسرے احتمالات کی طرف التفات نہ کیا جائے، جبکہ بعض دوسرے حضرات نے حضرت عبداللہ بن سلام ؓ کے قول کو ترجیح دی ہے۔
امام ترمذی نے امام احمد ؒ سے نقل کیا ہے کہ اکثر احادیث سے عبداللہ بن سلام ؓ کے قول کی تائید ہوتی ہے۔
علامہ ابن عبدالبر نے لکھا ہے کہ عبداللہ بن سلام کا قول أثبت شئي في هذا الباب ہے۔
(فتح الباري: 542/2) (3)
حافظ ابن حجرؒ نے ابن منیر کے حوالے سے لکھا ہے کہ اس گھڑی کے پوشیدہ رکھنے میں لیلۃ القدر کے مخفی رکھنے کی طرح یہ فائدہ ہے کہ اس کی تلاش کے لیے بکثرت نوافل ادا کیے جائیں اور دعائیں مانگی جائیں۔
اس صورت میں ضرور وہ گھڑی مل جائے گی جس کا وہ متلاشی ہے۔
اگر انہیں ظاہر کر دیا جاتا تو لوگ بھروسا کر کے بیٹھ جاتے اور صرف اس گھڑی میں عبادت کرتے، اس لیے اس شخص پر بڑا تعجب ہے جو اسے کسی محدود مدت میں حاصل کرنے پر بھروسا کیے ہوئے ہے۔
(فتح الباري: 542/2) (4)
واضح رہے کہ ساعت موجودہ اس شخص کے لیے ہے جو نماز کا پابند ہو نہ کہ وہ شخص جو ساعۃ اجابت کی وجہ سے صرف جمعہ پڑھنے کے لیے آ جائے اور باقی نمازوں کو پابندی سے ادا نہ کرے۔

حدیث حاشیہ:
(1)
اس گھڑی کی تعیین میں لیلۃ القدر کی طرح چالیس اقوال ہیں۔
ایک روایت میں ہے کہ رسول اللہ صلی اللہ علیہ وسلم نے فرمایا:
”مجھے اس گھڑی کے متعلق بتایا گیا تھا لیکن لیلۃ القدر کی تعیین کی طرح مجھ پر اس کے متعلق نسیان طاری ہو گیا۔
“ (مسند أحمد: 65/3) (2)
علامہ خطابی فرماتے ہیں:
اس کی تعیین دو طرح سے کی جا سکتی ہے:
ایک یہ کہ وہ دوران نماز میں آتی ہے دوسری یہ کہ جب سورج غروب ہونے کے قریب ہوتا ہے تو وہ اس وقت آتی ہے۔
(فتح الباري: 238/11)
شاہ ولی اللہ کہتے ہیں:
اس گھڑی کی تعیین میں اختلاف ہے، ممکن ہے کہ وہ امام کے منبر پر بیٹھنے سے نماز کے اختتام تک ہو کیونکہ اس وقت آسمانی اور زمینی برکات جمع ہوتی ہیں اور یہ بھی کہا گیا ہے کہ وہ گھڑی عصر کے بعد غروب آفتاب کے درمیان ہے کیونکہ یہ تقدیر کے فیصلوں کے نزول کا وقت ہے۔
(حجة اللہ البالغة: 29/2) (3)
ایک روایت میں ہے کہ رسول اللہ صلی اللہ علیہ وسلم نے اپنے پوروں کو وسطیٰ اور خنصر کے بطن پر رکھ کر اس کے مختصر ہونے کی طرف اشارہ کیا۔
(صحیح البخاري، الطلاق، حدیث: 5294)