حدیث حاشیہ:
وَأَنَا أَتَخَوَّفُ أَنْ تُفْتَنَ فِي دِينِهَا سے مراد یہ کہ علی ؓدوسری بیوی لائیں اور حضرت فاطمہ ؓسوکن پنے کی عداوت سے جوہر عورت کے دل میں ہوتی ہے‘ کسی گناہ میں مبتلا ہو جائیں۔
مثلاً خاوند کو ستائیں‘ ان کی نافرمانی کریں یا سوکن کو برا بھلا کہہ بیٹھیں۔
دوسری روایت میں ہے کہ آپ نے یہ بھی فرمایا کہ علی ؓ کا نکاح ثانی یوں ممکن ہے کہ وہ میری بیٹی کو طلاق دے دیں اور ابو جہل کی بیٹی سے نکاح کرلیں۔
جب حضرت علی ؓنے آپ کا یہ ارشاد سنا تو فوراً یہ ارادہ ترک کیا اور جب تک حضرت فاطمہ ؓ زندہ رہیں انہوں نے دوسری بیوی نہیں کی۔
قسطلانی ؒنے کہا آپ کے ارشاد سے یہ معلوم ہوا کہ پیغمبر کی بیٹی اور عدواللہ کی بیٹی میں جمع کرنا حرام ہے۔
مسوربن مخرمہ ؓنے یہ قصہ اس لئے بیان کیا کہ حضرت زین العابدین کی فضیلت معلوم ہو کہ وہ کس کے پوتے ہیں۔
حضرت فاطمہ زہرا ؓکے‘ جن کے لئے آنحضرت ﷺنے حضرت علی ؓ پر عتاب فرمایا اور جن کو آنحضرت ﷺ نے اپنے بدن کا ایک ٹکڑا قرار دیا۔
اس سے حضرت فاطمہ ؓ کی بڑی فضیلت ثابت ہوئی۔
وفي الفتح قال الکرماني مناسبة ذکر المسورلقصة خطبة بنت أبي جهل عند طلبه للسیف من جھة أن رسول اللہ صلی اللہ علیه وسلم کا ن یحترز عما یوجب وقوع التکدیر بین الأقرباء فکذالك ینبغي أن تعطیني السیف حتیٰ لا یحصل بینك وبین أقربائك کدورة بسببه یعنی مسور رضی اللہ عنہ نے بنت ابوجہل کی منگنی کا قصہ اس لئے بیان کیا جبکہ انہوں نے حضرت زین العابدین سے تلوار کا سوال کیا تھا کہ رسول اللہ صلی اللہ علیہ وسلم ایسی چیزوں سے پرہیز فرمایا کرتے تھے جن سے اقراباء میں باہمی کدورت پیداہو۔
پس مناسب ہے کہ آپ یہ تلوار مجھ کو دے دیں تاکہ آپ کے اقرباء میں اس کی وجہ سے آپ سے کدورت نہ پیداہو۔

فوائد و مسائل
حدیث میں کہیں بھی یہ ذکر نہیں کیا گیا کہ رسول اللہ صلی اللہ علیہ وسلم نے سیدنا علی رضی اللہ عنہ کو دوسرا نکاح کرنے سے منع کیا ہو بلکہ حدیث کے شروع میں:
نبی کریم صلی اللہ علیہ وسلم کے الفاظ ہیں:
«اِنِّيْ لَسْتُ اُحَرِّمُ حَلاَلاً، وَلاَ اُحِلُّ حَرَامًا،»
””بلاشبہ میں حلال کو حرام نہیں کرتا اور نہ ہی حرام کو حلال کرتا ہوں۔۔۔“
یہ الفاظ اس بات پر دلالت کرتے ہیں کہ رسول اللہ صلی اللہ علیہ وسلم کو اس وقت بھی یہ خیال تھا کہ لوگ کہیں اس سے یہ مطلب نہ نکال بیٹھیں کہ یہ نکاح ثانی کی ممانعت ہے، سو بہت صراحت و وضاحت سے فرمایا کہ
”میں حلال کو حرام اور حرام کو حلال نہیں کر رہا۔۔۔“
پھر حدیث کے اگلے حصے میں رسول اللہ صلی اللہ علیہ وسلم نے نکاح کی اس تجویز کے حوالے سے اپنا نقطہ نظر بیان فرمایا:
«وَاﷲِ لاَ تَجْتَمِعُ بِنْتُ رَسُوْلِ اﷲِ وَبِنْتُ عَدُوِّ اﷲِ اَبَدًا»
” بخدا رسول اللہ صلی اللہ علیہ وسلم کی بیٹی اور عدواﷲ کی بیٹی دونوں کبھی جمع نہیں ہوتیں۔“
بعض اہلِ علم اس کو بطورِ حکم لیتے ہیں اور بعض بطور خبر۔۔۔۔
لیکن جو بھی سمجھا جائے اس جملے میں چھپا درد سمجھنے کے لئے آپ کو مدینہ سے مکہ واپس جانا پڑے گا، کچھ دیر کے لیے صحن کعبہ کا یہ منظر اپنے تصور میں لانا پڑے گا۔
ایک دن رسول اللہ صلی اللہ علیہ وسلم کعبہ کے سائے میں نماز پڑھ رہے تھے۔ ابوجہل اور قریش کے کچھ لوگ وہاں موجود تھے۔ اس دن مکہ معظمہ میں ایک اونٹ نحر کیا گیا تھا۔ ابوجہل نے کہا کون آل فلاں کے اونٹ کی طرف جائے گا وہاں اس کا گو بر، خون اور اوجھڑی لائے پھر آپ کے سجدہ کے وقت آپ کے کندھوں پر ان چیزوں کو ڈال دے۔ کچھ لوگ گئے اور اوجھڑی اٹھا لائے۔ ایک بدبخت عقبہ بن ابی معیط نے سجدہ کی حالت میں اس غلاظت کو آپ کے کندھوں پر رکھ دیا۔ رسول اللہ صلی اللہ علیہ وسلم بڑی دیر تک اس وزن کے سبب سجدے کی حالت میں پڑے رہے۔ کفار مکہ ہنستے رہے حتی کہ ہنسنے کے سبب وہ ایک دوسرے پر جھکے جاتے تھے ہاتھوں پر ہاتھ مارتے اور ٹھٹھہ اڑا رہے تھے۔
ایک شخص نے فاطمہ رضی اللہ عنہا کو خبر دی وہ ابھی کم عمری میں ہی تھیں، دوڑتی ہوئی آئیں آپ ابھی تک سجدہ ہی میں تھے۔ انہوں نے آپ پر سے اوجھڑی ہٹائی اور کافروں کو برا بھلا کہنا شروع کیا۔
جب آپ نے نماز ختم کی تو آپ نے دعاکی کہ
”اے اللہ قریش کو پکڑلے۔ اے اللہ قریش کو پکڑ لے۔“
یہ بددعا قریش کو بہت شاق گزری کیونکہ وہ سمجھتے تھے کہ اس شہر میں دعا قبول ہوتی ہے جب انہوں نے بددعا سنی تو ہنسنا بند کر دیا اور خوفزدہ ہو گئے۔ پھر آپ نے ایک ایک کانام لیا:
”اے اللہ عمرو بن ہشام، عتبہ بن ربیعہ، شیبہ بن ربیعہ، ولید بن عتبہ، عقبہ بن ابی معیط، امیہ بن خلف اور عمارہ بن ولید کو پکڑ لے۔“
جن لوگوں کے آپ نے نام لیے یہ سب جنگ بدر میں قتل ہوئے اور عذاب الٰہی میں گرفتار ہوئے۔
[صحيح بخاري كتاب الجهاد والسير باب الدعاء على المشركين، مسلم كتاب الجهاد باب مالقي النبى صلى الله عليه وسلم من ا المشركين المنافقين]
یارو! جس نبی کو طائف والوں نے پتھر مارے اور لہو یوں بہا کہ ایڑیوں پر جم گیا اور جوتے نہیں اترتے تھے۔ پہاڑوں کا فرشتہ شدت غم و غضب سے آیا کہ اس بستی پر پہاڑ الٹ دے، لیکن ادھر رحمت ہی رحمت مسکرا رہی تھی کہ نہیں ان کو خبر نہیں کہ میں کون ہوں اللہ میری قوم کو ہدایت دے۔۔۔۔۔
لیکن آج کیوں دعا، بددعاء ہو گئی۔۔۔ ہاں ننھی فاطمہ کے آنسو، بیٹی کا دکھ اور ظالموں کا ٹھٹھہ دکھ دے گیا۔۔۔۔۔
اور برسوں پر ان ا یہ دکھ اس خبر سے تازہ ہو گیا۔۔۔۔ لیکن دیکھیں رسول کیسے انصاف پرور اور دور رس نگاہ رکھنے والے، مزید فرمایا:
«إِنَّ فَاطِمَةَ مِنِّي، وَأَنَا أَتَخَوَّفُ أَنْ تُفْتَنَ فِي دِينِهَا»
فاطمہ مجھے سے ہے، اسی ایک جملے پر ہزار جہان قربان۔۔ سیدہ کی عظمتیں رشک کے ہزار در کھولتی ہیں۔۔۔
فرمایا:
”مجھے خوف ہے کہ فاطمہ اپنے دین کے معاملے میں کسی آزمائش میں نہ گرفتار ہو جائے۔“
اب اس امکان کو سمجھیں۔۔ وہ خاتون جو سیدنا عکرمہ کی بہن اور ابی جہل کی بیٹی تھیں، اب مسلمان ہیں اور صحابیہ ہیں۔۔ سو سوکناپے کے رشتے سے عام روٹین میں انسان کا دل تنگ ہوتا ہے تو یہاں تو ایک تلخ ماضی بھی ساتھ ساتھ چلتا آ رہا ہے۔۔ سو رسول اللہ صلی اللہ علیہ وسلم کو فکر تھا کہ سوکناپے کے اس رشتے کے بعد، ماضی کی تلخ یادوں کے سبب، سیدہ اس خاتون کے معاملے میں کہیں اعتدال کو کھو نہ بیٹھیں اور اس خاتون کے ساتھ ایسی زیادتی ہو جائے کہ جو گناہ کے زمرے میں آ جائے۔۔۔۔۔ سو اس فکر کا اظہار کیا۔۔۔
اس تمام پس منظر میں اگر کوئی درد دل رکھنے والا ہو، اور اگر کوئی ماضی میں سفر کرے اور کعبے کے اس صحن میں جانکلے کہ جہاں ایک معصوم بچی اپنے بابا پر سے یہ غلاظت ہٹا رہی تھی اور آنسوں کے پیچھے شقی القلب، وحشی صفت لوگوں کے قہقہے گونج رہے تھے۔۔۔ جو ایسا تصور قلب و ذہن میں لا سکے وہ اس رشتے پر موجود تحفظات کو آسانی سے سمجھ سکتا ہے۔۔۔ بس پہلو میں دل اور درد دل ہونا چاہیے۔۔۔۔لیکن سنے کون قصہ درد دل۔۔۔۔۔۔
اور اگر آپ کی فہم و شعور سے جنگ نہیں تو ٹھنڈے دل سے غور کریں گے اس نتیجے پر پہنچنا بہت آسان ہو گا کہ یہ فیصلہ حلال و حرام کا نہیں محض انتظامی تھا اور اس کا اتنا ہی فائدہ اس۔ خاتون کو بھی ہوا کہ جو نکاح سے رہ گئی۔۔۔ کیونکہ ایسا تلخ ماضی ہو تو زندگی کبھی خو شگوار نہیں ہوتی۔۔۔

حدیث حاشیہ:
1۔
ایک روایت میں ہے کہ حضرت علی ؓ کا نکاح ثانی اس طرح ممکن ہے کہ وہ میری بیٹی کو طلاق دے کر ابوجہل کی بیٹی سے نکاح کرلے۔
(صحیح البخاري، النکاح، حدیث: 5230)
اس کے بعد حضرت علی ؓنے ابوجہل کی بیٹی سے نکاح کا ارادہ ترک کردیا۔
(صحیح البخاري، الفضائل، حدیث: 3729)
2۔
رسول اللہ ﷺنے ابوجہل کی بیٹی اور اپنی لخت جگت دونوں کو نہ جمع کرنے کی دوعلتیں بیان کی ہیں:
۔
ایسا کرنے سے مجھے تکلیف ہوگی جوشرعاً حرام ہے۔
۔
ایسا کرنے سے میری بیٹی کا دین خراب ہوگا۔
اس آخری علت کامفہوم یہ ہے کہ سوتن کی طرف سے اسے جو تکلیف ہوگی وہ اس کے دین کو بگاڑ دے گی اور وہ اس پر صبر نہیں کرسکے گی۔
3۔
حضرت مسور ؓنے یہ قصہ اس لیے بیان فرمایا کہ رسول اللھ ﷺنے اپنی بیٹی کی دلجوئی فرمائی اور اس طرح میں بھی آپ کی دلجوئی کرنا چاہتا ہوں۔
اس بنا پر یہ تلوارمجھے دے دو، میں اس کی حفاظت کروں گا۔
4۔
حافظ ابن حجر ؒ لکھتے ہیں:
یہ وہی ذوالفقار نامی تلوار تھی جو رسول اللہ ﷺ کو غزوہ بدر میں بطور غنیمت ملی تھی اور غزوہ احد کے موقع پر اس کے متعلق ایک خواب بھی دیکھا تھا۔
(جامع الترمذي، السیر، حدیث: 1561و فتح الباري: 257/6)
وہ تلوار رسول اللہ ﷺ نے اپنی وفات سے پہلے حضرت علی ؓکو دے دی، پھر وہ ان کی اولاد کی طرف منتقل ہوگئی۔
اس طرح اس میں وراثت وغیرہ کا سلسلہ جاری نہیں ہوا۔

صحیح بخاری کی حدیث نمبر: 5278 کا باب: «بَابُ نِكَاحِ مَنْ أَسْلَمَ مِنَ الْمُشْرِكَاتِ وَعِدَّتِهِنَّ:»
باب اور حدیث میں مناسبت:
امام بخاری رحمہ اللہ نے ترجمۃ الباب میں میاں بیوی کے مابین ناچاکی اور نااتفاقی کے امور کی وضاحت فرمائی ہے , جبکہ تحت الباب جس حدیث کا ذکر فرمایا ہے اس میں بظاہر کوئی ایسے الفاظ وارد نہیں ہیں جو باب سے مناسبت رکھتے ہوں۔

علامہ کرمانی رقمطراز ہیں:
«توخز مطابقة الترجمة من كون فاطمۃ ما كانت ترضيٰ بذالك، فكان الشقاق بينهما وبين على متوقعاً فاراد رضى الله عنه دفع وقوعه.» [شرح كرماني: 159/19]
”امام بخاری رحمہ اللہ کا اس باب میں اس حدیث کو نقل کرنے کی وجہ یہ ہے کہ سیدہ فاطمہ رضی اللہ عنہا سیدنا علی رضی اللہ عنہ کے اس نکاح پر راضی نہ تھیں، اگر سیدنا علی رضی اللہ عنہ نکاح کر لیتے تو دونوں کے مابین شقاق اور اختلافات کا خدشہ پیدا ہوتا، لہٰذا نبی کریم صلی اللہ علیہ وسلم نے سیدنا علی رضی اللہ عنہ کو نکاح سے روک کر دونوں کے درمیان واقع ہونے والے شقاق و اختلاف کو روک دیا ہے۔“
امام کرمانی رحمہ اللہ کی وضاحت سے مناسبت کا واضح پہلو اجاگر ہوتا ہے آپ کا مقصد یہ تھا کہ اگر علی رضی اللہ عنہ اس عورت سے نکاح کر لیتے تو فاطمہ رضی اللہ عنہا اور ان کے درمیان شدید اختلافات نمودار ہو جاتے، لہٰذا اس اختلافات کی وجہ سے امام بخاری رحمہ اللہ نے تحت الباب اس حدیث کو نقل فرمایا ہے، امام کرمانی کی تطبیق پر حافظ ابن حجر رحمہ اللہ فرماتے ہیں:
«وهي مناسبة جيدة.» [فتح الباري لابن حجر: 345/90]
”یہ ایک بہترین مناسبت ہے۔“
ابن التین میں ترجمۃ الباب پر اعتراض فرمایا ہے کہ ترجمۃ الباب اور حدیث میں مناسبت موجود نہیں ہے، چنانچہ اس اعتراض کو دور کرتے ہوئے حافظ ابن حجر رحمہ اللہ جواب دیتے ہیں کہ:
«واعترضه ابن التين بأنه ليس فيه دلالة على ترجم به، ونقل ابن بطال قبله عن المهلب قال: انما حاول البخاري يايراده ان يجعل قول النبى صلى الله عليه وسلم فلا اذن» [فتح الباري لابن حجر: 340/10]

”ابن التین نے ترجمۃ الباب پر یہ کہا کہ حدیث سے اس کی کوئی دلالت موجود نہیں ہے، اس کو ابن بطال اور مہلب سے نقل کیا ہے کہ ابن مہلب نے فرمایا: امام بخاری رحمہ اللہ نے اس ارادے سے اس حدیث کو پیش فرمایا ہے تحت الترجمۃ نبی کریم صلی اللہ علیہ وسلم کا فرمان ہے، ”میں اس کی اجازت نہیں دوں گا۔‏‏‏‏“
یعنی نبی کریم صلی اللہ علیہ وسلم اس کی اجازت اسی وجہ سے نہیں دے رہے تھے کہ آپ علیہ السلام کو ان میاں بیوی میں ناچاکی اور نااتفاقی کا اندیشہ تھا، لہٰذا امام بخاری رحمہ اللہ کا مقصود یہی ہے۔
ابن الملقن رحمہ اللہ نے بھی یہی مناسب دی ہے۔ دیکھیے: [التوضيح لشرح الجامع الصحيح: 327/24]

ابن المنیر رحمہ اللہ فرماتے ہیں کہ:
”امام بخاری رحمہ اللہ کے استدلال کا احتمال (ترجمۃ الباب سے) اس حدیث پر ہے کہ نبی کریم صلی اللہ علیہ وسلم نے فرمایا تھا، «فلا أذن لهم» پس یہ اشارہ اس بات کی دلیل ہے کہ سیدنا علی رضی اللہ عنہ سیدہ فاطمہ رضی اللہ عنہا کے ہوتے ہوئے اس عورت سے شادی نہیں کر سکتے تھے۔“ [المتوري: ص 299]

دراصل وہ حدیث جس کا ذکر امام بخاری رحمہ اللہ نے تحت الباب فرمایا ہے اس حدیث کا ٹکڑا ہے جسے امام بخاری رحمہ اللہ نے کتاب النکاح میں درج کیا ہے، حدیث میں جو الفاظ ہیں وہ یہ ہیں کہ نبی کریم صلی اللہ علیہ وسلم نے فرمایا تھا کہ یہ ناممکن ہے کہ اللہ کے رسول کی اور اللہ کے دشمن کی بیٹی ایک گھر میں جمع ہوں۔

اس حدیث کو پڑھنے کے بعد اب تطبیق میں مزید اضافہ ہوا کہ سیدہ فاطمہ رضی اللہ عنہا کی ناراضگی کا ڈر اس چیز پر منحصر نہیں تھا کہ سیدنا علی رضی اللہ عنہ دوسرا نکاح کر رہے تھے کیونکہ اس دور میں آدمی کا دوسری یا تیسری شادی کرنا ایک عام رجحان تھا لیکن سیدہ فاطمہ رضی اللہ عنہا کی ناپسندیدگی کا اظہار اس عمل پر موقوف تھا کہ وہ لڑکی ابوجہل کی بیٹی تھی، لہٰذا اللہ تعالیٰ کے دشمن کی بیٹی اور اللہ تعالیٰ کے دوست کی بیٹی ایک آدمی کے نکاح میں کس طرح سے جمع ہو سکتی تھیں؟
یہی وجہ تھی نبی کریم صلی اللہ علیہ وسلم کے انکار کی اور سیدہ فاطمہ رضی اللہ عنہا کی ناراضگی کی۔

فوائد ومسائل:
1: حضرت فاطمہ رضی اللہ کی اپنے گھر میں اذیت رسول ﷺ کے باعث اذیت ہوتی جو حضرت علی رضی اللہ کے لئے ہلاکت کا باعث ہوتی۔
اس لیے انہیں بطورخاص اس رشتے سے منع کر دیا گیا اور یہ واقعہ ثابت کرتا ہے کہ رسول ﷺکو کسی طرح سے بھی اذیت دینا حرام ہے خواہ وہ فعل اصل میں مباح ہی ہو۔
قرآن مجید میں ہے کہ (وَمَا كَانَ لَكُمْ أَنْ تُؤْذُوا رَسُولَ اللَّهِ) (الأحزاب:35) تمہیں کسی طرح جائز نہیں کہ اللہ کے رسول کو اذیت دو۔

2:عترت رسول ﷺکو کسی طرح سے دکھ دینا اور ان کی ہتک کرنا، رسول ﷺکی ناراضی کا باعث ہے جو کہ اللہ تعالی کی ناراضی کو مستلزم ہے۔
مگر لازمی شرط ہے کہ آل رسول کہلانے والے اس کی شریعت کے حامل بھی ہوں۔

3: حضرت فاطمہ رضی اللہ رسول ﷺکی محبوب ترین صاحبزادی تھیں اور وہ اس امت کی عورتوں کی سردار ہیں۔

4: جائز ہے کہ انسان اپنی بیٹی کی وجہ سے غیرت اور غصے میں آئے لیکن اگر کوئی شخص اپنے آپ کو رسول ﷺاور حضرت فاطمہ پر قیاس کرنے لگے تو یہ ایک لغوقیاس ہے۔

5: صاحب فضل داماد کی مدح وتوصیف کی جاسکتی ہے۔

فوائد ومسائل:
اس میں نبی ﷺ نے وہ وجہ بیان فرما دی جس کی بنا پر آپ نے حضرت علی رضی اللہ کو دوسری شادی کی اجازت نہیں دی۔
اور وہ یہ کہ دوسرا نکاح حضرت فاطمہ رضی اللہ عنہا کے لئے اذیت کا باعث ہو سکتا تھا جیسا کہ عام طور پر ہو تا ہے اگر ایسا ہوتا تو اس سے پھر رسول ﷺکو بھی اذیت پہنچتی، جو حضرت علی کے ایمان کے لئے خطرے کا باعث ہوتی۔

اردو حاشہ:
فوائدومسائل:

(1)
  نبئ اکرمﷺ کو کسی بھی انداز سے پریشان کرنا جائز نہیں، اگرچہ وہ کام اصل میں جائز ہی ہولیکن رسول اللہﷺ کو کسی خاص وجہ سے ناگوار محسوس ہورہا ہو۔

(2)
  رسول اللہﷺ نے حضرت علی کو ابوجہل کی بیٹی سے نکاح کرنے سے اس لیے منع کیا کہ اس سےحضرت فاطمہ رضی اللہ عنہا کو تکلیف ہوگی، اس وجہ سے رسول اللہﷺ کا بھی دل دکھے گا۔
اور حضرت علی کو نبیﷺ کو پریشان کرنے کی وجہ سے اللہ تعالی کی ناراضی حاصل ہوگی۔
گویا اس ممانعت میں بھی حضرت علی پر شفقت ہے۔

(3)
منع کی دوسری وجہ یہ ہے کہ حضرت فاطمہ رضی اللہ عنہا غیرت محسوس کریں گی جس کی وجہ سے شاید اپنے خاوند کے بارے میں محبت کے وہ جذبات قائم نہ رکھ سکیں جو مطلوب ہیں۔
اس طرح یہ رشتہ حضرت فاطمہ رضی اللہ عنہا کے لیے ایک امتحان بن جائے گا۔
اوریہ کیفیت نظرانداز نہیں کی جا سکتی۔

(4)
  اپنی اولاد کی تکلیف محسوس کرنا محبت اور شفقت کا ثبوت ہے۔
اس تکلیف کو دور کرنے کے لیے جائز حدود میں کوشش کرنا جائز ہے۔

اردو حاشہ:
فوائدومسائل:

(1)
حضرت ابوالعاص بن ربیع رسول اللہ کی بیٹی حضرت زینت رضی اللہ عنہا کے شوہر تھے جو ان کے خالہ زاد تھے۔
ان کی والدہ کا نام ہالہ بنت خویلد ہے۔ (سیرأعلام النبلاء: 1؍441)
2۔
ہراہم موقع پر عوام سے خطاب کرتے وقت کلام کو اللہ کی حمد و ثنا اوردرود شریف سے شروع کرنا مسنون ہے۔

حدیث حاشیہ:
مفردات الحدیث:
(1)
بضعة:
ٹکڑا حصہ،
جز۔
(2)
يريبني مارابها:
جو چیز اس کے لیے قلق و اضطراب کا سبب ہے،
وہ میرے لیے بھی قلق اور بے چینی کا باعث ہے۔
فوائد ومسائل:
ہشام کے بیٹے حارث رضی اللہ عنہ نے جو ابوجہل کا بھائی تھا،
اس نے اپنی بھتیجی کی حضرت علی رضی اللہ عنہ سے شادی کرنے کی اجازت طلب کی،
کیونکہ حضرت علی رضی اللہ عنہ نے ابوجہل کی بیٹی سے شادی کرنے کا پیغام بھیجا تھا،
حضرت فاطمہ رضی اللہ عنہا کو بھی اس کا پتہ چل گیا تو انہوں نے آپ سے شکایت کی کہ آپ اپنی بیٹیوں کا دفاع نہیں کرتے،
اس لیے آپ نے اس مسئلہ میں خطبہ دیا اور پرزور الفاظ میں اجازت دینے کی بات کی،
حضرت علی رضی اللہ عنہ نے آپ سے مشورہ لیا تو آپ نے انہیں بھی اجازت نہ دی،
کیونکہ حضرت فاطمہ رضی اللہ عنہا کی والدہ اور تمام بہنیں وفات پا چکی تھیں،
اب ان کی غم خواری کے لیے اور ان کی دلجوئی اور تسلی کے لیے آپ ہی رہ گئے تھے اور وہ اپنا غم کسی اور کو نہیں بتا سکتی تھیں اور اپنے دل کا بوجھ ہلکا نہیں کر سکتی تھیں اور یہ چیز ان کے لیے فتنہ اور آزمائش کا باعث بنتی،
اس لیے آپ نے حضرت فاطمہ رضی اللہ عنہا کی موجودگی میں اور شادی کی اجازت نہ دی،
تاکہ اس کی پریشانی سے آپ کو پریشانی لاحق نہ ہو،
اگرچہ فی نفسہ حضرت علی رضی اللہ عنہ کے لیے اور شادی کرنا جائز تھا،
نیز دوسرا سبب مخطوبہ (منگیتر)
کا اللہ کے دشمن کی بیٹی ہونا ہے،
اگر وہ اللہ کے دشمن کی بیٹی نہ ہوتی تو زیادہ تشویشناک صورت نہ ہوتی،
ہر عورت طبعی اور فطرتی طور پر اپنے باپ کا دفاع کرتی ہے اور یہاں بھی اس کا امکان موجود تھا کہ سوکن ہونے کی بنا پر وہ کوئی ایسی بات کر لیتی ہے،
جو رسول اللہ صلی اللہ علیہ وسلم کے لیے اذیت کا باعث بنتی،
اس لیے خرابی و فساد کے اندیشہ کی خاطر سد ذریعہ کے طور پر آپ نے اجازت نہ دی،
یہ نہیں ہے کہ حضرت علی رضی اللہ عنہ کے لیے اور شادی کرنا جائز نہ تھا۔

حدیث حاشیہ:
مفردات الحدیث:
(1)
هل انت معطي سيف رسول الله:
کیا آپ مجھے آپ رسول اللہ صلی اللہ علیہ وسلم کی تلوار ذوالفقار عنایت کریں گے،
جو آپ کے پاس ہے۔
(2)
اني اخاف ان يغلبك القوم عليه:
مجھے اندیشہ ہے بنو امیہ کے لوگ اس کو آپ سے چھین لیں گے،
یہ مسور کا اپنا خیال ہے،
اگر انہوں نے چھینی ہوتی تو مسور درمیان میں حائل نہیں ہو سکتا تھا،
اگر مجھے دے دو گے تو جب تک میرے جسم میں جان ہے،
کوئی اس تک پہنچ نہیں سکے گا،
چونکہ رسول اللہ صلی اللہ علیہ وسلم حضرت فاطمہ رضی اللہ عنہا کی دلجوئی اور طیب خاطر کا بہت لحاظ رکھتے تھے،
جیسا کہ آپ نے حضرت علی کے ابو جہل کی بیٹی سے شادی کے پیغام پر اس کا اظہار فرمایا،
اس طرح میں آپ کی دلجوئی اور طیب خاطر چاہتا ہوں کہ آپ کو اس تلوار کے سلسلہ میں کسی پریشانی سے دوچار نہ ہونا پڑے،
اس پریشانی کو میں برداشت کروں،
اس لیے مجھے دے دیں،
میں آپ کی خاطر اس کی حفاظت کروں گا۔
(3)
ذكر صهرا له من عبد شمس:
اس سے مراد حضرت زینب رضی اللہ عنہا کے خاوند حضرت ابو العاص بن ربیع بن عبدالعزی بن عبد شمس ہیں،
اس نے کافر ہونے کے دور میں بھی حضرت زینب کو چھوڑنا گوارا نہیں کیا اور اس سلسلہ میں ہر قسم کی لالچ کو ٹھکرا دیا اور پھر ان کے رسول صلی اللہ علیہ وسلم کے پاس مدینہ منورہ آ جانے پر بھی کسی اور عورت سے شادی نہیں کی،
اسلام لانے کے بعد،
حضرت زینب ہی اسی کے ہاں گئیں۔
(4)
وعدني فاوفي لي:
جب جنگ بدر میں،
ابو العاص جو اس وقت کافر تھا،
قید میں آ گیا تو رسول اللہ صلی اللہ علیہ وسلم نے اسے شرط پر چھوڑ دیا تھا کہ میں حضرت زینب کو آپ کے پاس بھیج دوں گا،
اس سلسلہ میں اس نے آپ سے سچا وعدہ کیا اور پھر اس کو پورا کیا،
حضرت زینب رضی اللہ عنہا کو آپ کے پاس بھیج دیا اور یہ بھی ممکن ہے،
اس نے اور شادی نہ کرنے کا وعدہ کیا ہو۔
(5)
انی لست احرم حلالا ولا احل حراما:
حرام کو حلال ٹھہرانا اور حلال کو حرام ٹھہرانا،
میرے بس میں نہیں ہے،
حلت و حرمت اللہ کے ہاتھ میں ہے،
اس لیے میں نہیں کہتا کہ حضرت علی کے لیے اور شادی کرنا حرام ہے،
لیکن بات یہ ہے،
لا تجتمع بنت رسول اللہ بنت عدو اللہ مکانا واحداً،
اللہ کے رسول کی بیٹی اور اللہ کے دشمن کی بیٹی یکجا اکٹھی نہیں ہو سکتیں،
کیونکہ سوکنیں طبعی طور پر ایک دوسرے سے الرجک ہوتی ہیں،
اور ایک دوسری سے حسد و کینہ رکھتی ہیں،
اس لیے یہ رشتہ دونوں کے خاوندوں کو متاثر کرتا ہے،
حضرت فاطمہ رضی اللہ عنہا کی ناراضی اور تکلیف حضور اکرم صلی اللہ علیہ وسلم کی اذیت و تکلیف کا باعث بن سکتی ہیں اور کسی مسلمان کے لیے اس کا سبب بننا مناسب نہیں ہے،
اس لیے اس شادی کی اجازت نہیں ہو سکتی۔

حدیث حاشیہ:
حضرت ابوالعاص مقسم بن الربیع ہیں۔
آنحضرت ﷺ کی صاحبزادی حضرت زینب ؓ ان کے نکاح میں تھیں، بدر کے دن اسلام قبول کرکے مدینہ کی طرف ہجرت کی۔
آنحضرت ﷺ سے سچی محبت رکھتے تھے، جنگ یمامہ میں جام شہادت نوش فرمایا۔
ان کی فضیلت کے لیے کافی ہے کہ خود آنحضرت ﷺ نے ان کی وفاداری کی تعریف فرمائی۔
جب حضرت ابوالعاص ؓ کا یہ حال ہے تو پھر علی ؓ سے تعجب ہے کہ وہ اپنا وعدہ کیوں پورا نہ کریں۔
ہوا یہ تھا کہ ابوالعاص ؓ نے حضرت زینب ؓ سے نکاح ہوتے وقت یہ شرط کرلی تھی کہ ان کے رہنے تک میں دوسری بیوی نہ کروں گا، اس شرط کو ابوالعاص نے پورا کیا۔
شاید حضرت علی ؓ نے بھی یہی شرط کی ہو۔
لیکن جویریہ کو پیام دیتے وقت وہ بھول گئے تھے۔
جب آنحضرت ﷺ نے عتاب کا یہ خطبہ پڑھا تو ان کو اپنی شرط یا د آگئی اور وہ اس ارادے سے باز آئے۔
بعض نے کہا کہ حضرت علی ؓ سے ایسی کوئی شرط نہیں ہوئی تھی لیکن حضرت فاطمہ ؓ بڑے رنجوں میں گرفتار تھیں۔
والدہ گزرگئیں، تینوں بہنیں گزرگئیں، اکیلی باقی رہ گئی تھیں، اب سوکن آنے سے وہ پریشان ہوکر اندیشہ تھا کہ ان کی جان کو نقصان پہنچے۔
اس لیے آپ نے حضرت علی ؓ پر عتاب فرمایا تھا۔
(وحیدی)

حدیث حاشیہ:
دوسری روایت میں یوں ہے کہ میں حرام کو حلال نہیں کرتا نہ حلال کو حرام کرتا ہوں لیکن اللہ کی قسم اللہ کے رسول کی بیٹی اور اللہ کے دشمن کی بیٹی ایک شخص کے تحت مل کر نہیں رہ سکتی اس کے بعد حضرت علی رضی اللہ عنہ نے فورا وہ پیغام رد کر دیا تھا۔

حدیث حاشیہ:
اس حدیث کو امام بخاری ؒ نے باب علامات النبوۃ میں دوسری سند سے وصل کیا ہے، حافظ ابن حجر ؒ نے لکھا ہے کہ یہ حدیث قوی دلیل ہے اس بات پر کہ حضرت فاطمہ ؓ اپنے زمانہ والی اور اپنے بعد والی سب عورتوں سے افضل ہیں۔

حدیث حاشیہ:
یہ ایک ٹکڑا ہے اس حدیث کا جو کتاب النکاح میں گزر چکی ہے کہ حضرت علی رضی اللہ عنہ نے ابو جہل کی بیٹی سے نکاح کرنا چاہا تھا۔
آنحضرت صلی اللہ علیہ وسلم خفا ہوئے تو وہ اس ارادے سے باز آئے۔
اس حدیث کی مطابقت ترجمہ باب سے اس طرح ہے کہ آنحضرت صلی اللہ علیہ وسلم نے حضرت علی رضی اللہ عنہ کو جو دوسرے نکاح سے روکا تو اسی وجہ سے کہ ان میں اور حضرت فاطمہ الزہراء رضی اللہ عنہا میں نا اتفاقی کا ڈر تھا۔
آپ نے تو فرما دیا کہ یہ نا ممکن ہے کہ اللہ کے رسول کی بیٹی اور اللہ کے دشمن کی بیٹی ایک گھر میں جمع ہو سکیں۔

حدیث حاشیہ:
1۔
رسول اللہ ﷺ کے ایک داماد حضرت ابو العاص بن ربیع ؓ ہیں جو آپ کی بیٹی حضرت زینب ؓ کے خاوند تھے اس حدیث میں ان کا ذکر خیر ہے۔
مشرکین مکہ نے حضرت ابو العاص بن ربیع ؓ پر دباؤ ڈالا تھا کہ رسول اللہ ﷺ کی بیٹی کو طلاق دے دیں۔
تو انھوں نے صاف انکار کردیا۔
رسول اللہ ﷺ اس بنا پر قرابت دامادی کی تعریف کر رہے ہیں نیز رسول اللہ ﷺ نے اپنی بیٹی کے نکاح کے وقت حضرت ابو العاص بن ربیع ؓ سے یہ شرط کی تھی کہ ان کی موجودگی میں کسی دوسری عورت سے نکاح نہیں کریں گے انھوں نے اس شرط کو پورا کیا، شاید حضرت علی ؓ نے بھی یہی شرط کی ہومگر آپ بھول گئے اور عموم جواز پر نظر رکھتے ہوئے ابو جہل کی بیٹی سے منگنی کی۔
لیکن جب رسول اللہ ﷺ نے اظہار ناراضی کرتے ہوئے خطبہ دیا تو انھوں نے اپنا ارادہ ترک کردیا اسی طرح حضرت ابو العاص بن ربیع ؓ جب غزوہ بدر میں قیدی بن کر آئے تو رسول اللہ ﷺ نے اسے رہا کرتے ہوئے کہا تھا:
”میری بیٹی زینب کو مدینہ طیبہ بھیج دینا۔
“ تو انھوں نے اس وعدے کے مطابق انھیں بھیج دیا تھا۔
رسول اللہ ﷺ نے ان کی تعریف کی ہے۔
2۔
واضح رہے کہ وہ فتح مکہ سے پہلے مسلمان ہوگئے تھے پھر انھوں نے مدینہ طیبہ کی طرف ہجرت کی تو رسول اللہ ﷺ نے حضرت زینب ؓ کو ان کی زوجیت میں دے دیا۔
حضرت امامہ ؓ ان کی بیٹی تھیں جنھیں رسول اللہ ﷺ دوران نماز میں اپنے کندھوں پر اٹھالیا کرتے تھے۔
حضرت ابو العاص بن ربیع ؓ یمامہ کی لڑائی میں ذوالحجہ 12ھ کو شہید ہوئے۔

حدیث حاشیہ:
1۔
حضرت فاطمہ ؓ رسول اللہ صلی اللہ علیہ وسلم کی سب سے چھوٹی صاحبزادی ہیں۔
پندرہ سال کی عمر میں حضرت علی ؓ سے ان کی شادی ہوئی۔
2۔
اس حدیث میں حضرت فاطمہ کی بہت بڑی فضیلت بیان ہوئی ہے۔
رسول اللہ ﷺ نے انھیں اپنے جسم اطہر کا حصہ قراردیا اور ان کی ناراضی کو اپنی ناراضی کہا ہے۔
اس سے علامہ سہیلی نے استنباط کیا ہے کہ حضرت فاطمہ ؓ کو بُرا بھلا کہنا کفر ہے کیونکہ بُرا بھلا کہنے والے پر سیدہ ناراض ہوں گی اور آپ کو ناراض کرنا گویا رسول اللہ ﷺ کو ناراض کرنا ہے۔
اس طرح آپ کی ناراضی کفر ہے،لہذا فاطمہ ؓ کو ناراض کرنا بھی کفر ہے۔
لیکن یہ استدلال محل نظر ہے۔
(فتح الباري: 133/7)
3۔
ایک روایت میں ہے کہ خواتین جنت میں افضل حضرت خدیجہ ؓ اور سیدہ فاطمہ ؓ بنت محمد ﷺ ہیں۔
(مسند أحمد: 293/1، رقم: 2668)
ایک اور حدیث میں ہے کہ خواتین جنت کی سردار سید ہ فاطمہ ؓ ہوں گی۔
(صحیح البخاري، المناقب، حدیث: 3624)
اس سے معلوم ہوتا ہے کہ سیدہ فاطمہ ؓ تمام عورتوں سے افضل ہیں۔
(فتح الباري: 175/7)
ہمارا رجحان یہ ہے کہ اس سلسلے میں توقف کیاجائے،ہر ایک کسی نہ کسی سلسلے میں وجہ فضیلت حاصل ہے اگرچہ جگر گوشہ ہونے میں دوسرا کوئی شریک نہیں۔
اللہ تعالیٰ قیامت کے دن ہمیں ان کی میعت ورفاقت نصیب کرے اورجنت الفردوس میں ہم سب کو اکھٹا کردے۔
آمین

حدیث حاشیہ:
(1)
ایک روایت میں ہے کہ جب حضرت علی رضی اللہ عنہ سے ابو جہل کی بیٹی کے نکاح کی بات چلی تو حضرت فاطمہ رضی اللہ عنہا رسول اللہ صلی اللہ علیہ وسلم کے پاس آئیں اور کہا:
لوگوں کے بقول آپ اپنی بیٹیوں کی خاطر کسی کی ناراضی مول نہیں لیتے ہیں، دیکھیں میرے شوہر حضرت علی، ابو جہل کی بیٹی سے نکاح کرنا چاہتے ہیں۔
اس وقت آپ نے فرمایا:
”میں فاطمہ کی تکلیف کو برداشت نہیں کرسکتا۔
اللہ کی قسم!اللہ کے رسول اللہ بیٹی اور اللہ کے دشمن کی بیٹی ایک آدمی کے ہاں جمع نہیں ہوسکتیں۔
“ اس کے بعد حضرت علی رضی اللہ عنہ نے اس کا ارادہ ترک کر دیا۔
(صحیح البخاري، فضائل أصحاب النبي صلی اللہ علیہ و سلم، حدیث: 3729)
ایک دوسری روایت میں ہے:
”میں فاطمہ کو اس کے دین کے متعلق آزمائش میں مبتلا نہیں کرنا چاہتا اور نہ میں حلال ہی کو حرام اور حرام کو حلال کرتا ہوں لیکن اللہ کے دشمن کی بیٹی اور اللہ کے رسول کی بیٹی کبھی اکٹھی نہیں ہوسکتیں۔
“ (صحیح البخاري، فرض الخمس، حدیث: 3110) (2)
ان احادیث سے معلوم ہوتا ہے کہ جو عار باپ میں ہو وہ اولاد میں بھی باقی رہتی ہے کیونکہ رسول اللہ صلی اللہ علیہ وسلم نے اس لڑکی کو اللہ کے دشمن کی بیٹی قرار دیا، اسی طرح آباؤ اجداد کی شرافت اولاد کے لیے باعث افتخار ہوتی ہے۔
(3)
بہرحال حضرت علی رضی اللہ عنہ کے لیے ابو جہل کی بیٹی سے نکاح جائز تھا لیکن رسول اللہ صلی اللہ علیہ وسلم کے انداز سے معلوم ہو تا ہے کہ یہ رسول اللہ صلی اللہ علیہ وسلم کا خاصہ تھا اور یہ بھی احتمال ہے کہ سیدہ فاطمہ رضی اللہ عنہا کی خصوصیت ہو۔
والله اعلم (فتح الباري: 408/9)

حدیث حاشیہ:
(1)
واقعہ اس طرح ہے کہ حضرت علی رضی اللہ عنہ نے ابو جہل کی بیٹی سے نکاح کرنا چاہا۔
رسول اللہ صلی اللہ علیہ وسلم نے اس پر ناراضی کا اظہار فرمایا کہ اللہ کہ دشمن کی بیٹی اور اللہ کے رسول کی لخت جگر ایک گھر میں اکٹھی نہیں رہ سکتیں۔
اس کے بعد حضرت علی رضی اللہ عنہ نے دوسرے نکاح کا ارادہ ترک کر دیا۔
سیدہ فاطمہ رضی اللہ عنہا بھی اس عقد ثانی پر راضی نہ تھیں، اس بنا پر سیدہ فاطمہ اور حضرت علی رضی اللہ عنہا کے درمیان اختلاف متوقع تھا تو رسول اللہ صلی اللہ علیہ وسلم نے آئندہ آنے والی ناچاقی کا دفاع کیا کہ میں اس کی اجازت نہیں دیتا ہوں تاکہ شروع ہی سے خلع کا سد باب ہو۔
حافظ ابن حجر رحمہ اللہ نے اس مناسبت کو عمدہ قرار دیا ہے۔
(فتح الباري: 500/9) (2)
رسول اللہ صلی اللہ علیہ وسلم نے عقد ثانی کی اجازت نہ دے کر حضرت علی رضی اللہ عنہ کو اشارہ دیا کہ وہ نکاح نہ کرے، جب عدم نکاح کا اشارہ دیا جا سکتا ہے تو نکاح کو ختم کرنا، جو خلع کی صورت میں ہوتا ہے، اس کا بھی بوقت ضرورت اشارہ دیا جا سکتا ہے۔