اردو حاشہ:
1؎:
کیونکہ پہلی حدیث اگرچہ مرفوع ہے مگر عبدالرحمن بن زید بن اسلم کے طریق سے ہے،
اور وہ متکلم فیہ ہیں،
جبکہ ان کے بھائی عبداللہ ثقہ ہیں،
یعنی اس حدیث کا مرسل ہونا ہی زیادہ صحیح ہے۔

2؎:
اس حدیث سے وتر کی قضا ثابت ہوتی ہے،
اس کے قائل بہت سے صحابہ اور آئمہ ہیں،
اس مسئلہ میں اگرچہ بہت سے اقوال ہیں مگر احتیاط کی بات یہی ہے کہ وتر اگر کسی وجہ سے رہ جائے تو قضا کر لے،
چاہے جب بھی کرے،
کیونکہ وتر سنن و نوافل نمازوں کو طاق بنانے کے لیے مشروع ہوئی ہے،
اور اگر کوئی مسافر ہو اور دن بھر میں کسی وقت بھی دو رکعت بھی سنت نہ پڑھ سکا ہو تو ایسے آدمی کو وتر کی ضرورت ہی نہیں،
پھر عشاء کے بعد دو رکعت سنت پڑھ لے تب وتر پڑھے۔

نوٹ:
(شواہد و متابعات کی بناء پر یہ روایت صحیح ہے،
ورنہ یہ خود مرسل روایت ہے)

فائدہ:
یہ واقعہ غزوۂ خیبر سے واپسی پر پیش آیا اور صحیح مسلم میں یہ وضاحت موجود ہے کہ: «فكَان رَسُولُ اللهِ صلى الله عليه وسلم أَوَّلَهُمُ استيقاظا» ”رسول الله صلی اللہ علیہ وسلم ان میں سب سے پہلے جاگے۔“ [مسلم: 680]
مذکورہ حدیث مبارکہ کے اخیر میں آیت: «اَقِمِ الصَّلاةَ لِذ كري» [طه 20: 14] سے استدلال کیا گیا ہے، جو اس آیت کی جامعیت، مختلف پہلوؤں اور معانی پر مشتمل ہونے کی بنا پر ہے۔ آیت کا عام مفہوم تو یہ ہے کہ اللہ فرما رہے ہیں: میری یاد اور میرا ذکر قائم کرنے کے لیے نماز قائم کیجیے، کیونکہ ذکر الہی کی اعلیٰ ترین صورت نماز ہے، جبکہ رسول اللہ صلی اللہ علیہ وسلم کا استدلال لغوی معنی اور محذوف عبارت کے لحاظ سے ہے یعنی: «آقِم الصَّلاةَ لِوَقْتِ ذِكْرِ صَلَاتِي» (نماز کو اس وقت قائم کرو جب میری نماز تمھیں یاد آئے)
رسول اللہ صلى الله عليه وسلم کا فرمان ہے: «انَّ عَيْنَيَّ تَنَامَانِ وَلَا يَنَامُ قَلْبِي» ”يَقِينا میری آنکھیں تو سوتی ہیں لیکن میرا دل نہیں سوتا۔“ [بخاري: 114، مسلم: 738]
آپ صلى الله عليه وسلم کے اس فرمانِ مقدس اور مذکورہ بالا واقعہ کو سامنے رکھیں تو یہ تطبیق اور نتیجہ سامنے آتے ہیں کہ چونکہ آپ صلی اللہ علیہ وسلم کا دل نہیں سوتا تھا اس لیے جسم اطہر کے ساتھ پیش آنے والے معاملات مثلاً ہوا کا خارج ہونا، تکلیف پہنچنا، خواب یاد رہنا وغیرہ کا آپ صلی اللہ علیہ وسلم کو مکمل شعور رہتا تھا، لیکن وہ معاملات جو جسم مبارک سے ہٹ کر تھے اور آنکھ کے ساتھ دیکھنے سے تعلق رکھتے تھے مثلاً سورج کا نکلنا، رات کا ختم ہونا، وقت کا گزرنا وغیرہ تو ان کو آپ صلی اللہ علیہ وسلم کا قلب مبارک محسوس نہیں کرتا تھا، اسی لیے نیند کی بنا پر آپ صلی اللہ علیہ وسلم کی نماز قضا ہو گئی۔ [والله اعلم بالصواب]