اردو حاشہ:
1؎:
یہی جمہور کا مذہب ہے کہ عورت خواہ جنابت کا غسل کر رہی ہو یا حیض سے پاکی کا:
کسی میں بھی اس کے لیے بال کھولنا ضروری نہیں لیکن حسن بصری اور طاؤس نے ان دونوں میں تفریق کی ہے،
یہ کہتے ہیں کہ جنابت کے غسل میں تو ضروری نہیں لیکن حیض کے غسل میں ضروری ہے،
اور عائشہ رضی اللہ عنہا کی روایت کو جس میں رسول اللہ ﷺ نے ان سے ((اُنقُضِى رَأسَكِ وَامتَشِطِي)) فرمایا ہے جمہورنے استحباب پر محمول کیا ہے۔

لغوی تشریح:
«أَشُدُّ» «شَدَّ يَشُدُّ» سے واحد متکلم کا صیغہ ہے۔ اس کے معنی ہیں: مضبوطی کے ساتھ باندھنا۔
«تَحْثِي» تو انڈیل، تو ڈال۔ نصبی حالت کی وجہ سے نون اعرابی گر گیا ہے۔ «تَحْثِي» کی ”یا“ ساکن رہے گی۔
«حَثَيَاتٍ» «حَفَنَاتٍ» کے معنی میں ہے۔ پانی سے بھرے ہوئے دونوں ہاتھوں کے چلو۔

فوائد و مسائل:
➊ یہ حدیث اس بات کی دلیل ہے کہ جسے جنابت لاحق ہو جائے اس کے لیے غسل کرتے وقت بالوں کا کھولنا ضروری نہیں، البتہ سیدہ عائشہ رضی اللہ عنہا کی روایت میں ہے، جسے ابن ماجہ نے روایت کیا ہے، کہ آپ نے بالوں کو کھولنے کا حکم فرمایا۔ [سنن ابن ماجه، الطهارة وسننها، باب فى الحائض كيف تغتسل، حديث: 641]
مگر یہ دونوں روایتیں باہم متعارض نہیں کیونکہ بال کھولنے کا حکم اس وقت ہے جب عورت حیض سے غسل کرے، لیکن غسل جنابت میں عورت پر واجب نہیں کہ وہ سر کے بال کھولے، بلکہ صرف بالوں کی جڑ یا سر کی جڑ یا سر کا چمڑا تر ہونا چاہئے، سارے بال تر ہونا ضروری نہیں۔
➋ صحیح مسلم اور مسند أحمد میں ہے کہ سیدہ عائشہ رضی اللہ عنہا کو کسی ذریعے سے اطلاع ملی کی سیدنا عبد اللہ بن عمرو رضی اللہ عنہ عورتوں کو غسل جنابت و حیض کے وقت سر کے بال کھولنے کا حکم دیتے ہیں۔ اس پر سیدہ عائشہ رضی اللہ عنہا نے فرمایا: ابن عمرو پر تعجب ہے کہ وہ غسل کے وقت عورتوں کو بال کھولنے کا حکم دیتے ہیں تو وہ ان کو سر منڈوانے کا حکم کیوں نہیں دیتے۔ (اس سے تو بہتر ہے کہ وہ عورتوں کو سر منڈوانے کا حکم ہی دے دیں۔) میں اور نبی صلی اللہ علیہ وسلم ایک ہی ٹب نما برتن میں غسل کر لیا کرتے تھے اور میں سر پر صرف تین بار پانی ڈال لیتی تھی۔ اور (غسل جنابت میں) سر کے بال کھولنے کی ضرورت نہیں سمجھتی تھی۔ [صحيح مسلم، الحيض، باب حكم ضفائز المغتسلة، حديث: 331]
➌ «وَفِي رِوَايَةٍ: وَلِلْحَيْضَةِ؟» کے الفاظ شاذ ہیں جیسا کہ شیخ البانی رحمہ اللہ نے [الصحيحة 366/1] میں وضاحت کی ہے۔

251۔ اردو حاشیہ:
مرد اور عورت کے غسل میں کوئی فرق نہیں ہے۔ یعنی پہلے زیریں جسم دھو لیا جائے اور اگر کوئی آلائش لگی ہو تو دور کر لی جائے۔ بعد ازاں نماز والا وضو کیا جائے اور پھر باقی جسم پر پانی بہایا جائے۔ خواتین کو اجازت ہے کہ غسل جنابت میں ان کے سر کے بال بندھے ہوئے ہوں تو نہ کھولیں۔ ویسے ہی تین لپ پانی ڈال لیں اور ہر بار بالوں کو خوب اچھی طرح ہلائیں اور ملیں تاکہ پانی جڑوں تک چلا جائے۔ اس طرح اپنے طور پر تسلی کر لینی چاہیے، مگر غسل حیض میں بالوں کو پوری طرح کھولنا ضروری ہے کیونکہ روایات میں حائضہ کے لیے بال کھولنے کا حکم ملتا ہے۔ [سنن ابن ماجة، حديث: 641]

242۔ اردو حاشیہ:
➊ عورت کے بال بڑے ہوتے ہیں۔ مینڈھیاں بنانا اس کی ضرورت اور مجبوری ہے۔ غسل میں مینڈھیاں کھولیں تو دقت پیش آتی ہے۔ کھولنے اور دوبارہ بنانے میں کافی وقت صرف ہوتا ہے، اس لیے شریعت نے عورتوں کی مجبوری کا لحاظ رکھتے ہوئے غسل جنابت میں مینڈھیاں نہ کھولنے کی اجازت دی ہے۔ اتنا ضروری ہے کہ سر پر پانی ڈال کر بالوں میں انگلیاں پھیری جائیں تاکہ سر کی کھوپڑی اور بالوں کی جڑیں تر ہو جائیں۔ گویا سارا جسم تر ہو جائے۔
➋ مینڈھیاں تو ویسے بھی زائد لٹکنے والے بال ہیں، اگر وہ تر نہ بھی ہوں تو کوئی حرج نہیں، البتہ اوپر سے دھو لیے جائیں۔
➌ غسل حیض ایک ماہ میں ایک دفعہ ہی ہے، اس کے لیے مینڈھیاں کھولنے میں کوئی دقت نہیں، لہٰذا غسل حیض میں مینڈھیاں کھول کر بالوں کو اچھی طرح دھونا ضروری ہے۔ ارشاد باری تعالیٰ ہے: ﴿لایکلف اللہ نفسا الا وسعھا﴾ [البقرۃ 286: 2]
”اللہ تعالیٰ کسی جان کو اس کی وسعت و گنجائش سے بڑھ کر تکلیف نہیں دیتا۔“

اردو حاشہ:
(1)
جس طرح مرد کے لیے ضروری ہے کہ سر کی جلد کو بھی باقی جسم کی طرح تر کرے”عورت کے لیے بھی غسل جنابت میں یہ تاکید ہے”البتہ بالوں کی مینڈھیاں اچھی طرح بنی ہوئی ہوں تو انھیں نہ کھولےکیونکہ اس میں مشقت ہے لیکن اگر اس کے بال ڈھیلے ڈھالے گوندھے ہوئے ہوں یا کھلے ہوئے ہوں تو بالوں کو خوب دھونا چاہیے۔

حدیث حاشیہ:
فوائد ومسائل:
سر کے بالوں کی جڑوں تک اگر پانی پہنچ جائے تو پھر گوندے ہوئے بالوں کو کھولنا ضروری نہیں ہے جمہور فقہاء کا یہی مؤقف ہے امام نخعی رحمۃ اللہ علیہ کے نزدیک ہر حالت میں بال کھولنے ہوں گے۔
حسن بصری رحمۃ اللہ علیہ اور طاؤس رحمۃ اللہ علیہ کے نزدیک غسل حیض کے لیے بال کھولنا ضروری ہیں غسل جنابت کے لیے ضروری نہیں۔